Rose ambile ngwenyi: “Ngwatwama namusongo ngwasemuka nawo uze weji kunguvijisanga chikuma. Kuyoya chami chatwama muukalu chikuma.” Ngocho, shimbu jimwe alizakaminyine chikuma mwomwo ukalu kana wamulingishile ahone kulinangulanga Mbimbiliya nakuhona kulinga vyuma vize atela kulinga muka-Kulishitu. Oloze mazu ahanjikile Yesu amukafwile chikuma aze atwama hali Mateu 19:26 ngwawo: “Kuli Kalunga vyuma vyosena vyapwa vyavyashi.” Rose ambile ngwenyi, kwatwama jijila jajivulu jakulinangwilamo. Hakuwana nge kutanga chamukaluhwilile mwomwo yakuviza chenyi, ngocho aputukile jino kwivwilila kuvihande vyakukopa, navyamumikanda yahanjika haMbimbiliya. * Ambile ngwenyi: “Chakuzeneka vyuma kanevi, kachi kangwahashile kupwa nausoko wamwaza naKalungako.”

Omu Rose ahombelenga nakuhona kulinga vyuma vize ashinganyekele kulinga, mazu ahali Wavaka-Kolinde 2, 8:12 amukolezezelenga chikuma. Mazu kana amba ngwawo: “Kachi nge chatete muchima wakulizanga kulinga kuuli, kaha Kalunga mwachitavila kweseka navize ali navyo mutu, keshi nge kweseka navize nazeneka kupwa navyoko.” Mazu kana anukishile Rose nge Kalunga eji kuwahililanga havyuma eji kulinganga kweseka noho hakumina ngolo jenyi.

Mahongo uze twavulukanga hakavanga, ambile ngwenyi: “Omu mwanami wapwevo wamyaka yakusemuka 18 afwile, ngwevwile nge kangweshi kuhasa kutwalaho kuyoyako. Vyuma vyosena vyalumukile mukuyoya chami.” Mazu ahanjikile muka-kwimba jisamu kuli Kalunga aze atwama hali Samu 94:19 amuvendejekele chikuma, aze amba ngwawo: “Omu ngwalizakaminyine chikuma, Ove wanguvendejekele nakunguunjisa muchima.” Ambile cheka ngwenyi: “Ngwalombele kuli Yehova angukafwe mangana ngulinge vyuma vize navihasa kungukafwa kweseka naukalu ngwapwile nawo.”

Ngocho aputukile kuzata mulimo wakufwila kukafwa vatu hawana wakanyombo. Kaha kutwala muze, alifwanyishile ivene kusonekeso yaulombo veji kuzachisanga vanyike hakufunjejeka, numba tuhu yinapazwojoka oloze tuvihanda twayo tunahase kuzata mulimo wakufunjejeka. Numba tuhu ukalu wenyi wamulingishile evwenga nge wamokomoko, oloze atachikijile ngwenyi nahase kukafwa vakwavo. Ngocho ambile ngwenyi: “Omu ngwazachishilenga jindongi jamuMbimbiliya mangana ngukafwe vatu ngwapwile nakunangula Mbimbiliya, ngwevwile nge Yehova apwile nakungukolezeza nakunguvendejeka.” Asonekela majina avatu vavuluka muMbimbiliya vaze vapwile muushona. Ngocho awanyine nge “vatu kana vapwile nakulombanga kuli Kalunga.” Kaha nawa ngwenyi: “Mutu atela kutanganga Mbimbiliya, numba yimukafwe nge ali muukalu.”

Kulinangula Mbimbiliya chakafwile Mahongo ashinganyeke havyuma vyakulutwe keshi vyakunyimako. Kushinganyeka hamazu alutalililo atwama hali Vilinga 24:15 eji kumuvendejekanga chikuma. Mazu kana amba ngwawo: “Nakukapwa kusanguka chavaka-kwoloka navaka-kuhenga.” Uno chuma muka chalingisa Mahongo afwelele chikupu ngwenyi Yehova mwakamusangwila mwanenyi? Ambile ngwenyi: “Ngweji kushinganyekanga kukamona mwanami omu navakamusangula halwola atongola Yehova, kaha nawa ngweji kumonanga nge tuli mulitepa lyetu nakumuzanga ngana muze ngwamuzangile hakusemuka chenyi.