Mwomwo Ika Chijindo Chinatanjila Ngana?
Mwomwo ika chijindo chinatanjila chikuma mukaye? Hakusaka twijive vyuma vili nakulingisa chijindo chitande, twatela kutachikiza omwo chijindo chalumbunukila, novyo vatu veji kulijinjilanga nomwo chili nakutanda mukaye kosena.
Uno Chijindo Chapwa Chika?
Chijindo chapwa kuhunga chikuma mutu chipwe lizavu lyavatu. Chapwa nawa kutwalaho lika kusulakanyina mutu halwola lwalusuku.
VYUMA VYALINGISA VATU VAPUTUKE KUJINDA VAKWAVO
Kuli vyuma vyavivulu vize vyeji kulingisanga vatu vaputuke kujinda vakwavo. Kakavulu vatu veji kujindanga vakwavo keshi mwomwo yavyuma veji kulingangako, oloze mwomwo yasolokeso yavo. Vatu vaze vajinda, vavamona kupwa vatu vavapi, vaka-kulinga vyuma vyavipi, kaha nawa ngwavo kaveshi kuhasa kwalumukako. Vanahase kuvamona kupwa vatu vamokomoko, vaka-kwivwisa vakwavo woma, chipwe kuvashinganyekela ngwavo vakiko vali nakuneha ukalu. Vatu vaze valukukaho lyehi, chipwe kuvalinga mwamupi chipwe kuvalinga vyuma vyeka vize vyavalingisa vashinganyeke ngwavo vavajinda, navakiko veji kujindanga vakwavo.
OMWO CHIJINDO CHEJI KUTANDANGA
Mutu nahase kujinda vakwavo numba vene nge kavamonako. Chakutalilaho, mutu nahase kujinda vatu vaze vajinda kuli vausoko wenyi chipwe masepa jenyi. Echi chinahase kulingisa chijindo chitande washiwashi mutanga chipwe mungalila.
Nge natutachikiza omwo chijindo cheji kutandanga washiwashi, kaha natumona ovyo vatu vavavulu vapwila nachijindo. Chipwe ngocho, hakusaka kuhonesa chijindo kutanda, twatela kuvangila kutachikiza omwo chijindo chaputukile. Vyuma kana vavisolola muMbimbiliya.
MBIMBILIYA YASOLOLA VYUMA VYANEHA CHIJINDO
VATU KESHI VAKIKO VAPUTUKILE CHIJINDOKO. Chijindo chaputukile omu kangelo umwe mwilu alikangile kuli Kalunga. Ou kangelo vamuvuluka jino ngwavo Satana Liyavolo. Kaha “apwile muka-kujiha vatu kufuma vene kumaputukilo” akulikanga chenyi. Hakuwana nge “apwa muka-makuli kaha nawa ise yamakuli,” ngocho natwaleho lika kuneha chijindo naukenya. (Yowano 8:44; WaYowano 1, 3:11, 12) Mbimbiliya yamusolola kupwa muka-kuneha chijindo, muka-matoto, kaha nawa muka-ukenya.—Yopa 2:7; Kusoloka 12:9, 12, 17.
CHINAHASE KUPWA CHACHASHI KULI MUTU WAKUHONA KUKUPUKA KUPWA NACHIJINDO. Mutu watete Alama akavangijile kulikanga chaSatana. Echi chalingisa vatu vosena vaswane shili nakuhona kupwa vakukupuka. (Wavaka-Loma 5:12) Kena mwana Alama watete ajinjile songo yenyi Avele nakumujiha. (WaYowano 1, 3:12) Chipwe ngocho, vatu vavavulu veji kusololanga zangi namuchima wakeke. Oloze mwomwo yakuswana shili, mayevuyevu avatu veji kunehanga chijindo mwomwo yakupwa namuchima wakulizanga vavene, nalushiushiu nakulivwimba.—WaChimoteu 2, 3:1-5.
CHIJINDO CHINAHASE KWIZA MWOMWO YAKULIKENYUKILA. Mukaye tuli nakuyoyela munazale nachijindo mwomwo yakuhona kulivwila keke nakupwa navilinga vyeka vyavipi. Kulikenyukila, nakulimona ulumbi, nakulitoleka, nahanjikiso yakasautu nalwenyeka vinalisale chikuma, mwomwo “kaye kosena katwama mumavoko ayauze wakuhuka” Satana Liyavolo.—WaYowano 1, 5:19.
Chipwe ngocho, Mbimbiliya kayasolola kaha vyuma vyeji kunehanga chijindoko, oloze yahanjika nawa havyuma vinahase kukumisa chijindo.
Pamo Nauzanga Nawa
KUKUMBULULA VIHULA VYAKUPANDAMA KUMBIMBILIYA
Uno Kalunga Atengele Liyavolo Tahi?
Uno Satana afumine kulihi? Linangulenu ovyo Yesu ahanjikilile ngwenyi Liyavolo “kazamine mumuchanoko.”
