1. 1. SATANA LIYAVOLO. Satana uze apwa kangelo wakulikanga ikiye ali nakulingisa kupwenga chijindo chize tuli nakumona makumbi ano. Kalunga mwakanongesa Satana navatu vosena vaze veji kujindanga vakwavo.—Samu 37:38; Wavaka-Loma 16:20.

2. 2. KAYE KASATANA KAKUHUKA. Kalunga mwakafumisako vatu vakuhuka vosena vamuno mukaye, kuhakilako vene navaka-mapolitiki navatwamina vamukwitava vaze veji kukundwizanga chijindo. Kaha nawa mwakafumisako vaka-kusekasana valifwi vaze vapwa vaka-maswekeza, kaha nawa vaka-kulila vakwavo hamitwe.—WaPetulu 2, 3:13.

3. 3. KUHONA KUKUPUKA CHAVATU. Mbimbiliya yalumbununa ngwayo, vatu vosena kavakupukako mwomwo vaswana shili. Ngocho vatwama natato yakushinganyekanga nakulinga vyuma vyakuhenga nakwivwa kupihya. (Wavaka-Loma 5:12) Jitato jimwe japwa kulama koko nakuhanjikanga mazu amapi akusolola chijindo. Shikaho Kalunga mwakakafwa vatu vakafungulule jitato kaneji mangana chijindo chikafumeko haya myaka.—Isaya 54:13.

1. 1. KAKWESHI KUKAPWA MUTU NAVAKALINGA MWAMUPIKO. Kaye navakakayula kuWangana waKalunga uze wapwa fulumende yamwilu yize nayikayula mwakwoloka, kaha nawa nayikelila. (Ndanyele 2:44) Kakweshi kukapwa kulimona ulumbi nakulikenyukilako. Kalunga mwakafumisako vaka-kuhengesa chiyulo vaze vali nakuyanjisa vatu oholyapwa.—Luka 18:7.

2. 2. VATU VOSENA NAVAKATWAMANGA MUKUUNDA. Kakweshi kukapwa mutu mwakayanda mwomwo yauhwanga chipwe jitako. (Samu 46:9) Hano hamavu nahakapwa hakukingiwa, kaha vatu navakatwamangaho navakapwa vatu vaze vazanga kuunda.—Samu 72:7.

3. 3. VATU VOSENA NAVAKAPWA NACHIYOYELO CHAMWAZA NAKUYOYA HAYA MYAKA. Vosena vaze navakapwa hano hamavu navakalizanganga navakwavo. (Mateu 22:39) Kakweshi kukapwa mutu mwakayanda mwomwo yavishinganyeka vyavipi chipwe kwanuka vyuma vyavipi chipwe mwomwo yavyuma vyekako. (Isaya 65:17) Halwola kana, vatu “navakalivwisa kuwaha kuunda chamwenemwene,” mwomwo kakweshi kukapwa cheka chijindoko.—Samu 37:11.

Kutala muli nakufwila kukatwama mukaye kana tahi? Namakumbi ano, vatu vavavulu vali nakulinangula mwakuhonesela chijindo hakukavangiza jindongi jamuMbimbiliya. (Samu 37:8) Omu mukiko vali nakulinga naVinjiho jaYehova mukaye kosena. Numba tuhu vafuma kuvisemwa naviyoyelo vyakulisezaseza, oloze vapwa vakulinunga kaha nawa veji kulisolwelanga zangi.—Isaya 2:2-4.

Vinjiho jaYehova navawahilila kumilwezako vyuma valinangula vize vyeji kuvakafwanga vapwenga vakumika chamokomoko nakuvalinga mwamupi. Vyuma namulinangula navimikafwa mupwenga nazangi nakuhonesa chijindo. Namutachikiza nawa mwakusolwela vatu vosena likoji, kuhakilako vene navaze kavasakwililako chipwe vaze veji kusololanga chijindo. Echi nachimikafwa mupwenga vakuwahilila nakupwa nausepa wakukola navakwenu. Chachilemunyi, namutachikiza vyuma mwatela kulinga mangana vakamiyule kuWangana waKalunga omu chijindo nachikafumako haya myaka.—Samu 37:29.