Uno Mwatachikiza Tahi?

PUTUKA KWIMBISA

Uno mikanda yakuvunga vayitungilenga ngachilihi kushikulu, kaha vayizachishilenga ngachilihi?

Later leather and vellum scrolls of the Bible book of Esther, from the 18th century C.E.

Mukanda waMujimbu Wamwaza asonekele Luka watulweza ngwawo Yesu atanduwile mukanda wakuvunga waIsaya, autangile nakuuvunga cheka. Kusongo yamukanda waMujimbu Wamwaza asonekele Yowano, Yowano naikiye ahanjikile ngwenyi kahashile kusoneka mumukanda wenyi wakuvunga vinjikizo vyosena vize alingile Yesuko.—Luka 4:16-20; Yowano 20:30; 21:25.

Mikanda yakuvunga vayitungilenga ngachilihi? Vambachilenga tuvihanda twamalambu namateve nakutunungasana muusuku. Kufumaho vajingilenga mukanda kana kuchitondo, kaha vasona vapwilenga mukachi. Vasona kana vavasonekelenga muwihi muvihanda vihanda. Nge mukanda wakuvunga wausuku chikuma, kaha vaujingilenga kuvitondo vivali, chimwe kusongo yimwe, chikwavo nawa kusongo yikwavo. Kaha muka-kutanga azachishilenga vitondo kana hakutanduula songo yimwe yamukanda nalivoko limwe nakuvunga songo yikwavo nalivoko likwavo palanga nomu mwawana mazu ali nakutonda.

Ndikishonali yaThe Anchor Bible Dictionary yamba ngwayo, “Mukanda wakuvunga wapwile wausuku jimita kafwe 10, kaha vanahase kusonekamo mukanda wamuundu.” Chakutalilaho, mukanda waMujimbu Wamwaza asonekele Luka wasakiwile mukanda wakuvunga wausuku kafwe jimita 9.5 numba ukume kuusoneka. Shimbu jimwe kujisongo jamukanda wakuvunga vatetelengako, nakufutungulako nakukwitako ulombo mangana kupwenga kusenena.

Uno “vapilishitu vavakulwane” vavuluka muVisoneka VyachiHelase vyaVaka-Kulishitu vapwile veya?

Kufuma vene halwola vaputukile kutongola vapilishitu muIsalele, vatongwelenga lunga umwe kaha kupwa kapilishitu wakulitulaho palanga nakukufwa chenyi. (Kulava 35:25) Alone ikiye apwile watete kupwa kapilishitu wakulitulaho. Kutwala muze, ou mulimo vauswanyinenga kuli vana vamalunga vavatwatwa. (Kulovoka 29:9) Vaka-tanga yaAlone vamalunga vavavulu vazachilenga milimo yaupilishitu, oloze vavandende kaha vapwile vapilishitu vakulitulaho.

Jino omu vaka-mafuchi eka vayulilenga vaIsalele, vatongwelenga vapilishitu vavo vakulitulaho nakufumisaho vapilishitu vakulitulaho vavaYuleya. Kakavulu vatu vaze vatongwelenga vapwilenga vamujitanga jakusakula, chikumanyi mutanga yaAlone. Mazu akwamba ngwavo “vapilishitu vavakulwane” atalisa kuvatu vavalemu vavapilishitu. Hali vapilishitu vavakulwane hapwile navatwamina jamazavu 24 avapilishitu, navatu vavalemu vakujitanga javapilishitu vakulitulaho, navapilishitu veka vakulitulaho vaze vafumishile haupilishitu vakufwana nge Anase.—Mijimbu 1, 24:1-19; Mateu 2:4; Mako 8:31; Vilinga 4:6.