MWAKUHONESELA CHIJINDO KUTANDA
3 | Fumisenu Chijindo muVishinganyeka Vyenu
Vyuma Yanangula Mbimbiliya:
“Alumukenu hakulingisa vishinganyeka vyenu kupwa vyavihya, mangana mutachikize kanawa mwaya muchima waKalunga, ngwenu mwamwaza, mukiko vetavila, kaha mwakukupuka.”—WAVAKA-LOMA 12:2.
Omwo Chalumbunukila:
Vyuma tweji kushinganyekanga vyapwa vyavilemu kuli Yehova. (Yelemiya 17:10) Katwatela kukumina kaha hakulihenda kukuhanjika chipwe kulinga vyuma vize navineha chijindoko. Oloze twatela nawa kwecha kushinganyeka havyuma vize navitulingisa tupwenga nachijindo, mwomwo chijindo cheji kuputukilanga muvishinganyeka namumuchima. Nge natulinga ngocho, kaha ‘natwalumuka’ nakuhona kutanjisa chijindo.
Vyuma Mwatela Kulinga:
Shinganyekenu havyuma mweji kushinganyekanga nomwo mweji kwivwanga hali vakwenu, chikumanyi vatu vamuyachi weka chipwe vakulifuchi lyeka. Lihulisenu ngwenu: ‘Uno vatu kana ngwavamona ngachilihi? Kutala vishinganyeka ngwatwama navyo havatu kana vyalitombola nomwo ngwavatachikijila tahi? Nyi vishinganyeka kana vyeji kwizanga mwomwo yakuvamona ulumbi?’ Lihendenunga kukutala chipwe kutanga vyuma vyahaInternet vize vyakundwiza chijindo naulyanyi.
Mazu aKalunga anahase kutukafwa tuhonese chijindo muvishinganyeka namumichima yetu
Shimbu jimwe kachapwa chachashi etu vavene kutachikiza kanawa omwo vyapwa vishinganyeka vyetu nomwo tweji kwivwangako. Oloze Mazu aKalunga anahase kutukafwa tumone omwo “vinayi vishinganyeka nakujina chamumuchima.” (WavaHepeleu 4:12) Shikaho, twalenuho lika kukekesanga Mbimbiliya. Esekesenunga vyuma yanangula Mbimbiliya kuvyuma mweji kushinganyekanga, nakuzata nangolo mangana vishinganyeka vyenu vilitombole navyuma yanangula Mbimbiliya. Mazu aKalunga anahase kutukafwa tuhonese chijindo chize ‘chazama chikuma’ muvishinganyeka namumichima yetu.—Wavaka-Kolinde 2, 10:4, 5.
