MWAKUHONESELA CHIJINDO KUTANDA
2 | Kanda Kulinga Sambanjingako
Vyuma Yanangula Mbimbiliya:
“Kanda namuhilwisa upi kumutu namilingi mwamupiko. . . . Kachi nge chinahase, kweseka nomu namuhashila, twamenunga mukuunda navatu vosena. . . . Kanda namulinga sambanjingako, . . . mwomwo vasoneka ngwavo: ‘“Kulinga sambanjinga chinapu chami, ami nangukavashishishilamo.” Omu mukiko mwanambe Yehova.”’—WAVAKA-LOMA 12:17-19.
Omwo Chalumbunukila:
Numba tuhu chapwa chakutamo kupihilila nge vanatupihisa, oloze Kalunga ahunga vaka-kulinga sambanjinga. Atulweza tuvandamine ikiye, mwomwo kalinwomu olole vyuma.—Samu 37:7, 10.
Vyuma Mwatela Kulinga:
Nge vatu vakuhona kukupuka navalinga sambanjinga, veji kulingisanga chijindo chitande. Shikaho nge vakwenu vanamilingi mwamupi, kanda kuvahilwishilamoko. Esekenu kuunjisa muchima nakukumisa vikokojola mujila yakuunda. Lwola lumwe nachipwa chamwaza kuliula vyuma vinasoloka. (Vishimo 19:11) Chipwe ngocho, nge chili nakusakiwa, kaha ambululenu ukalu wenu. Chakutalilaho, nge vanamilingi mwamupi, kaha munahase kuya nakwambulula kutupokola chipwe kuli vaka-kuyula.
Kulinga sambanjinga chapwa kulinehela kaha ukalu
Ngachilihi nge kakweshi jila yakukumishilamo ukalu mukuundako? Nyi ngachilihi nge munazate noho hakumina ngolo jenu mangana mukumise ukalu oloze kawakumineko? Kanda namulinga sambanjingako. Kulinga sambanjinga chinahase kutohwesa ukalu. Zatenu nangolo mangana mufungulule chijindo. Fwelelenu jila Kalunga eji kukumishilangamo ukalu wetu. Mbimbiliya ngwayo: ‘Pendaminenu hali ikiye, kaha mwamikafwa.’—Samu 37:3-5.
