NGE kemba nasemuka, asakiwa kumukinga. Tuvosena omu twasemukile twapendaminyine chikuma hali visemi jetu vatukinge. Kahomu twaputukile kundamangila, twamwenenga vatu vosena kupwa vavasuku, vakutaluka. Twavevwilenga woma nge katweshi hamwe navisemi jetuko. Oloze twapwilenga vakukingiwa nge tunakwate kumavoko avisemi jetu.

Omu twapwile tuvanyike, kuyoya chetu chapendaminyine hali visemi jetu vaze vatusolwelelenga zangi nakutusangejeka. Kutusolwela zangi chatulingishilenga tupwenga vakukingiwa. Kaha nawa kutusangejeka chatulingishilenga tuwahilile nakuzata nangolo.

Kahomu twaputukile kukola, twapwilenga namasepa vaze vatukafwile tupwenga vakukingiwa. Twapwilenga vakukasunuka kaha nawa vakukingiwa nge tuli navo hamwe kushikola.

Omu mukiko veji kwivwanga vanyike vosena. Vanyike vamwe kavatwama namasepako kaha nawa vavavulu kavavazakama kanawa kuvisemi javoko. Chakutalilaho, Melissa * ambile ngwenyi, “Omu ngweji kumonanga jifwato javatu mujitanga vali nakuwahilila nakuzachila hamwe, ngweji kulinyenganga ngwami, ‘Kachi nayami ngwakolelele mutanga yangana.’” Pamo nayenu mukiko mweji kwivwanga.

Pamo omu mwapwile muvanyike, mwakolelenga nachiwomawoma. Pamo visemi jenu kavamisolwelelenga zangi nakumisangejekako. Kaha nawa pamo muli nakwanuka omu visemi jenu valizungishilenga nakujiha ulo wavo nakulihana mulonga ngwenu pamo yenu mwalingishile uze ulo ufwenga. Nyi pamo chisemi chenu amyambilenga mwamupi chipwe kumipupula.

Uno vana veji kulinganga ngachilihi nge vali muukalu wangana? Vamwe veji kuputukanga kunwa maundu akupendesa nawala shimbu vachili vanyike. Veka veji kulikatanga navihwanga. Kaha vakwavo veji kuputukanga kulisesembwa namapwevo chipwe malunga shimbu kanda vaheteho kulinga ngocho. Oloze nakushimbula chiku, veji kulyechanga nakwingila jino muukalu ukwavo.

Numba tuhu vanyike vamwe kaveshi kwazana muvilinga kaneviko, oloze veji kwivwanga lika nge vapwa vamokomoko nge vanakolo. Chakutalilaho, Ana ambile ngwenyi, “Ngwalimwenenga kupwa nguwamokomoko mwomwo omu mukiko angwambilenga mama lwola lwosena. Kakwapwile numba likumbi limwe angusangejekele chipwe kungusolwela zangiko.”

 Kutulela mujila yayipi keshi chikiko kaha cheji kutulingisanga twivwenga nge katwapwa vakukingiwako. Tunahase kwivwa ngocho mwomwo yakulilukulula, naushinakaji chipwe mwomwo yasolokeso yetu. Echi chinahase kutulingisa tuhone kupwa vakuwahilila nakwenyeka usoko wetu navakwetu. Vyuma muka twatela kulinga mangana tuhonese vishinganyeka kana?

Tuvosena twatela kutachikiza ngwetu kuli mutu asaka kutukafwa. Mutu kana shina Kalunga.

Omu mukiko atufwelelesa Kalunga kuhichila muli kapolofweto Isaya ngwenyi: “Kanda naulizakaminako, mwomwo nguKalunga kove. Nangukujikijisa, nangukukafwa, nangukukwachilila nalivoko lyami lyachilyo lyakwoloka.” (Isaya 41:10, 13) Ocho kuwaha kana tweji kwivwanga hakutachikiza ngwetu Kalunga asaka kutukwachilila nalivoko lyenyi! Ngocho katwatela kulizakaminako.

Mbimbiliya yatulweza vyavangamba jaKalunga vaze valizakaminyinenga vaze vapendaminyine hali ikiye avakafwe. Chakutalilaho, Hana naye yaSamwele alimwenenga kupwa wamokomoko mwomwo yakuhona kupwa namwana. Kakavulu vamutolekelenga mwomwo yakupwa mumba. Echi chamulingishile alitwamine kulya nakulilanga lwola lwosena. (Samwele 1, 1:6, 8) Oloze omu alwezele Kalunga ukalu wenyi, kahombele chekako.—Samwele 1, 1:18.

Shimbu jimwe, namuka-kwimba jisamu Ndavichi evwilenga nge kapwile wakukingiwako. Hamyaka yayivulu, Mwangana Saulu asakilenga kumujiha. Shimbu jimwe omu Ndavichi apwilenga muponde kana, evwilenga kwijiva nge kundu uze ali mulunguwa. (Samu 55:3-5; 69:1) Chamokomoko naukalu kana, Ndavichi asonekele ngwenyi: “Nangusavala mukuunda nakuya mutulo, mwomwo Ove Yehova, yove kaha weji kungukafwanga ngupwenga nguwakukingiwa.”—Samu 4:8.

Hana naNdavichi valwezele Yehova ukalu wavo, kaha avazamikishile. (Samu 55:22) Uno vyuma muka natulinangulaho makumbi ano?

