Hamyaka yayivulu, namutu wauchi atachikijile muvakumbulwila chihula kana, echi chalingishile vatu vavavulu chikuma vafwenga kumisongo yachihita. Kutwala muze, vaka-sayasi vatachikijile muchano. Vawanyine jino ngwavo misongo kana yeji kwizanga mwomwo yatututu vavandende chikuma vaze katweshi kuhasa kumona namesoko. Kutachikiza muchano kana, chinakafwe vatu valikinge kumisongo yayivulu, nakuvalingisa nawa vapwenga vakulikangula mukuyoya chavo.

Uno kuwana muvakumbulwila vihula vyavilemu vyamukuyoya vyakufwana nge vino chinahase kumikafwa ngachilihi?

• Uno Kalunga ikiye iya?

• Yesu Kulishitu ikiye iya?

• Wangana waKalunga chuma muka?

• Vyuma muka twatalilila kulutwe?

Vatu vavavulu vaze vawana muvakumbulwila vihula kana, chiyoyelo chavo chinawahe chikupu. Nayenu nawa munahase kunganyala nge namuwana muvakumbulwila vihula kana.

Munahase kushinganyeka ngwenu, ‘Uno ngunahase kuwana ngachilihi muchano wavyuma vimwe?’ Mwomwo chachikalu chikuma kuwana muchano wavyuma vyavivulu. Mwomwo ika?

Vatu vavavulu vafwelela ngwavo jifulumende, namauka akusekasana, navaka-kwazana mijimbu kaveshi kuhasa kuvalweza muchanoko. Cheji kuvakaluhwilanga kutachikiza numba nge mijimbu vali nakuvalweza yamuchano chipwe yamakuli. Hakuwana nge muno mukaye munazale navatu vamakuli navaka-kuhona kufwelela vakwavo, ngocho chinalingisa vatu vamwe valipule jipami hakusaka kutachikiza muchano uvene.

Chamokomoko naukalu kana, oloze munahase kuwana kukumbulula chamuchano kuvihula vyavilemu vyamukuyoya. Mujila muka? Hakuzachisa jijila jize mweji kuzachisanga hakusaka kuwana muvakumbulwila vihula vyamukuyoya.

Vatu vamwe veji kutondatondanga muchano wavyuma vimwe mukuyoya chavo. Tutalenu vyuma ahanjikile Jessica, ambile ngwenyi: “Mwanami avijilenga nge mwalya vyelu, numba vene nge mwalya vyavindende kaha.” Shikaho, Jessica asakiwilenga kulanda vyakulya vize mwamona ngwenyi kavyeshi kunehela mwanenyi ukaluko. Ambile nawa ngwenyi: “Chuma chatete ngweji kulinganga shina kutanga tutachikijilo veji kulamikanga havyakulya mangana ngumone nge kuli vyelu. Kufumaho ngweji kuhehwojolanga mijimbu yimwe kutalisa kuvyakulya kana nakutumina vaze vanatungu kulya kana. Ngweji kutwalaho lika kutondatonda muchano nakuwana omu kapani kana yeji kutungilangamo vyakulya.”

Numba tuhu jila mweji kuzachisanga hakutondatonda muchano yalihandununa nayaJessica, oloze ngana mwaikiye, munahase kuzachisa jijila jinakavangizaho hakusaka kuwana muvakumbulwila vihula vyenu:

• Wanenu mashina namasongo.

• Twalenuho lika kuhehwojola.

• Mwatela kutachikiza chikupu ngwenu unjiho munawane wamuchano.

Kulinga ngocho, nachimikafwa muwane muvakumbulwila vihula vyavilemu vyamukuyoya. Mujila muka?

Omu Jessica aputukile kutondatonda muchano wamuMbimbiliya, azachishile jila yize azachishilenga hakutondatonda vyakulya vyamwanenyi. Ambile ngwenyi: “Kutanga nakwivwishisa nakuhehwojola changukafwile nguwane muchano wamuMbimbiliya.” Ngana mwaJessica, vatu vavavulu vanalinangula omu Mbimbiliya yakumbulula vihula vyakufwana nge:

• Mwomwo ika twatwamina hano hamavu?

• Vyuma muka vyeji kulingiwanga hakufwa?

• Mwomwo ika vatu veji kuyanjilanga?

• Vyuma muka ali nakulinga Kalunga oholyapwa mangana afumiseko kuyanda chosena?

• Tunahase kupwa ngachilihi vakuwahilila mutanga?

Munahase kuwana muchano wavihula kana navihula vyeka nawa hakutanga Mbimbiliya nakuhehwojola ha www.pr418.com/lue.