CHIHANDE CHACHINENE | MWOMWO IKA TWATELA KUPWILA VAKASHISHI?
Uno Kupwa Vakashishi Chamokomoko Tahi?
Hitoshi azachilenga mulimo wakulama jimbongo hakapani yamuJapan yakutondela vatu milimo. Omu apwile nakuhituluka mujimbongo namukulwane wamilimo, uze mukulwane amulwezele asoneke vyuma vyamakuli kutalisa kujimbongo kana. Oloze Hitoshi ahanjikile ngwenyi chivezu chenyi kachamwitavishile alyongeko. Ngocho uze mukulwane wamilimo amulwezele ngwenyi mwamufumisa hamilimo. Kaha amufumishile vene hamilimo.
Hatukweji vakavangijileho, Hitoshi alizakaminyine numba nge mwakawana milimo kweka kuze mwakazata nakashishi. Chakutalilaho, lwola lumwe omu vapwile nakumwihwojola vyakumwingisa milimo, ahanjikile ngwenyi keshi kuhasa kuzata milimo yize nayimulingisa alyongeko. Kaha uze apwile nakumwihwojola ambile ngwenyi, “Ngunalikomokela havyuma unahanjika.” Vausoko wenyi namasepa jenyi vamukolezezele atwaleho lika kupwa wakashishi. Chipwe ngocho, Hitoshi aputukile kuhuhwasana, ambile ngwenyi, “Ngwahuhwasanyinenga numba nge chapwa chachilemu kusolola kashishi mwomwo yavyuma ngwafwelela.”
Mujimbu waHitoshi unasolola nge vatu vamwe kavamona kusolola kashishi kupwa chachilemuko. Veka vamona nge kupwa vakashishi chapwa kulihilwisa munyima, chikumanyi mukusekasana. Pwevo umwe uze atwama hamilimo muSouth Africa ambile ngwenyi, “Ngwazata navatu vakuhona kashishi, kaha shimbu jimwe veji kungushinjilanga nayami ngulinge mwomumwe.”
Chuma chimwe chasolola kuhona kashishi shina kwonga chize chinalisale chikuma makumbi ano. Myaka yimwe kunyima, mujimbu ahehwojwele Robert S. Feldman wahaYunivesiti yaMassachusetts Amherst, uze alinangula vilinga navishinganyeka vyavatu wasolola nge vatu vakuheta kujipaseti 60 vaze vanakolo veji kwonganga vakwavo nge vali nakushimutwila numba vene muminyutu 10. Feldman ambile ngwenyi, “Twalikomokelele chikuma hachuma kana. Katwashinganyekele ngwetu vatu vanahase kupwa natato yakwonganga vakwavo hakumbi hakumbiko.” Vatu vavavulu veji kwivwanga kupihya nge vanavongo okunyi navakiko vasaka kwonga vakwavo.
Mwomwo ika kwonga, nakwiva, navilinga vyeka vize vyasolola kuhona kashishi vinalisale chikuma makumbi ano? Uno kuhona kupwa vakashishi chapihila halihi muchitungilo? Kaha etu tunahase kulihenda ngachilihi kuvilinga kanevi vyavipi?
