Muchano Wahanjika Hali Kalunga naKulishitu

PUTUKA KWIMBISA

Numba tuhu vatu vamwe veji kulemesanga tulunga vavavulu, oloze kwatwama Kalunga umwe kaha wamuchano. (Yowano 17:3) Apwa “Wamulemu Chikuma,” kaha nawa apwa Tengi wavyuma vyosena, kaha nawa ikiye Kasulu kavyuma vyakuyoya vyosena. Shikaho ikiye kaha atamo kulemesa.—Ndanyele 7:18; Kusoloka 4:11.

Kalunga Ikiye Iya?

Lijina lyaKalunga lyasoloka muvisoneka vyakulivanga MAPAPA 7,000

YEHOVA Likiko lijina lyaKalunga

MWATA, KALUNGA, TATA—Jikiko jivulukiso jimwe atwama najo Yehova

Kalunga Lijina Lyenyi Ikiye Iya? Kalunga ivene ahanjikile ngwenyi: “Ami yami Yehova. Eli likiko lijina lyami.” (Isaya 42:8) Eli lijina lyenyi lyasoloka muMbimbiliya kafwe mapapa 7,000. Chaluvinda, vaka-kwalumuna Mbimbiliya vamwe vafumisamo lijina lyaKalunga nakushishisamo vulukiso yakwamba ngwavo “Mwata.” Kalunga asaka mupwenga mumasepa jenyi, shikaho ali nakumikolezeza ‘mumusanyikenga halijina lyenyi.’—Samu 105:1.

Jivulukiso Atwama Najo Yehova. Mbimbiliya yavuluka Yehova kuzachisa jivulukiso jakufwana nge “Kalunga,” “Wangolo josena,” “Tengi,” “Tata,” “Mwata” “Wakulitulaho.” Kaha kulomba chachivulu chize chatwama muMbimbiliya chasolola ngwacho Yehova vanamusanyikanga kuzachisa jivulukiso jakalemesa nalijina lyenyi lyaYehova.—Ndanyele 9:4.

Omu apwa Kalunga. Kalunga apwa shipilitu yize katwamonako. (Yowano 4:24) Ngocho Mbimbiliya yalumbununa hatoma ngwayo, “kakweshi mutu amonaho lyehi Kalungako.” (Yowano 1:18) Kaha nawa Mbimbiliya yahanjika nawa omu Kalunga eji kwivwanga kutalisa kuvilinga vyavatu. Vatu vanahase ‘kumwivwisa kuwaha’ chipwe kupihya.—Vishimo 11:20; Samu 78:40, 41.

Vilinga vyaKalunga Vyamwaza. Kalunga katala vatu kumesoko chamokomoko nalifuchi lyavo chipwe nachihela vafuma. (Vilinga 10:34, 35) Kaha nawa apwa “wakeke nakutetela, wakushipwokela kukwata utenu, wazangi yakwilila, wamuchano.” (Kulovoka 34:6, 7) Evi vilinga viwana vyapwa vyakulipwila chikuma.

Ngolo. Hakuwana nge apwa “Kalunga Wangolo Josena,” ngocho akwechi ngolo jakutesamo vyuma vyosena vize ashika.—Kuputuka 17:1.

Mangana. Mangana aKalunga ahambakana mangana akala mutu. Mbimbiliya yalumbununa ngwayo, Kalunga ikiye “apwa wamangana uka wenyi.”—Wavaka-Loma 16:27.

Chiyulo. Kalunga eji kulinganga vyuma vyakwoloka. Vilinga vyenyi vyapwa ‘vyakukupuka’ kaha nawa keshi “kuhengesa chiyuloko.”—Lushimbi lwamuchivali 32:4.

Zangi. Mbimbiliya yahanjika ngwayo “Kalunga ikiye zangi.” (WaYowano 1, 4:8) Kalunga kasolola kaha zangiko, oloze ikiye ivene apwa zangi. Eji kulinganga vyuma vyosena muzangi, kaha nawa zangi yenyi yeji kutunganyalisanga chikuma.

Kalunga Asaka Vatu Vapwenga Masepa Jenyi. Kalunga apwa Setu wamwilu wazangi. (Mateu 6:9) Kachi nge natumufwelela, kaha tunahase kupwa tumasepa jenyi. (Samu 25:14) Shikaho, Kalunga ali nakusaka mupandame kuli ikiye kuhichila mukulomba nakumbila “kulizakamina chenu chosena hali ikiye, mwomwo amizakama.”—WaPetulu 1, 5:7; WaYakova 4:8.

Chihandwa Muka Chatwama Hali Kalunga naKulishitu?

Yesu Kapwa Kalungako. Yesu apwa wakulipwila mwomwo vamutengele kuli Kalunga ivene. Shikaho, Mbimbiliya yamuvulukila ngwayo apwa MwanaKalunga. (Yowano 1:14) Hanyima yakutenga Yesu, Yehova azachishile ou Mwanenyi watwatwa ‘kuluwa muka-kuzata’ hakutenga vyuma vyosena kuhakilako vene navatu.—Vishimo 8:30, 31; Wavaka-Kolose 1:15, 16.

Yesu Kulishitu kalivulukile ngwenyi apwa Kalungako. Oloze ambile ngwenyi: “Ngwafumine kuli [Kalunga], kaha ngunapu ngumuka-kumwimanyinako. Ou ikiye angutumine ami.” (Yowano 7:29) Yesu alwezele tumbaji twenyi ngwenyi, Yehova apwa “Tata uze apwa Senu nayenu,” “Kalunga kami uze apwa Kalunga kenu nayenu.” (Yowano 20:17) Omu Yesu afwile, Yehova amusangwile kuya nakuyoyela mwilu nakumuhana wata wosena nakumutwamisa kulivoko lyaYehova lyachilyo.—Mateu 28:18; Vilinga 2:32, 33.

Yesu Kulishitu Nahase Kumikafwa Mupandame Kuli Kalunga

Yesu ejile hano hamavu nakutunangula omu apwa Ise. Yehova ivene ahanjikile kutalisa kuli Yesu ngwenyi: “Ou ikiye Mwanami, ou ngwazanga. Mwivwililenunga.” (Mako 9:7) Ngocho Yesu atachikiza kanawa Kalunga kuhambakana kala mutu. Ambile ngwenyi: “Kakweshi mutu amutachikiza Tatako, shina Mwana naweshowo nawa navazanga kumusolwelayo kuli Mwana.”—Luka 10:22.

Yesu eji kusololanga vilinga vyaKalunga. Kulondezeza vilinga vyaIse, chalingishile Yesu ahanjike ngwenyi: “Weshowo nangumono ami namono naTata nawa.” (Yowano 14:9) Yesu akafwile vatu vapandame kuli Kalunga hakuvasolwela zangi mumazu namuvilinga. Kaha ambile ngwenyi: “Ami yami jila, yami muchano, yami kuyoya. Mutu naumwe wauchi mweza kuli Tata kuvanga ahichile muli ami.” (Yowano 14:6) Ahanjikile nawa ngwenyi: “Vaka-kulemesa vamuchano navakalemesanga Tata mushipilitu namumuchano, mwomwo chikupu vene Tata ali nakutondatonda vatu vangana vamulemesenga.” (Yowano 4:23) Achishinganyekenu hachuma kana! Yehova ali nakutonda vatu vakufwana nge yenu, vaze vali nakufwila kulinangula muchano wahanjika hali ikiye.