Mbimbiliya Yahanjika Muchano haVyuma Navikasoloka Kulutwe
Uno mwashinganyekaho lyehi havyuma navikasoloka kulutwe tahi? Mbimbiliya yahanjika ngwayo, vyuma navikasoloka kulutwe navikakwata hakuyoya chavatu vosena hano hamavu.
Yesu atulweza vinjikizo vize navitukafwa tutachikize ngwetu “Wangana waKalunga uli kwakamwihi.” (Luka 21:31) Apolofwetele ngwenyi nakukapwa jijita, namindenda yayinene, nazala namisongo yachihita, vyuma vize tunakwambulula makumbi ano.—Luka 21:10-17.
Mbimbiliya yasolola nawa nge “hamakumbi akukuminyina” viyulo vyavatu, navilinga vyavatu navikapihilako. Chishina kana vachilumbununa hachisoneka chaWaChimoteu 2, 3:1-5. Kachi nge munakumona vatu vali nakusolola vilinga kana makumbi ano, kaha tachikizenu ngwenu ou upolofweto wamuMbimbiliya uli nakutesamo oholyapwa.
Uno echi chalumbununa ika? Chalumbununa nge Wangana waKalunga, kalinwomu walumune kuyoya chavatu mangana chipwenga chamwaza. (Luka 21:36) Kalunga ashika muMbimbiliya ngwenyi mwakalinga vyuma vyamwaza hano hamavu mangana vatu vaze navakatwamangaho vakalivwisenga kuwaha kuyoya. Talenu havyakutalilaho vino.
CHIYULO CHAMWAZA
“[Yesu] vamuhanyine chiyulo, naulemu, nawangana mangana vatu veka naveka, navaka-mafuchi, navaka-malimi eka naeka vamuzachilenga. Chiyulo chenyi chapwa chiyulo chahaya myaka yosena chize kacheshi kukakumako, kaha wangana wenyi kaveshi kukaunongesako.”—NDANYELE 7:14.
Mwalumbunukila chisoneka kana: Munahase kulivwisa kuwaha kuyoya hakumiyula kufulumende yaKalunga yize navakayula kuli Mwanenyi Yesu kupwa Mwangana.
KULIKANGULA
“Mulifuchi lize kamweshi kukapwa mutu mwakamba ngwenyi: ‘Nguli nakukola.’”—ISAYA 33:24.
Mwalumbunukila chisoneka kana: Kamweshi kukaviza chipwe kutengukako, namukatwamanga haya myaka yosena chakuzeka kufwa.
KUUNDA CHAMWENEMWENE
“Mwakumisa jijita hamavu hosena.”—SAMU 46:9.
Mwalumbunukila chisoneka kana: Kakweshi kukapwa jijita navyuma vize vyeji kulingisanga vatu vayandeko.
HAMAVU NAHAKAZALA NAVATU VAMICHIMA YAMWAZA
“Vaka-kuhuka kaveshi kupwako chekako . . . Oloze vavavwovu navakaheta mavu.”—SAMU 37:10, 11.
Mwalumbunukila chisoneka kana: Kakweshi kukapwa vatu vavilinga vyavipiko, oloze namukapwa kaha vatu vaze veji kwononokanga Kalunga.
MAVU OSENA NAWAKAPWA PALACHISE
“Navakatunga jizuvo javo, kaha navakatwamangamo, navakalimanga mande amivinyo, kaha navakalyanga mihako yayo.”—ISAYA 65:21, 22.
Mwalumbunukila chisoneka kana: Hamavu hosena nahakapwa hamwaza. Kalunga mwakatesamo kulomba chetu, kaha mwaya muchima wenyi namukatesamo “nahamavu.”—Mateu 6:10.
Pamo Nauzanga Nawa
KUKUMBULULA VIHULA VYAKUPANDAMA KUMBIMBILIYA
Uno Wangana waKalunga Naukatesamo Vyuma Muka?
Fwilenu kutachikiza vyuma nayikatesamo fulumende yaKalunga omu nayikaputuka kayula hano hamavu.
