Nge muli nakusaka kutachikiza kanawa mutu, chapwa chamwaza kutachikiza vyuma nalingi naukalu nahichimo. Chochimwe nawa, nge muli nakusaka kutachikiza kanawa Kalunga, mwatela kutachikiza vyuma nalingi. Nge namulinga ngocho, kaha namwijiva omu vyuma alingile kunyima vinakutukafwa oholyapwa nomu navikatukafwa kulutwe.

Yehova Kalunga ikiye Tengi Wamunene, kaha “vilinga vyenyi evi vahona kumona, nangolo jenyi jahaya myaka yosena nauKalunga wenyi, vyasoloka hatoma kufuma vene kukutenga chakaye nakuya kulutwe, mwomwo vavimwena kuvyuma atenga.” (Wavaka-Loma 1:20) “Kalunga ikiye atengele mavu nangolo jenyi, Ikiye azamishile mavu namangana enyi, Ikiye nawa akanyikile lilu mukunangakana chenyi.” (Yelemiya 10:12) Chikupu vene, vyuma atenga Kalunga vyasolola hatoma nge atuzanga chikuma.

Achishinganyekenu mujila Kalunga atengelelemo vatu, avatengele “muchifwanyisa chenyi ivene.” (Kuputuka 1:27) Echi chalumbununa nge atuhana lisesa lyakusolola vilinga vize atwama navyo. Atutenga namuchima wakufwila kutachikiza omu eji kumonanga vyuma najindongi jenyi. Shikaho, omu tuli nakufwila kuyoya kweseka najindongi kaneji, tweji kupwanga vakuwahilila nakutachikiza kanawa mwalumbunukila kuyoya. Twawahilila chikuma hakutuhana lisesa lyakutunga usoko naikiye.

Mavu nawa asolola hatoma nge Kalunga atuzanga chikuma. Kaposetolo Paulu ahanjikile ngwenyi, Kalunga ‘ahanyine unjiho hakulinga mwamwaza, hakutuhana vula kufuma mwilu, najingonde jakwima mihako, nakutuhana vyakulya nakusuulwisa michima yetu.’ (Vilinga 14:17) Kalunga atuhana vyuma vize navitukafwa tukayovoke. Atuhana vyuma vyakulisezaseza vize vyeji kutulingisanga tulivwise kuwaha kuyoya. Chipwe ngocho, kuli vyuma vyeka vyavivulu vize Kalunga ajinyine kutulingila.

Yehova atengele mavu mangana vatu vatwamengaho haya myaka yosena. Mbimbiliya yamba ngwayo: “Mavu awahana kuli vana vavatu,” kaha nawa ngwayo, “kawatengele chawanako, oloze awatengele ngwenyi hatwamenga vatu.” (Samu 115:16; Isaya 45:18) Uno vatu muka vatela kutwama hano hamavu,  kaha myaka yingahi? “Vaka-kwoloka navakaheta mavu, kaha navakatwamangaho haya myaka yosena.”—Samu 37:29.

Yehova atengele Alama naEve, valunga napwevo vakulivanga nakuvahaka mupalachise hano hamavu ‘mangana vayilimenga nakuyilama.’ (Kuputuka 2:8, 15) Kalunga avahanyine milimo yivali yayilemu chikuma. Avalwezele ngwenyi: “Semenunga muvule chikuma, muzalise hamavu, nakuwalamanga.” (Kuputuka 1:28) Shikaho, Alama naEve vapwile nalutalililo lwakuyoyela hano hamavu haya myaka yosena. Chaluvinda, valikangile kuli Kalunga nakuhona jino kupwa hamukana wavatu ‘vakwoloka’ vaze “navakaheta mavu.” Nganomu natushimutwila, kulikanga chavo kachalingisa Kalunga ahone kulinga vyuma ajina kulingila vatu chipwe mavuko. Chatete, tuvangilenu kushimutwila vyuma vize nalingi Kalunga.

Mbimbiliya vayivuluka nawa ngwavo, Mazu aKalunga. Mwomwo ika Yehova atuhanyina Mbimbiliya? Mangana tulinangule hali ikiye. (Vishimo 2:1-5) Mbimbiliya kayakumbulula vihula vyosena vize vatu veji kuhulisanga hali Kalungako. Kaha nawa, kakweshi mukanda weka wakumbulula vihula kanako. (Muka-kwambulula 3:11) Chipwe ngocho, vyuma vyosena vize vyatwama muMbimbiliya vyeji kutukafwanga tutachikize omu apwa Kalunga. Jila Kalunga eji kumwenangamo vatu yatukafwa tutachikize omu apwa. Kaha nawa, twatachikiza vatu vaze azanga navaze ahunga. (Samu 15:1-5) Twatachikiza jila yakumulemeselamo azanga, nomu eji kumonanga vilinga vyaujila namuchima wakufwila luheto. Mbimbiliya yasolola hatoma vilinga vyaYehova kuhichila mumazu ahanjikilenga Mwanenyi Yesu Kulishitu navilinga vyenyi.—Yowano 14:9.

