Lizu lyachiHelase valumuna muMbimbiliya ngwavo “kashishi” lyalumbununa “chuma chamwaza chikuma.” Lyalumbununa nawa kupwa navilinga vyamwaza.

Vaka-Kulishitu vamona mazu awa akaposetolo Paulu kupwa amalemu, akwamba ngwavo: “Tuli nakusaka ngwetu tupwenga vakashishi muvyuma vyosena.” Uno kupwa vakashishi muvyuma vyosena mwaliweza vyuma muka?

Hakumbi hakumbi vatu vavavulu veji kulitalanga muchitalilo shimbu kanda vayenga kumwe. Mwomwo ika? Mwomwo vasaka vasoloke kanawa. Oloze kwatwama chuma cheka chachilemu chikuma kuhambakana unyoji wakumutwe chipwe wauvwalo. Chuma kana shina mutu wetu wamutulo, mwomwo nahase kutulingisa tusoloke kanawa haweluka chipwe chiku.

Mazu aKalunga ahanjika hatoma ngwawo etu vatu twafwila kulinga vyuma vyavipi. Mukanda waKuputuka 8:21 wamba ngwawo: “Kujina chamumichima yavatu chinapu chachipi kufuma kuunyike wavo.” Ngocho hakusaka tupwenga vakashishi, twatela kuzata nangolo numbanyi tuhonese vilinga vyetu vyavipi. Kaposetolo Paulu alumbunwine omu alwilenga navilinga vyashili ngwenyi: “Ami ngweji kwivwilanga kuwaha chikupu jishimbi jaKalunga kweseka namutu wami wamutulo, oloze ngunamono lushimbi lweka mumujimba wami luze luli nakulwa nalushimbi elu lwamuvishinganyeka vyami nakungutwalanga muufunge walushimbi lwashili elu luli mumujimba wami.”—Wavaka-Loma 7:22, 23.

Chakutalilaho, nge muchima wetu nautulweza tulinge vyuma vyavipi nakutuzondola tuhone kusolola kashishi, kaha kanda natuwechelela utufungululeko. Chipwe ngocho, tukwechi lisesa lyakulisakwila vyakulinga. Nge natufwila kuhonesa vishinganyeka vyavipi, kaha tunahase kupwa vakashishi chamokomoko nakutwama navatu vakuhona kashishi.

Hakusaka tupwenga vakashishi twatela kukavangiza jishimbi jakatwamino katoma. Oloze chaluvinda, vatu vavavulu veji kumbilanga lwola lwaluvulu kukusakula vyuma vatela kuvwala kuhambakana kushinganyeka hajishimbi jakatwamino katoma. Echi cheji kulingisanga vatu vahone kupwa vakashishi. Mukanda waThe (Honest) Truth About Dishonesty wamba ngwawo: “Kakavulu tweji kwonganga vakwetu mujila yize nayisolola nge twapwa vakashishi.” Uno kuli chuma chimwe chachilemu chize chinahase kutukafwa tupwenga vakashishi tahi? Eyo.

Vatu vavavulu mukaye vanawane nge Mbimbiliya yikiko yinahase kuvakafwa vapwenga vakashishi. MuMbimbiliya mwatwama jishimbi jamwaza jize jinahase kutukafwa chikuma. (Samu 19:7) Yeji kutukafwanga mwakutwamina kanawa mutanga, nakumilimo, namwakupwila navilinga vyamwaza nakupwa nawa vakuhya kushipilitu. Yinakafwenga vatu putu vene kushikulu. Jishimbi najindongi jatwamamo jeji kukafwanga vatu vakumafuchi osena, navisemwa vyosena, namiyachi yosena navatu vakulisezaseza. Shikaho nge natulinangulanga Mbimbiliya nakushinganyeka  havyuma yahanjika nakuvikavangiza, kaha natunangula michima yetu mangana tupwenga vakashishi navilinga vyamwaza.

Oloze kuli chuma chikwavo chinahase kutukafwa tupwenga vakashishi keshi kutachikiza kaha chinyingi chakwoloka chamuMbimbiliyako. Twatwama mukaye kavilinga vyavipi kaze keji kutushinyinyikanga tulinge vyuma vyavipi. Echi chikiko twatela kulombelanga kuli Kalunga atukafwe. (Wavaka-Fwilipi 4:6, 7, 13) Nge natulinga ngocho, kaha natupwa vakumika hakulinga vyuma vyamwaza nakupwa vakashishi muvyuma vyosena.

