Uno mazu kana munahase kuwetavila tahi? Ngana mwaSamantha, tuvosena twahitaho lyehi muukalu waunene mukuyoya chetu. Oloze vyuma natulinga nge tuli mucheseko kana vinahase kutusolola numba nge twamona kashishi kupwa chuma chachilemu chipwe nduma. Chakutalilaho, nge natwivwa sonyi kulinga vyuma vyamwaza, kaha tunahase kumona kuhona kashishi kupwa chamwaza. Oloze kakavulu kuhona kupwa vakashishi cheji kwingisanga vatu muukalu waunene nge vanavakwate. Tutalenu haukalu umwe weji kufumangaho.

Usoko weji kuzamanga nge vatu navalifwelela, kaha veji kutwamanga mukuunda. Oloze kulifwelela kachalijila chiveneko. Vatu vatela kupwanga hamwe, nakushimutwila chakuzeneka kulyonga nakulilingila vyuma vyamwaza numba valifwelele. Oloze nge kaveshi kupwa vakashishiko, kaha kaveshi kuhasa kulifwelela chekako.

Kutala vamyongaho lyehi kuli sepa lyenu uze mwafwelela chikuma tahi? Nge mukiko, kaha mwevwile ngachilihi? Atela mwevwile kupihya chikuma. Kahomu mukiko chapwa. Chikupu vene, kuhona kashishi chinahase kwenyeka usoko.

Mujimbu ahehwojwele Robert Innes wahaYunivesiti yamuCalifornia uze alinangula mwakuzachishila jimbongo wasolola nge “chikupu vene vatu vakuhona kashishi veji kutambwisangako vakwavo vilinga vyovimwe.” Ngocho kuhona kashishi tunahase kuchifwanyisa kumusongo waupi wakulitambwisa. Nge mutu mwalikata namuka-kwonga, naikiye nahase “kutambulako” nakupwa muka-kwonga.

Munahase kulihenda ngachilihi kuvilinga vyakuhona kashishi? Mbimbiliya yinahase kumikafwa. Tunamilombo mukekese jindongi jimwe jamuMbimbiliya.