1. Fwelelenunga Yehova uze apwa Setu.

Yesu atulweza tutachikize Ise uze apwa “Kalunga umwe kaha wamuchano.” (Yowano 17:3) Kaposetolo  Paulu atufwelelesa ngwenyi: “[Kalunga] kapwa kwakusuku nayetu tuvosena mutu himutuko.” (Vilinga 17:27) Yakova nawa asonekele ngwenyi: “Pandamenu kuli Kalunga, kaha mwapandama kuli enu.”—WaYakova 4:8.

Nge natutachikiza ngwetu Setu wamwilu atuzanga nakutuzakama, kaha nachitukafwa tuhone kulizakamina. Numba tuhu cheji kumbatanga tando numba tufwelele ngwetu Yehova atuzanga nakutuzakama, oloze vavavulu vanawane nge kulinga ngocho cheji kuvakafwanga chikuma. Caroline ambile ngwenyi, “Omu ngwamwene jino Yehova kupwa Tata, ngwamulwezelenga ukalu wami wosena. Echi changukafwile ngulitwamine kulizakamina.”

Rachel nawa ambile ngwenyi, “Yehova ikiye angukafwile ngupwenga wakukingiwa omu ngwasalile uka wami chakuzeneka visemi. Ngwahanjikilenga nenyi nakumulweza ukalu wami, kaha angukafwile.” *

2. Likatenu natanga yakushipilitu.

Yesu anangwile tumbaji twenyi vamonenga vakwavo tumbaji kupwa vandumbwavo. Avalwezele ngwenyi: “Muvosena mwapwa muvandumbu.” (Mateu 23:8) Shikaho, asakile tumbaji twenyi vamuchano valizangenga mwavomwavo nakupwa tanga yayinene yakushipilitu.—Mateu 12:48-50; Yowano 13:35.

Vinjiho jaYehova veji kufwilanga kusolwela vakwavo zangi nakulikolelezeza kukukunguluka mwomwo vapwa tanga yamuchano yakushipilitu. (WavaHepeleu 10:24, 25) Vatu vavavulu vanawane nge kupwanga kukukunguluka kana cheji kuvakafwanga vahonese ukalu wavo.

Eva ambile ngwenyi, “Ngwapwile nasepa lyami muchikungulwilo uze evwishishilenga ukalu wami. Angwivwilililenga, nakungutangila visoneka, nakulombela nayami hamwe. Twapwilenga hamwe lwola lwosena. Angukafwile ngutufulenga vyuma vyapwilenga kumuchima wami mangana ngwivwenga hwo kumuchima. Echi changulingishile jino ngupwenga nguwakukingiwa.” Rachel ambile nawa ngwenyi, “Ngwawanyine ‘vamama navatata’ muchikungulwilo vaze vanguzangile chikuma nakungukafwa ngupwenga nguwakukingiwa.”

3. Zangenunga vakwenu nakuvasolwela likoji.

Kuzanga vakwenu nakuvasolwela likoji cheji kuzamisanga usepa. Yesu ambile ngwenyi: “Kuhana cheji kunehanga kuwahilila chikuma kuhambakana kutambula.” (Vilinga 20:35) Chikupu vene nge  natuzanganga chikuma vakwetu, kaha navatukafwa. Yesu alwezele tumbaji twenyi ngwenyi: “Pwenunga muvaka-kuhana, kaha vatu navakamihana nayenu nawa.”—Luka 6:38.

Nge natuzanga vakwetu, kaha navakiko navatuzanga, ngocho natupwa vakukingiwa. Mbimbiliya yamba ngwayo: “Zangi kayakumako.” (Wavaka-Kolinde 1, 13:8) María ambile ngwenyi, “Vyuma vimwe ngweji kushinganyekanga hali ami ivene kavyapwa vyamuchanoko. Kaha ngweji kuhonesanga vishinganyeka kana hakukafwa vakwetu nakuvulyamako ukalu wami. Kukafwa vakwetu cheji kungulingisanga ngusuuluke lwola lwosena.”

Vyuma vitatu tunashimutwila kavyapwa nge ‘hitufuta’ vaze navakumisa ukalu wetu wosena hahaze veneko. Oloze vinahase kutukafwa chikuma. Caroline ambile ngwenyi, “Oholyapwa ngwalimona jino kupwa nguwamulemu numba tuhu lwola lumwe ngweji kwivwanga lika nge kangwapwa nguwakukingiwako. Ngwatachikiza ngwami Kalunga anguzakama kaha nawa ngwatwama namasepa vavavulu vaze veji kungukafwanga.” Omu mukiko eji kwivwanga naRachel. Ambile ngwenyi, “Kakavulu ngweji kuhombanga chikuma, oloze vandumbwami veji kungukafwanga ngumone vyuma mujila yamwaza. Kaha nawa nguli naTata wamwilu uze ngweji kuhanjikanga nenyi makumbi osena. Echi cheji kungukafwanga ngupwenga nguwakukingiwa.”

Oloze kuli chuma chikwavo chize nachikatulingisa tukapwe vakukingiwa haya myaka yosena. Mbimbiliya yatulweza ngwayo kuli nakwiza kaye kakahya muze namukapwa mukingo. Yatufwelelesa ngwayo: “Navakatwamanga mutu himutu mwishi yamuvinyo wenyi, mwishi yamukuyu wenyi, kaha naumwe wauchi mwakavevwisa woma.” (Mika 4:4) Halwola kana kakweshi kukapwa mutu mwakatwivwisa woma nakutulemekako. Navyuma vyakutwivwisa woma vyosena vyakunyima ‘katweshi kukavyanuka chekako.’ (Isaya 65:17, 25) Kalunga naMwanenyi Yesu Kulishitu navakaneha “kwoloka chamwenemwene” chize “nachikaneha kuunda namukingo haya myaka yosena.” —Isaya 32:17.