Hitoshi uze twavulukanga muchihande chakulivanga anganyalile hakupwa wakashishi kumilimo. Ali jino nakuzata milimo kuli mutu uze eji kumusangejekanga mwomwo yakashishi kenyi. Hitoshi ambile ngwenyi, “Ngwawahilila chikuma hakuwana milimo yize yeji kungukafwanga ngupwenga nachivezu chitoma.”

Navatu veka vananganyala mujila yoyimwe. Tutalenu havyakutalilaho vyavatu vaze vananganyala hakukavangiza chishina chamuMbimbiliya chakwamba ngwavo, “tupwenga vakashishi muvyuma vyosena.”

• Chivezu Chitoma

  Cheryl wamuIreland ambile ngwenyi, “Omu ngwapwile namyaka yakusemuka 13, ngwalitwaminyine kuya kushikola nakuputuka kulikata naveji. Ngocho jimbongo jajivulu ngwapwilenga najo ngwajiwanyinenga mwomwo yawiji. Kutwala muze ngwasombokele, kaha ami nalunga lyami twaputukile kulinangula Mbimbiliya naVinjiho jaYehova. Twalinangwile nge Yehova * Kalunga ahunga wiji, ngocho twafwililile kwalumuna kuyoya chetu. Kuheta mu 1990, twalihanyine kuli Yehova nakutumbapachisa nakupwa tuVinjiho jaYehova.”—Vishimo 6:16-19.

  Cheryl ambile nawa ngwenyi, “Kunyima, muzuvo yami mwazalilenga vyuma vyakwiva, oloze oholyapwa kamweshi vyuma kanako. Echi chinangukafwe ngupwenga nachivezu chitoma. Omu ngweji kushinganyekanga havyuma ngwalingilenga kunyima, ngweji kusakwililanga Yehova hakungukafwa ngwechenga vilinga kana. Oholyapwa ngwapwa nguwakusuuluka makumbi osena hakutachikiza ngwami Yehova ali nakungwivwila kuwaha.”

  Sonny wamuHong Kong ambile ngwenyi, “Omu mukulwane wami wamilimo atachikijile nge ngwakanyine kutambula maswekeza kuli mutu ejile nakulanda vyuma, ambile ngwenyi: ‘Kalunga kove ikiye akukafwa upwenga umutu wamwenemwene! Chinapu hikutokwa chachinene chikuma kupwa nayove hano hakapani yetu.’ Kupwa wakashishi muvyuma vyosena cheji kungukafwanga ngupwenga nachivezu chitoma kumeso aKalunga. Cheji kungulingisanga nawa ngukafwe vaka-tanga yami navatu veka valinge mwomumwe.”

• Kutwama Mukuunda

  Tom wamuUnited States ambile ngwenyi, “Ngwapwa ngumuhato kuli mukulwane wanyambaulu yimwe yayinene. Kaha vaka-kuzata kujinyambaulu vavavulu kavapwa vakashishiko mwomwo vazanga chikuma luheto. Vatu vavavulu vashinganyeka ngwavo, ‘Kuhona kupwa nakashishi muvyuma vimwe kachapwa chakuhengako nge nachikunehela luheto.’ Oloze kupwa nakashishi chinangukafwe ngutwame mukuunda. Ngocho ngwafwila kupwa lika wakashishi chamokomoko naukalu naufumamo. Vakulwane jami vamilimo vatachikiza ngwavo kangweshi kuhasa kulyongako.”

• Kutuvumbika kuVatu

  Kaori wamuJapan ambile ngwenyi, “Mukulwane wami wamilimo angulwezele ngulyonge havyuma vimwe vize vyajimbalile kumilimo, oloze ngwakanyine. Omu vakwachile vatu vaze vevile vize vyuma, ou mukulwane angusangejekele hakashishi kami. Kupwa vakashishi mukaye kano chasakiwa kumika. Nge natulinga ngocho, kaha vakwetu navatufwelela nakutuvumbika.”

Chikupu vene, nge natupwa vakashishi, kaha natupwa nachivezu chitoma, nakutwama mukuunda, nakutuvumbika kuvatu. Kutala munetavila mazu kana tahi?