Tanga yetu yatwaminenga mungalila yaTellancourt kunote yaFrance. Tata apwile wakuFrance, kaha mama apwa wakuItaly. Omu ngwapwile namyaka yakusemuka 8, twalukilile kungalila yimwe yakuhutwa yamunganda yaRome muItaly. Kaha chiyoyelo chatukaluhwilile chikuma. Visemi jami valizungishilenga lika mwomwo yaukalu wajimbongo.

Kahomu ngwapwile namyaka yakusemuka 15, mama angukolezezele nguyenganga nakuhema navakwetu. Ngocho kakavulu kangwatwamishilenga hemboko. Kutwala muze ngwalikachile namasepa vavapi. Likumbi limwe, lunga umwe anguhanyine maundu akupendesa, kaha ngwawanwine mwomwo ngwasakile ngupwenga nge ngumukulwane. Kufumaho, ngwanwinenga chikuma maundu akupendesa nakulinga ujila, kaha kakavulu vangupikilenga. Ngocho kangwazakaminenga kuyoya chamiko, ngwachimwenenga kupwa chamokomoko. Kaha ngwaputukile kuhomba chikuma. Omu ngwapwile namyaka yakusemuka 16, ngwasakile kulijiha hakunwa mutumwa wawala wawisiki nakulimbila muchijiva. Kaha ngwavijile misongo yakufwa nakuyoya hamakumbi atatu.

Omu ngwayoyele, ngwaputukile kumona kuyoya kupwa chachilemu, oloze ngwazanyinenga cheka muvilinga vyaulyanyi nawiji. Ngwashimbilenga mapwevo nakuya navo kujizuvo javo, kaha ngwavanwishilenga maundu akupendesa nakwiva vyuma vyamwaza vapwile navyo. Mazavu avihwanga anguhanyinenga maundu akupendesa mangana nguvalanjishile muItaly. Kakavulu vangukwachilenga kutupokola. Kaha chiyoyelo chami chapwile chaliwayanga. Chipwe ngocho, ngwatachikijile ovyo ngweji kuyoyelanga. Ngocho ngwalombele kuli Kalunga anguhane numba vene mwaka umwe wakutwama mukuunda nakuwahilila.

Omu ngwapwile namyaka yakusemuka 24, ngwalukilile kuEngland. Hakuwana nge ngwalanjishilenga maundu akupendesa, ngocho kuyoya chami chapwile muponde. Shimbu kanda nguyenga kuEngland, ngwayile nakusalisa mama. Kahomu ngwahetele kuze, ngwalikomokelele chikuma hakumona Annunziato Lugarà ali nakushimutwila namama vyuma vyamuMbimbiliya. * Ou lunga apwilenga  chihwanga, ngocho ngwalizakaminyine nakumuhulisa ovyo akatukilile. Angulwezele vyuma vyavinene alumwine mukuyoya chenyi numba apwenga Chinjiho chaYehova. Angulwezele nawa ngwenyi ngukatonde Vinjiho jaYehova omu nangukaheta muEngland, kaha ngwetavilile. Oloze hakuheta kuze, ngwaputukile cheka kulinga vilinga vyavipi.

Likumbi limwe omu ngwawanyine Chinjiho chaYehova ali nakuhana vatu Kaposhi Kakutalila naTonenu! mumukwakwa muLondon, ngwanukile mazu angulwezele Annunziato, ngocho ngwamulwezele mangana angunangule Mbimbiliya.

Vyuma ngwalinangwile muMbimbiliya vyangukunywile. Chakutalilaho, ngwevwile kuwaha omu ngwatangile mazu atwama hali WaYowano 1, 1:9, aze ahanjika hali Kalunga ngwawo: ‘Kachi nge natwitavila jishili jetu, kaha nahase kutukonekelajo nakututomesa mwomwo ikiye apwa wakushishika kaha nawa wakwoloka.’ Mazu kana angukwachile kumuchima mwomwo ngwevwilenga kupihya chikuma havilinga vyami vyavipi. Nakushimbula chiku, ngwaputukile kuya kuZuvo yaWangana yaVinjiho jaYehova, kaha vangutambwokesele nachisambo. Omu ngwamwene zangi vasolwelenga, nayami ngwasakile kupwa mutanga kaneyi yakulinunga mwomwo chuma kana chikiko ngwafwilililenga mukuyoya chami.

Numba tuhu kulitwamina kunwa maundu akupendesa navilinga vyeka vyavipi kachangukaluhwilileko, oloze chapwile chachikalu kwalumuna kuyoya chami. Ngwatachikijile jino ngwami ngwatelele kuvumbika vatu nakuvasolwela likoji. Noholyapwa nguchili lika nakuzata nangolo ngwechenga vilinga vyami vimwe vyavipi. Kaha Yehova ali nakungukafwa nguzovoloke. Omu mwahichile tukweji 6 kufuma haze ngwaputukile kulinangula Mbimbiliya, vangumbapachishile nakupwa nguChinjiho chaYehova. Vangumbapachishile mu 1997.

Hanyima yakungumbapachisa, ngwambachile Barbara uze apwile naikiye Chinjiho chaYehova wamuhya. Omu sepa lyami umwe amwene nguneche vilinga vyavipi, naikiye aputukile kulinangula Mbimbiliya naVinjiho jaYehova. Kutwala muze, apwile Chinjiho chaYehova. Nayayenyi aputukile kulinangula Mbimbiliya nakupwa Chinjiho chaYehova. Kaha nawa kaka wapwevo uze apwile namyaka yakusemuka yakuhambakana 80, naikiye aputukile kulinangula Mbimbiliya, kaha vamumbapachishile shimbu kanda afwenga.

Oholyapwa ngwapwa ngumukulwane muchikungulwilo, kaha ami napuwami twazata mulimo washimbu yosena wakunangula vatu Mbimbiliya vaze vahanjika lilimi lyamuItaly muLondon. Shimbu jimwe ngweji kuhombanga nge ngunanuka chiyoyelo chami chakunyima, oloze puwami eji kungukolezezanga chikuma. Nguli jino natanga yakuwahilila yize ngwasakilenga. Nguli nawa naChisemi wazangi Yehova Kalunga uze ngwafwililile kupwa nenyi. Ngwalombele Kalunga anguhane mwaka umwe wakutwama mukuunda nakuwahilila, oloze nanguhane jino vyuma vyavivulu.