Nge muli nakuhita muukalu, kaha namusaka sepa lyenu uze mwazanga chikuma amikafwe. Chaluvinda, vatu vamwe vamba ngwavo Kalunga kapwa sepa lyavoko, mwomwo vashinganyeka nge keshi nakuvakafwako. Kuhanjika muchano, Kalunga natulingila vyuma vyavivulu, kaha nawa kalinwomu ngana mwafumisako ukalu nakuyanda vali nakumona vatu makumbi ano. Vyuma muka mwakamilingila Kalunga kulutwe?

Kalunga mwakafumisako vilinga vyakuhuka vyosena hakunongesa uze eji kuvinehanga. Mbimbiliya yavuluka hatoma ou eji kunehanga vilinga kana ngwayo: “Kaye kosena katwama mumavoko ayauze wakuhuka.” (WaYowano 1, 5:19) Mutu “wakuhuka” vanavuluka hano shina uze avulukile Yesu ngwenyi, “muka-kuyula kano kaye,” Satana Liyavolo. (Yowano 12:31) Satana ikiye nalingisa vatu vamone ukalu wauvulu ngana hano hamavu. Uno vyuma muka mwakamilingila Kalunga kulutwe?

Kalunga mwakazachisa Mwanenyi Yesu Kulishitu “akahase kwenyeka uze atwama nangolo jakuneha kufwa, ikiye vene Liyavolo.” (WavaHepeleu 2:14; WaYowano 1, 3:8) Mbimbiliya yahanjika hatoma nge Liyavolo atachikiza ngwenyi, “ali kaha nakashimbu kakandende” shimbu kanda vamunongese. (Kusoloka 12:12) Kalunga kalinwomu afumiseko nawa vatu vaze veji kunehanga vilinga vyakuhuka. —Samu 37:9; Vishimo 2:22.

Omu Tengi yetu mwakafumisa upi wosena hamavu, mwakatesamo jino vyuma ajina kulingila vatu nakuwahisa mavu. Uno vyuma muka twatalilila kulutwe?

Kuunda chakwilila namukingo. “Vavavwovu navakaheta mavu, kaha navakalivwisa kuwaha kuunda chamwenemwene.”—Samu 37:11.

Vyakulya vyamwaza navikalisala. “Hamavu nahakapwanga mbuto jamanona jakulisala.”—Samu 72:16.

Jizuvo jamwaza namilimo yakusuulwisa. “Navakatunga jizuvo javo, kaha navakatwamangamo, navakalimanga mande amivinyo, kaha navakalyanga mihako yayo. . . . Vaze ngwasakula navakalivwisanga kuwaha milimo yamavoko avo.”—Isaya 65:21, 22.

Kutala muli nakusaka kumona vyuma kana tahi? Chikupu vene, kalinwomu tulivwise kuwaha vyuma kanevi lyacha lyakameneka.

Etu tuvosena tweji kuvizanga nakufwisa, oloze omu keshi mukiko nachikapwa kulutweko. Kalunga mwakazachisa ndando yakusokola yaYesu, mangana “weshowo mwamufwelela vakahone kumunongesa, oloze akapwe nakuyoya chahaya myaka yosena.” (Yowano 3:16) Kulumbununa vyuma muka?

Misongo navakayifumisako. “Mulifuchi lize kamweshi kukapwa mutu mwakamba ngwenyi: ‘Nguli nakukola.’ Mwomwo vatu vaze navakatwamangamo navakavakonekela jishili javo.”—Isaya 33:24.

Vatu kaveshi kukafwanga chekako. “Mwata Wakulitulaho Yehova mwakamina kufwa haya myaka yosena, mwakahunda masoji kumeso avatu vosena.”—Isaya 25:8

Vatu navakayoyanga haya myaka yosena. “Wana uze Kalunga eji kuhananga ukiko vene kuyoya chahaya myaka yosena kuhichila muli Kulishitu Yesu Mwata wetu.”—Wavaka-Loma 6:23.

Vafu navakavasangula. “Nakukapwa kusanguka chavaka-kwoloka navaka-kuhenga.” (Vilinga 24:15) Ngocho, navakiko navakatokwela muwana waKalunga wandando yakusokola.

Uno Kalunga mwakatesamo ngachilihi vyuma vyosenevi?

Kalunga mwakatesamo vyuma ajina kukalingila vatu nakuwahisa mavu kuhichila mufulumende yenyi yamwilu yize navakayula kuli Yesu uze vatongola kupwa muka-kuyiyula. (Samu 110:1, 2) Yapwa fulumende chipwe ngwetu wangana uze Yesu anangwile tumbaji twenyi valombenga ngwavo: “Ove Setu uli mwilu, . . . Wangana wove wizenga.”—Mateu 6:9, 10.

Wangana waKalunga naukayula hano hamavu nakufumisako kuyanda chosena. Ou Wangana wapwa hifulumende yamwenemwene. Echi chikiko chalingishile Yesu ambululenga “mujimbu wamwaza waWangana” omu apwile hano hamavu nakulweza tumbaji twenyi valingenga mwomumwe.—Mateu 4:23; 24:14.

Yehova Kalunga azanga chikuma vatu, ngocho ashika kukavalingila vyuma vyosena vyamwaza. Uno echi kacheshi nakumilingisa mufwile kumutachikiza kanawa nakufwila kupandama kuli ikiye tahi? Kutokwa muka namukamona kachi nge namusaka kutachikiza Kalunga nakupandama kuli ikiye? Chihande chinakavangizaho chinalumbununa kanawa.