Mahongo, uze twavulukanga kumaputukilo achihande chino, amwene ngwenyi kulizakamina chenyi chamulingishile aputuke kufwila kunwa chikuma wala. Mbimbiliya kayakanyisa kunwa wala wamwesekeko, oloze yamba ngwayo: ‘Kanda mulikata navaka-kunwa chikuma vinyoko.’ (Vishimo 23:20) Kunwa wala mujila yakuhenga chinalingisanga vatu kuhona kulikangula kanawa kumujimba, nakulingisa vatu vahone kulivwasana kanawa, kaha mwaka himwaka vatu vavavulu veji kufwanga. Vatu vanahase kulihenda kuukalu kanou kachi nge navakavangizanga jindongi jamuMbimbiliya.

Omu mukiko alingile Mahongo. Oholyapwa eji kwambanga jino ngwenyi: “Wala kaweshi kuhasa kukumisa kulizakamina chamiko. Ngwazachishile mazu atwama hali Wavaka-Fwilipi 4:6, 7 akwamba ngwawo: ‘Kanda namulizakamina hachuma numba chimweko, oloze muvyuma vyosena . . . mulwezenunga Kalunga.’ Ufuku hiufuku, nge ngunaputuka kushinganyeka nakulizakamina, ngwalombelenga Yehova angukafwe. Ngwalwezelenga Yehova ukalu wami wosena wakufwana nge muchima wamatoto, nautenu, nakuhomba nakumulembelela angukafwe nguwane jijila jakuhoneselamo ukalu kana. Kaha kuheta nachimene ngwafwililenga kuhonesa ukalu wami. Echi changukafwile ngushinganyeka havyuma vyamwaza ngwapwile navyo nakuhona kushinganyeka havuma vize kangwapwile navyoko. Kufumaho ngwasakwile kwecha kunwa wala, mwomwo ngwawanyine kuunda chamwenemwene chize kangweshi kuhasa kusezako.”

Ujila ukiko weji kulingisanga vatu valizakamine chikuma nakuhomba. Oloze jindongi jamuMbimbiliya jinahase kutukafwa tulihende kuukalu uze unahase kutulingisa tulinge ujila wakufwana nge kusapula chaseya nakutalanga mivwimbimbi yavatu vali uselesele. Mukweze walunga umwe walijina lyaSamuel ambile ngwenyi: “Chapwa chachashi kuputuka kusapula namutu wausonyi weka. Shimbu jimwe mapwevo veji kungusengelelanga numba tuhu kangwavazangileko. Echi cheji kungulingisanga mangana nguputuke kusapula nawo.” Samuel atachikijile jino ngwenyi apwilenga naukalu wakusapula lwola lwosena, nahalwola luze kajinyine kulinga ngochoko. Echi chamulingishile jino atwaleho lika kusapula navatu vausonyi weka. Chipwe ngocho tato kaneyi yamwivwishilenga chikuma kupihya. Ngocho ambile jino ngwenyi: “Chapwile chaponde, mwomwo tato kaneyi yeji kulingisanga mutu afwile kulinga ujila.”

Samuel atangile chihande chahanjika havakweze chize chatwama hakeyala ya jw.org. Kaha ashinganyekele hamazu atwama hali Vishimo 20:11, akwamba ngwawo: “Mwana [chipwe “mwana walunga” kwinyikila chamwishi] veji kumutachikijilanga kuvilinga vyenyi, numba nge vyamwaza, vyakwoloka nyi chiku.” Uno mazu kana amukafwile ngachilihi? Samuel ejivile ngwenyi kusapula chaseya namutu wausonyi weka kachapwile chakwolokako. Ambile cheka ngwenyi: “Ngunatachikiza jino ngwami mukweze uze mwasapula chaseya namutu wausonyi weka eji kupwanga navilinga vyavipi vize navimulingisa akahone kukatwama kanawa namuka-mahyenyi. Ngwaputukile kushinganyeka hakupihya mwakevwa pwevo nangukambata kulutwe, kachi nge mwakangumona nguli nakusapula chaseya napwevo weka. Numba tuhu kusapula chaseya chapwa chachashi, oloze kachapwa chakwoloka kulinga ngochoko.” Samuel alumwine vishinganyeka vyenyi. Kulihenda kukusapula chaseya chamukafwile mangana alihenda kuujila.

Antonio apwile muponde yayinene yakusaka kulinga ujila: Apwilenga nakutala mivwimbimbi yavatu vali uselesele. Numba tuhu ambachile pwevo uze azangile chikuma, oloze atwalilileho lika kupwa natato yakutalanga mivwimbimbi yavatu vali uselesele. Ambile ngwenyi kushinganyeka hamazu atwama hali WaPetulu 1, 5:8 chamukafwile chikuma. Mazu kana amba ngwawo: “Lamenunga uhashi wenu wakushinganyeka kanawa, tonenunga. Muka-kole wenu Liyavolo eji kuhitangana nge ndumba wakutahwoka, nakutondatonda weshowo mwawana amulye.” Antonio ambile ngwenyi: “Mivwimbimbi yauselesele yatwama mukaye kosena, ngocho mutu eji kushinganyekanga lika hamivwimbimbi mwatala. Mazu amuchisoneka angukafwile ngushinganyeke havyuma vize vinahase kungwingisa muvyeseko. Ngwatachikijile jino ngwami, ngwatela kulihenda washi kukutala mivwimbimbi kana mwomwo yafuma kuli Satana. Ngwejivile nawa ngwami Yehova ikiye kaha nahase kungukafwa ‘ngulame uhashi wami wakushinganyeka kanawa, nakupwa nguwakutona mangana ngufungulule vyeseko, nakukinga vishinganyeka vyami, namuchima wami naulo wami.” Antonio awanyine jijila jakumukafwa, ngocho asezele tato yayipi. Echi chinamukafwe alihende nakuukalu wakulisezaseza.

Chikupu vene Mbimbiliya yatwama najindongi jakutukafwa tulihende kuukalu wakulisezaseza. Nyi ngachilihi ukalu uze tunakulipika nawo? Tutalenu jino omu Mazu aKalunga nawatukafwa tukumise ukalu kana.