Tunalinangula vyavivulu, ngocho tunatachikiza jino mwakukumbulwila chihula chino, Kalunga Ikiye Iya? Mbimbiliya yinatulweze ngwayo Kalunga lijina lyenyi ikiye Yehova, kaha havilinga vyosena atwama navyo zangi yikiko yapwa yayilemu chikuma. Tunalinangula nawa vyuma vyavivulu vize atulingila navize mwakatulingila kulutwe. Numba tuhu kuli vyuma vyeka vyavivulu twatela kulinangula hali Kalunga, oloze munahase kufwila kutachikiza kutokwa chatwama hakulinga ngocho.

Yehova ashika ngwenyi ‘kachi nge namumutondatonda, kaha namumuwana.’ (Mijimbu 1, 28:9) Achishinganyekenu wana waulemu namukatambula omu namutondatonda Kalunga nakumutachikiza, kulumbununa kupwa “nausepa wakukola naikiye.” (Samu 25:14) Uno kulikata usepa naikiye nachimikafwa ngachilihi?

Kuwahilila chamwenemwene. Yehova vamuvuluka ngwavo apwa ‘Kalunga wakuwahilila.’ (WaChimoteu 1, 1:11) Shikaho, kupandama kuli Yehova nakulondezeza vilinga vyenyi nachimilingisa mupwenga vakuwahilila. Kahechi nachimikafwa mupwenga vakulikangula muvishinganyeka nakumujimba namuvyuma vyeka nawa. ( Samu 33:12) Kaha nawa namupwa nachiyoyelo chamwaza mangana mulihende kuvilinga vize navyenyeka kuyoya chenu, nakumikafwa mupwenga natato yamwaza nakutwama kanawa navakwenu. Echi nachimikafwa mwitavile mazu ahanjikile muka-kwimba jisamu ngwenyi: “Chinapu chamwaza kuli ami kupandama kuli Kalunga.”—Samu 73:28.

Kutuzakama. Yehova ashika vangamba jenyi ngwenyi: “Nangukulweza mangana oku nguli nakukutala.” (Samu 32:8) Chikupu vene, Yehova eji kuzakamanga vangamba jenyi nakukafwa mutu himutu kweseka navyuma mwasaka. (Samu 139:1, 2) Ngocho, nge namupandama kuli Yehova, kaha namumona omu eji kumikafwanga.

Vyuma vyamwaza kulutwe. Numba tuhu Yehova Kalunga anakutukafwa tupwenga vakuwahilila nakusuuluka mukuyoya chetu oholyapwa, oloze kulutwe mwakatuhana vyuma vyamwaza chikuma. (Isaya 48:17, 18) Mbimbiliya yamba ngwayo: “Echi chikiko kuyoya chahaya myaka yosena, kukutachikiza ove Kalunga umwe kaha wamuchano, nayou nawa watumine, Yesu Kulishitu.” (Yowano 17:3) Elu lutalililo atuhana Kalunga lunapu nge chikungo chakwimikisa wato chize chinahase kutukafwa ‘tuzame mbe.’—WavaHepeleu 6:19.

Evi vyuma vyavindende tunashimutwila vinapu vyavilemu mwomwo navimikafwa mutachikize kanawa Kalunga nakupwa nausoko wamwaza naikiye. Tunakumilomba muhanjike nakala Chinjiho chaYehova chipwe kuya ha jw.org mangana muwane mijimbu yikwavo yize nayimikafwa.