ACHISHINGANYEKENU muli nakutambuka mujila naufuku. Numba tuhu kuli milima chikuma, oloze kamweshi kulizakamina ngwenu namujimbala mwomwo muli nalinongo lyakumunyika chikuma. Omu namumunyika linongo lyenu, namumona kanawa mujila muze muli nakutambuka, nakumona kuze munakuya.

Omu mukiko yapwa naMbimbiliya, vayifwanyisa kulinongo. Nganomu tunalinangula lyehi muvihande vinafumuho, Mazu aKalunga anahase kutukafwa tulipike naukalu wamukuyoya chahakumbi hakumbi, uze tweji kumonanga tuvosena mukaye kano kakuhuka. Oloze Mbimbiliya yahambakana linongo, mwomwo yeji kutumunyikilanga navyuma vyakulutwe nakutulingisa tutambuke mujila yize nayitusuulwisa nakupwa vakuwahilila. (Samu 119:105) Mujila muka?

Tushimutwilenu hajijila jivali jize Mbimbiliya yeji kutunangulanga kutalisa kuvyuma vize twatalilila kulutwe: 1 Yeji kutukafwanga tutachikize mwalumbunukila kuyoya, 2 Yeji kutukafwanga nawa tutachikize omu tunahase kutunga usepa wakukola naTengi yetu.

Mbimbiliya yeji kutukafwanga tutachikize mwakulipikila naukalu, kaha nawa yikwechi vyuma vyavivulu vyakutukafwa. Mbimbiliya kayatukolezeza tulizakamine havyuma vyamukuyoya kahako, mwomwo kuli vyuma vyavivulu vize twatela kutachikiza. Kulinga ngocho, nachitukafwa tutachikize mwalumbunukila kuyoya.

Chakutalilaho, Mbimbiliya yamba ngwayo: “Kuhana cheji kunehanga kuwahilila chikuma kuhambakana kutambula.” (Vilinga 20:35) Uno munakwanuka lwola mwakafwile mukwenu uze apwile nakusakiwa vyuma vyakulikafwa navyo mukuyoya tahi? Chipwe kwivwilila mukwenu omu apwile nakumilweza ukalu wenyi tahi? Kutala kamwevwile kuwaha hakumona mukwenu mwakafwile nasuuluka mukuyoya chenyi tahi?

 Tweji kuwahililanga chikuma hakupwa namuchima wakuhana chakuzeneka kufwelela ngwetu nayetu navakatuhana. Muka-kusoneka umwe ambile ngwenyi: “Chapwa chachikalu kulisuula kuhana vyuma vimwe kumutu uze unejiva ngwove keshi kukakuhana vimweko.” Shikaho nge natuhana vyuma vimwe chipwe kukafwa mutu uze keshi kukatuhana vyuma numba vimweko, kaha natutambula fweto. Echi nachisolola nge tuli nakuzakama navakwetu. Kaha nawa, nachisolola nge tuli nakuzachila hamwe naTengi yetu, uze eji kumonanga vilinga vyetu vyalikoji kupwa nge himukuli uze atela kutufweta. (Vishimo 19:17) Eji kumonanga vyuma vyamwaza tweji kulingilanga vakwetu kupwa vyavilemu, kaha nawa atushika kukatufweta kuyoya chahaya myaka yosena mupalachise hano hamavu. Chikupu vene evi hivyuma vyamwaza tunakutalilila kulutwe.—Samu 37:29; Luka 14:12-14. *

Mbimbiliya yatunangula ngwayo, tunahase kuwana kuyoya chamwenemwene kachi nge natulemesa Kalunga wamuchano Yehova. Mazu enyi atukolezeza tumwalisenga, nakumuvumbikanga, nakumwononokanga. (Muka-kwambulula 12:13; Kusoloka 4:11) Kulinga ngocho nachisolola nge tuli nakuzata mulimo waulemu, uze weji kwivwisanga Tengi yetu kuwaha. Mwomwo atulweza ngwenyi: “Pwako namangana, ungwivwisenga kumuchima kuwaha.” (Vishimo 27:11) Chikupu vene, nge natuzachisa jindongi jamuMbimbiliya hakusakula kanawa vyakulinga mukuyoya chetu, nachivwisa kuwaha Setu wazangi wamwilu. Mwomwo ika? Mwomwo eji kutuzakamanga, kaha nawa asaka tunganyale hakukavangiza jindongi jenyi. (Isaya 48:17, 18) Shikaho tufwilenu kwivwisa Kalunga kuwaha nakumulemesa mwomwo kakweshi vyuma vyeka tunahase kulinga vize navivwisa Kalunga kuwahako.

Mbimbiliya yatulweza tutunge usepa wakukola naTengi. Yamba ngwayo: “Pandamenu kuli Kalunga, kaha mwapandama kuli enu.” (WaYakova 4:8) Shimbu jimwe tunahase kuhuhwasana numba nge tunahase kupwa tumasepa jaTengi wakulitulaho. Oloze Mbimbiliya yatufwelelesa ngwayo nge ‘natutondatonda Kalunga’ kaha ‘natumuwana, mwomwo ikiye kapwa kwakusuku nayetu tuvosena mutu himutuko.’ (Vilinga 17:27) Jindongi jamuMbimbiliya jize jeji kutukafwanga tupwenga tumasepa jaKalunga japwa jajilemu chikuma. Mujila muka?

Achishinganyekenu, etu tuvosena mutu himutu katweshi kuhasa kulikinga kuli muka-kole wetu, kufwako. (Wavaka-Kolinde 1, 15:26) Oloze Kalunga apwa wahaya myaka yosena kulumbununa nge keshi kukafwako. Kaha asaka namasepa jenyi vayoyenga haya myaka yosena. Mbimbiliya yazachisa mazu amashi, amwaza, hakuvuluka vyuma asaka Yehova kuli vaze veji kumutondatondanga ngwayo: “Livwisenunga kuwaha kuyoya haya myaka yosena.”—Samu 22:26.

Uno munahase kutunga ngachilihi usoko wakwilila naKalunga? Twalenuho lika kulinangula vyuma yahanjika Mbimbiliya. (Yowano 17:3; WaChimoteu 2, 3:16) Itavilenu vamikafwe mwivwishise vyuma yanangula Mbimbiliya. Kaha nawa yatufwelelesa ngwayo, mutu himutu “alombenga lika Kalunga” amuhane mangana, kaha mwamuhanawo. * (WaYakova 1:5) Shikaho, fwilenu kukavangizanga vyuma munakulinangula nakwitavila Mazu aKalunga amitwaminyine ‘kupwa linongo kumahinji enu, mumunyi mujila yenu.’—Samu 119:105.