Rosie ambile ngwenyi: “Ngwalizakaminyinenga chikuma hakushinganyeka ukalu ngwapwilenga nawo kuhambakana muze wapwile ukalu kana.” Uno visoneka muka vyamukafwile? Chisoneka chimwe shina chaMateu 6:34 chize chamba ngwacho: “Shikaho kanda namulizakamina vyalikumbi lyahameneko, mwomwo likumbi lyahamene nalikapwa navyalyo vyakulizakamina. Likumbi hilikumbi lili naukalu walyo.” Rosie ambile jino ngwenyi mazu ahanjikile Yesu amukafwile alitwamine kulizakamina havyuma navisoloka likumbi lyahameneko. Ambile cheka ngwenyi: “Kangweshi nakulizakaminanga chikuma ngana muze chapwile hakavangako, mwomwo kangweshi nakushinganyekanga haukalu uze kanda uchisoloke chipwe uze kaweshi keza kasolokako.”

Yasmine naikiye atachikijile ngwenyi kulizakamina chenyi chapwile nakutohwelako lika. Kaha ambile cheka ngwenyi: “Kakavulu ngwalililenga, kaha makumbi amwe ngwahonenenga kusavala tulo. Ngwashinganyekele ngwami kulizakamina chikuma chinakunguhombesa.” Chisoneka muka chamukafwile? Chisoneka kana shina, chaWaPetulu 1, 5:7 chakwamba ngwacho: “Mbilenu kulizakamina chenu chosena hali ikiye, mwomwo amizakama.” Yasmine ambile ngwenyi: “Mukuhita chalwola ngwatwalileho lika kulomba kuli Yehova, kaha akumbulwile kulomba chami. Ngwevwile kwijiva nakumuchima hwo. Numba tuhu shimbu jimwe ngweji kulizakaminanga, oloze ngunatachikiza jino mwakukehesela ukalu kana.”

Mwanapwevo umwe walijina lyaIsabella ambile ngwenyi: “Ngunashinganyeka ngwami muchima wakulangisa wapwa wakusemuka nawo mwomwo natata atwama namuchima kanou. Ngweji kwecha kuzata milimo yayilemu nakuzachisa lwola lwami kukunoka nakutala TV. Chijililo kana chapwa chachipi mwomwo cheji kulingisanga mutu alizakamine chikuma nakuhona kuzata kanawa milimo yenyi.” Mazu amukafwile shina aze vasoneka hali WaChimoteu 2, 2:15 akwamba ngwavo: “Zata nangolo mangana upwenga umutu vevwila kuwaha kumeso aKalunga, umuka-kuzata wakuzeneka chuma chakwivwila sonyi.” Isabella ambile ngwenyi: “Kangwasakile kwivwisa Yehova sonyi mwomwo yakulangisa kuzata milimoko.” Echi chinamukafwe chikuma.

Omu mukiko chapwile nakuli Kelsey uze ambile ngwenyi: “Shimbu jimwe ngwapwilenga namulimo uze ngwasakiwile kuzata muwashiwashi, oloze ngwalangishilenga nakuuzata nge kunalitulu kalwola kakandende. Ngwalililenga, nakuhona kusavala tulo, nakulizakamina. Echi changwivwishilenga kupihya.” Kelsey vamukafwile kuli Kalunga hakutanga Mazu ahali Vishimo 13:16 haze vavuluka nge, “Mutu wakuzangama eji kuzatanga nachinyingi, oloze chileya eji kusololanga uleya wenyi.” Alumbunwine omu kushinganyekanga hachisoneka kana chamukafwile hakwamba ngwenyi: “Chapwa chamangana kushinganyekela chimweza mwakulingila vyuma shimbu kuchili lwola. Ngocho ngwatwama namukanda ngweji kunonekelanga chimweza milimo ngwatela kuzata, echi chinangukafwe mangana nguzatenga milimo chakuzeneka kulangisa.”

Kirsten ambile ngwenyi: “Omu malo etu afwile, lunga lyami angusezele navana vavandende vawana.” Jindongi muka jamuMbimbiliya jamukafwile? Chisoneka chamukafwile shina chaVishimo 17:17 chakwamba ngwacho: “Sepa wamwenemwene eji kuzanganga sepa lyenyi shimbu yosena kaha napu nge hindumbwenyi uze mwamukafwa mulwola lwavihuli.” Kirsten alikachile navatu vaze vazachila Yehova ngana mwaikiye. Uno vyuma muka vinafumumo? Ambile ngwenyi: “Masepa jami vangukafwile mujijila jakulisezaseza. Ngwawanyinenga masepa jami vamwe vananguhakila vyuma vyakulikafwa navyo, najitemo hachikolo. Kaha masepa vamwe vangukafwile navana vami mapapa katatu kutufwetela jimbongo hakwalukila mujizuvo jakufwetela. Kaha sepa lyami umwe angukafwile kuwana milimo. Masepa jami vapwilenga nayami lwola lwosena.”

Mahongo uze twavulukanga hakavanga naikiye alipikile naukalu wakwivwa uli. Ambile ngwenyi: “Ngwevwile kwijiva nge vatu vosena vanakutwama hamwe, kaha yami nguli ukawami, kaha nawa kangwasuulukileko. Chuma kana changwivwishilenga chikuma uli.” Chisoneka chize chamukafwile shina chaSamu 68:6 chamba ngwacho: “Kalunga eji kuhananga limbo kuli vaze vali uka wavo mangana vatwamengamo.” Ambile ngwenyi: “Ngwatachikijile jino ngwami chisoneka kana, kachalumbunwine limbo liveneko, oloze chalumbunwine limbo lyakushipilitu kulumbununa chihela chamwenemwene chize cheji kukinganga nakununga hamwe vatu vosena vaze vazanga Yehova. Chipwe ngocho, ngwatachikijile jino ngwami hakusaka ngupandame kuvatu vazanga Yehova, ngwatela chatete kupandama kuli Yehova. Ngocho chisoneka chaSamu 37:4 changukafwile, chamba ngwacho: ‘Ivwila kuwaha Yehova, kaha mwakuhana vyuma wafwila muchima wove.’”

Mahongo akukulwile hakwamba ngwenyi: “Ngwatachikijile jino ngwami, ngwatela kupandama chikuma kuli Yehova. Ikiye wamulemu chikuma. Ngocho ngwasonekele mukana wavyuma vize ngwafwililile kulinga navakwetu mangana ngulivwise kuwaha nakupwa namasepa vaze vazanga Yehova. Ngwalinangwile jino kumona vilinga vyavakwetu vyamwaza nakutwama navo kanawa.”

Chikupu vene, vatu vaze veji kuzachilanga Kalunga kavakupukako. Vinjiho jaYehova navakiko veji kulipikanga naukalu uze veji kumonanga vatu vosena. Oloze kulinangula Mbimbiliya chinavalingisa vakafweko vakwavo kweseka noho hakumina ngolo javo. Nachipwa chakwoloka kulikata namasepa kanava. Uno jindongi jamuMbimbiliya jinahase kukafwa ngachilihi vatu vaze vanakuhita muukalu uze kaweshi kuhasa kukuma oholyapwako, wakufwana nge kuviza musongo waunene nakulishona?