Vatu vavavulu veji kwambanga ngwavo vafwelela Kalunga. Oloze nge namuvahulisa ngwenu, Kalunga ikiye iya? Veji kukumbululanga mujijila jakulisezaseza. Vatu vamwe nawa ngwavo, Kalunga apwa muka-kuyula wamupi uze eji kuzangamisanga vatu mwomwo yavilinga vyavo vyakuhenga. Veka nawa ngwavo, apwa wazangi, muka-kukonekela chamokomoko nakala vyuma vyakuhenga navalinga vatu. Chipwe ngocho, vakwavo nawa ngwavo Kalunga atwama kwakusuku kaha nawa katuzakamako. Vishinganyeka kanevi vinalingisa vatu vavavulu vashinganyeke ngwavo, katweshi kuhasa kutachikiza Kalungako.

Uno chapwa chachilemu kutachikiza Kalunga tahi? Eyo, chapwa chachilemu. Kutachikiza kanawa Kalunga, cheji kutukafwanga twijive mwalumbunukila kuyoya chetu. (Vilinga 17:26-28) Nge namupandama chikuma kuli Kalunga kaha mwamizanga chikuma nakumikafwanga. (WaYakova 4:8) Kupwa nachinyingi chakutachikiza Kalunga, nachimikafwa mukayoye haya myaka yosena.—Yowano 17:3.

Munahase kutachikiza ngachilihi Kalunga? Achishinganyekenu hali sepa lyenu uze mwatachikiza chikuma. Usepa wenu waputukile ngachilihi? Mwavangililile kutachikiza lijina lyamutu kana, navilinga vyenyi, navyuma ahunga navize azanga, navize nalingi oholyapwa, navize ali nakufwila kukalinga mukuyoya chenyi navyuma vyeka nawa. Evi vikiko vyuma vyamilingishile mupandame kuli mutu kana nakupwa sepa lyenu.

Chochimwe nawa, tunahase kutachikiza kanawa Kalunga hakulinangula vyuma vinakavangizaho:

• KALUNGA LIJINA LYENYI IKIYE IYA?

• KALUNGA ATWAMA NAVILINGA MUKA?

• VYUMA MUKA NAMILINGILA KALUNGA?

• VYUMA MUKA MWAKAMILINGILA KALUNGA KULUTWE?

• UNO KUTACHIKIZA KALUNGA NACHIMIKAFWA NGACHILIHI?

Yino mangazini vanayisoneka mangana yikumbulule vihula kana. Vihande vilimo navimikafwa mulinangule omu apwa Kalunga navyuma mwakalinga kulutwe omu namulikata nenyi usepa.