Chuma chikwavo chalingisa Yehova atuhane Mazu enyi Mbimbiliya, shina asaka tupwenga vakuwahilila nakutachikiza ovyo tweji kuyoyelanga. Yehova atulweza kuhichila muMbimbiliya omu tunahase kupwa vakuwahilila mutanga, namwakusuulukila navyuma twatwama navyo nomu tunahase kukehesako kuhomba. Nganomu tunashimutwila lyehi mumangazini yino, Mbimbiliya yakumbulula vihula vyavilemu vyamukuyoya vyakufwana nge: Mwomwo ika kuyanda chinavulila ngana? Vyuma muka twatalilila kulutwe? Mbimbiliya yalumbununa nawa vyuma nalingi Kalunga mangana akatesemo vyuma ajina.

Chamuchano vene, Mbimbiliya yapwa himukanda waKalunga wakulipwila chikuma. Numba tuhu Mbimbiliya vayisonekele hamyaka yakuhambakana 1,600 kumalunga 40, oloze yahanjika mwomumwe, mwomwo Kalunga ikiye mwenyayo. (WaChimoteu 2, 3:16) Mbimbiliya yalihandununa namikanda yeka yakushikulu mwomwo yinayovokanga hamyaka yayivulu, ngana muze vasolola mujimanyusikilipiti jaMbimbiliya jakushikulu. Kaha nawa, Mbimbiliya yinayovokanga lika chamokomoko nakukanyisa vatu kuyalumuna nakuyipangila kuvatu mangana vayitange. Chipwe ngocho, vatu vavavulu vali najiMbimbiliya kaha nawa himukanda uze vanalumuna chikuma mumakumbi ano. Jila yinayovokelangamo Mbimbiliya yasolola hatoma nge “Mazu aKalunga ketu nawelilanga haya myaka yosena.”—Isaya 40:8.

Kalunga atushika kukatesamo vyuma ajina. Ngana muze tunashimutwila lyehi, Kalunga ajinyine ngwenyi vatu vatwamenga haya myaka yosena hano hamavu. Chaluvinda, omu Alama alikangile kuli Kalunga, alingile shili yize yalingishile ahone kuyoya haya myaka yosena hano hamavu hohamwe navana venyi. “Nge muze shili yengilile mukaye kuhichila muli mutu umwe nakufwa nawa kuhichila mushili, ngocho kufwa chatanda kuli vatu vosena mwomwo vosena valingile shili.” (Wavaka-Loma 5:12) Kulikanga chaAlama chalingishile vatu vashinganyeke ngwavo, Kalunga keshi kukatesamo vyuma ajinako. Uno Yehova alingile ngachilihi?

Vilinga vyaYehova vyasolola hatoma omu apwa. Numba tuhu asopesele Alama naEve hakulikanga chavo, oloze awahishile vyuma mangana vana vavo vakapwe nalutalililo kulutwe. Yehova azachishile mangana hakusopesa Alama naEve, kaha avalwezele jila mwakakumishilamo ukalu vanehele. (Kuputuka 3:15) Kalunga asolwele nge mwakafumisako shili nakufwa kuhichila muli mwanenyi Yesu Kulishitu. Uno kulinga ngocho chasakiwile ika?

Hakusaka mangana Yehova asokole vatu kukulikanga chaAlama, atumine mwanenyi Yesu kwiza hano  hamavu nakunangula vatu mwakuyoyela kanawa “nakuhana mwono wenyi kupwa ndando yakusokola vavavulu.” * (Mateu 20:28; Yowano 14:6) Yesu atelemo kupwa ndando yakusokola mwomwo apwile wakukupuka ngana muze apwile Alama. Yesu kalikangile ngana mwaAlamako, mwomwo ashishikile palanga nakukufwa chenyi. Hakuwana nge Yesu katelemo kufwako, ngocho Yehova amusangwile mangana akayoyele mwilu. Yesu alingile chuma chize ahonene kulinga Alama. Chuma kana shina kulingisa vatu vapwenga nalutalililo lwakuyoya haya myaka yosena. “Mwomwo nge muze vavalingishile vavavulu kupwa vaka-shili hakulikanga chayauze mutu umwe, mukiko nawa munavavalingisa vavavulu kupwa vakwoloka hakwononoka chayauze mutu umwe.” (Wavaka-Loma 5:19) Shikaho, Kalunga mwakatesamo vyuma ashika kukalingila vatu mangana vakatwamenga hano hamavu haya myaka yosena kuhichila mundando yakusokola yaYesu.

Yehova akumishile kanawa ukalu wakulikanga chaAlama. Echi cheji kutukafwanga tulinangule vyavivulu hali Yehova. Tunamono jino ngwetu kakweshi chuma numba chimwe chize chinahase kuhonesa Yehova kulinga vyuma ajinyine kulingako. Chikupu vene, mazu enyi “nawakalinga mwosena muze” ajina. (Isaya 55:11) Tweji kusakwililanga chikuma Yehova hakutuzanga. “Omu mukiko Kalunga asolwelele zangi yenyi kuli etu hakutuma Mwanenyi umwe kaha wakulipwila mukaye mangana tukahase kupwa nakuyoya kuhichila muli ikiye. Eyi zangi yalumbununa nge, Kalunga ikiye atuzangile etu nakututumina Mwanenyi kupwa wana wakufwika hajishili jetu, keshi nge etu yetu twazangile Kalungako.”—WaYowano 1, 4:9, 10.

Kalunga “katetelele Mwanenyiko, oloze amwechele hali etu tuvosena,” shikaho tunafwelela ngwetu Kalunga ‘mwakatuhana vyuma vyosena mulikoji’ lyenyi. (Wavaka-Loma 8:32) Kalunga ashika kukatulingila vyuma muka? Tangenu chihande chinakavangizaho.