Nge kanda, kaha pamo mwamonaho lyehi vakwenu navavajinda mujijila jimwe. Mijimbu yayivulu yasolola nge vatu veji kulijindanga mwomwo yakulitala hamiyachi, nahamafuchi, chipwe mwomwo yakuhunga vatu vausonyi weka. Ngocho, jifulumende jajivulu jahakako jishimbi jakuzangamisa vaze navalinga vyuma vyakuneha chijindo.

Kakavulu vatu veji kujindanga vakwavo mwomwo yakuvajinda kuli vakwavo. Vaze vajinda kuli vakwavo veji kufwilanga kulinga sambanjinga nakulingisa chijindo chitande.

Pamo vamimonaho lyehi ulumbi, nakumimona mwamupi mwomwo yasolokeso yenu, nakumisekeleka, nakumitukana nakumivwisa woma. Oloze chijindo chinahase kuhambakana havyuma kanevi mwomwo chinahase kulingisa mutu apwenga chikenya. Chakutalilaho, nahase kupwa jino muka-kutoleka, chipwe muka-kwenyeka vyuma, chipwe kuveta vakwavo, chipwe kuvapika, chipwe kuvajiha.

Yino mangazini nayisolola omwo chijindo vanahase kuchifungulula, kaha nayishimutwila nawa havihula vino:

• Mwomwo ika chijindo chinavulila ngana?

• Vyuma muka navikafwa vatu vahone kutanjisa chijindo?

• Uno chijindo nachipwangako lika haya myaka tahi?