VATU VAMWE VAMBA NGWAVO NDUMA. Ndotolo umwe ambile ngwenyi kuzachisa jindongi jamuMbimbiliya makumbi ano chinafwane nge kuzachisa mukanda umwe wasayasi vazachishilenga muji 1920 hakunangula vaka-shikola. Vatu vaze kavamona Mbimbiliya kupwa yayilemuko, vanahase kwamba ngwavo kachapwa chakutamo kuzachisa mukanda ukwechi jindongi jamwaka jamwakuzachishila kopyuta, hakujizachisa kukopyuta yayihyako. Mujila yikwavo vatu vamwe vashinganyeka ngwavo Mbimbiliya yaseka lyehi, kayeshi kuhasa kutwaminyina vatu makumbi anoko.

Mwomwo ika mutu mwasaka kumutwaminyina kujindongi jamuMbimbiliya yakushikulu mukaye kano kanazovoloka ngana mukuzachisa makina? Makumbi ano haInternet hali jipolongalamu najikeyala jajivulu, haze hatwama mijimbu yayihya najindongi jakukafwa vatu. Kaha nawa kuli jipolongalamu jajivulu jahaTV jize jeji kusololanga vatu vavavulu vaze valinangula chikuma, navatu vaze vaya puho mukaye, navaka-kusoneka mikanda, navitanda vize vyeji kulanjisanga mikanda yayivulu yize yinahase kukafwa vatu, najikapani jajivulu jize jeji kukundwizanga vyuma kana.

Hakuwana nge kuli vyuma vyavivulu vize vinahase kukafwa vatu makumbi ano, mwomwo ika vatu vatela kupendamina haMbimbiliya, mukanda wakushikulu uze vasonekele kafwe myaka 2,000 kunyima? Uno vatu vaze kavamona Mbimbiliya kupwa yayilemuko vahanjika mwakwoloka hakufwanyisa Mbimbiliya kumukanda wasayasi wamwaka chipwe kumukanda wajindongi jamwaka jamwakuzachishila kopyuta yayihya tahi? Vishinganyeka kana vyakuhenga. Vyuma yahanjika sayasi nakuzovoloka chamakina chili nakwalumukanga shimbu yosena, oloze vyuma vasaka vatu kavyalumukako. Vatu vavavulu vasaka kutachikiza mwalumbunukila kuyoya nakupwa vakuwahilila, nakupwa vakukingiwa, nakupwa nausoko wamwaza mutanga, nausepa wamwenemwene.

Numba tuhu Mbimbiliya yapwa himukanda wakushikulu, oloze walumbununa kanawa vyuma kana. Kaha nawa yamba ngwayo vayihwima kuli Tengi yetu. Yatwama najindongi jize jeji kututwaminyinanga mukuyoya chetu chosena nakutukafwa mwakulipikila naukalu. (WaChimoteu 2, 3:16, 17) MuMbimbiliya mwatwama nawa mazu akuhuhumuna aze eji kutukafwanga lwola lwosena, mazu kana kawasekako. Mbimbiliya yamba ngwayo: “Mazu aKalunga apwa amatonyi.”—WavaHepeleu 4:12

Uno vyuma yahanjika Mbimbiliya vyapwa vyamuchano tahi? Uno Mbimbiliya yaseka lyehi tahi, nyi himukanda uze ukwechi jindongi jize jinahase kututwaminyina makumbi ano? Yino mangazini yaKaposhi Kakutalila yili navihande vyakulipwila vize navimikafwa kukumbulula vihula kanevi.