Nge munakusaka kutachikiza kanawa mutu, chuma chatete mweji kulinganga shina kumuhulisa ngwenu, “Lijina lyove yove iya?” Kachi nge namuhulisa Kalunga echi chihula, kaha mwakumbulula ngwenyi ika?

“Ami yami Yehova. Eli likiko lijina lyami.”—Isaya 42:8.

Kalunga amona lijina lyenyi kupwa lyalilemu. Kalunga alilukile ivene lijina, kakweshi mutu amulukilelyoko. Kaha Yehova ambile ngwenyi: “Eli likiko lijina lyami haya myaka yosena, kaha lijina kaneli likiko navakangwanukilangaho kuchisemunwino hichisemunwino.” (Kulovoka 3:15) MuMbimbiliya lijina lyaKalunga lyasolokamo mapapa kakavulu kuhambakana jivulukiso jakufwana nge Wangolo Josena, naTata, naMwata chipwe Kalunga. Kaha nawa lyahambakana namajina avatu vakufwana nge Apalahama, naMose, naNdavichi naYesu. Shikaho, Yehova ivene asaka vatu vatachikize lijina lyenyi. Mbimbiliya yamba ngwayo: “Vatu vatachikize ngwavo, ove ukwechi lijina lyove yove Yehova, yove kaha uka wove wapwa uWakulitulaho Chikuma hamavu hosena.”—Samu 83:18.

Yesu amona lijina kana kupwa lyalilemu. Mukulomba chakwamba ngwavo, Ove Setu chipwe Kulomba chaMwata, Yesu alwezele vaka-kumukavangiza valombenga kuli Kalunga namazu akwamba ngwavo: “Lijina lyove lipwenga lyajila.” (Mateu 6:9) Yesu alombele kuli Kalunga ngwenyi: “Ove Tata, tohwesa lijina lyove.” (Yowano 12:28) Yesu atohwesele lijina lyaKalunga mukuyoya chenyi chosena, kahechi chamulingishile alombe ngwenyi: “Ami ngunalingisa lijina lyove valitachikize, kaha nangukalilingisa vakalitachikize nawa.”—Yowano 17:26.

Vatu vaze vatachikiza Kalunga vamona lijina lyenyi kupwa lyalilemu. Vatu jaKalunga kushikulu, vatachikijile ngwavo mukingo wavo nakuyovoka chavo vyapendaminyine halijina lyaKalunga lyakulipwila. “Lijina lyaYehova linapu kaposhi kakukola. Muka-kwoloka mwachinyinamo, kaha navamukinga.” (Vishimo 18:10) “Weshowo mwasanyika halijina lyaYehova navakamulwila.” (Yowele 2:32) Mbimbiliya yasolola ngwayo, lijina lyaKalunga lyahandununa vatu vaze veji kumuzachilanga navaze kavamuzachilako. “Vatu veka naveka vosena navakatambukanga  mutu himutu mulijina lyakalunga kenyi, oloze etu natukatambukanga mulijina lyaKalunga ketu Yehova haya myaka namyaka.”—Mika 4:5; Vilinga 15:14.

Lijina kana lyasolola Kalunga mujila yakulipwila. Vaka-kulinangula vavavulu vakukulula ngwavo lijina lyaKalunga lyalumbununa ngwalyo, “Eji kulingisanga vyuma kupwako.” Yehova ahanjikile ulumbunwiso walijina lyenyi omu alwezele Mose ngwenyi: “Nangupwa Mweshomwo Ngunasakula Kupwa.” (Kulovoka 3:14) Ngocho lijina lyaKalunga kalyalumbununa Kalunga kupwa Tengi uze atengele vyuma vyosena kahako, oloze lyalumbununa navyuma vyeka vyavivulu. Lijina lyenyi lyasolola ngolo atwama najo jakupwa kala mweshomwo nasake ivene nakuvyuma atenga mangana atesemo kujina chenyi. Numba tuhu Jivulukiso jinahase kulumbununa chihela atwama nacho Kalunga, nawata nangolo, oloze lijina lyenyi Yehova likiko kaha lyasolola omu apwa nomu nasake kupwa.

Lijina lyaKalunga lyasolola zangi atwama nayo hali etu. Ulumbunwiso walijina lyenyi wasolola nge azanga chikuma vyuma atenga kuhakilako nayetu vene. Hakuwana nge Yehova Kalunga nalingisa lijina lyenyi valitachikize, ngocho asaka etu twijive lijina lyenyi. Tuyokutuyoku nawa, atulwezele lijina lyenyi shimbu kanda etu tumuhulise atulwezelyo. Chikupu vene Kalunga asaka etu tumutachikize kupwa mutu nahenyi uze tunahase kupandamako.—Samu 73:28.

Kuzachisa lijina lyaKalunga cheji kusololanga nge twamuzanga. Chakutalilaho munahase kulweza mutu uze namusaka apwenga sepa lyenu amisanyikenga kuzachisa lijina lyenu. Jino namwivwa ngachilihi nge mutu kana kasakile kuzachisa lijina lyenuko? Mukuhita chalwola munahase kuputuka kuhuhwasana numba nge mutu kana ali nakusaka kupandama kuli enu nyi chiku. Omu mukiko chapwa nakuli Yehova. Shikaho, alweza vatu lijina lyenyi nakuvakolezeza valizachisenga. Nge natuzachisanga lijina lyenyi, kaha natusolola nge tunakufwila kupandama kuli ikiye. Shikaho, eji kumonanga ‘vaze veji kushinganyekanga halijina lyenyi [chipwe veji ‘kulimonanga kupwa lyalilemu,’ kwinyikila chamwishi].’—Malaki 3:16.

Kulinangula lijina lyaKalunga yapwa hijila yimwe yakumutachikijilamo. Oloze katwatela kukumina hakulinangula lijina lyenyi kahako. Oloze twatela kufwila kutachikiza kanawa mwenya lijina kana. Twatela kutachikiza omu apwa.