Mbimbiliya kayapwa himukanda wahanjika hajijila jakukilamo misongoko. Chipwe ngocho, jindongi jatwamamo jinahase kukafwa mutu uze ali nakulipika namusongo wakuwongo. Talenu vyakutalilaho vimwe.

“Vatu vavakangule kaveshi kusakiwa chimbukeko, kuvanga vaka-kuviza kaha.”—MATEU 9:12.

Mbimbiliya yamba ngwayo tunahase kuya kuli vandotolo vatuke. Vatu vavavulu vaze vaviza musongo wakuwongo, vaze nawa vanatachikizanga vyayivulu hamusongo wavo, kaha nawa veji kuyanga kuli vandotolo vavakafwe, vananganyala chikuma.

“Kulilongesa kumujimba cheji kunganyalisanga.”—WACHIMOTEU 1, 4:8.

Kulinyuka mujimba chinahase kumikafwa chikuma nakukehesako ukalu wenu. Shikaho mwatela kulinyukanga mujimba, nakulyanga vyakulya vyakutunga mujimba nakusavalanga jiola jakutamo.

“Muchima wakuwahilila unapu nge vitumbo vyamwaza, oloze muchima wakuhomba weji kukumisanga ngolo jamutu.”—VISHIMO 17:22.

Kutanganga mijimbu yamuMbimbiliya nakulitomenanga kulinga vyuma vize namuhasa, chinahase kumikafwa mupwenga vakuwahilila. Kachi nge namushinganyekanga havyuma vyamwaza vize vili nakusoloka mukuyoya chenu nakutachikiza ngwenu  kulutwe vyuma navikapwa kanawa, kaha namumika muukalu wenu.

“Vaka-kulikehesa vakwechi mangana.”—VISHIMO 11:2.

Lwola lumwe namuhonanga kulinga vyuma vyosena vize munasake, shikaho nachiwaha nge namwitavilanga vakwenu vamikafwe. Masepa navatanga vanahase kusaka kumikafwa, oloze pamo kaveshi kuhasa kutachikiza jila yakumikafwilamoko. Valwezenu vyuma vize vinahase kumikafwa. Kanda kushinganyeka ngwenu navamilingila vyuma vyavinene chikumako, oloze vasakwililenunga hakala vyuma navamilingila.

“Ngwaputukile kwivwa ngwami mujimba wami kaweshi kanawako, ngocho ngwayile kuli ndotolo. Kaha anguwanyine namusongo. Echi changulingishile ngwitavile ukalu wami nakuwana jijila jakungukilamo.”—Nicole, a uze aviza musongo vavuluka ngwavo bipolar disorder.

“Ngunawane nge kutanganga Mbimbiliya hamwe napuwami cheji kungukafwanga ngupwenga wakuwahilila nakupwa navishinganyeka vyakwoloka hakumbi hakumbi. Kaha lwola luze ngweji kuvizanga chikuma, ngweji kwanukanga chisoneka chimwe chize nachinguvendejeka.”—Peter, uze aviza musongo wakuhomba.

“Changukaluhwilile kulweza vakwetu ukalu wami mwomwo yakwivwa sonyi. Oloze sepa lyami umwe angwivwililile kanawa omu ngwapwile nakumulweza, ngocho evwishishile ukalu wami. Angukafwile ngwivwengako kanawa nakulivwa jino ngwami kangweshi ukawamiko.”—Ji-yoo, uze aviza musongo wakuhona kulya chikuma.

“Mbimbiliya yinangukafwe ngupwenganga nalwola lwakuhwima nakuhona kuzatanga chikuma. Chinyingi chamuMbimbiliya chinangukafwe ngulipike naukalu wami.”—Timothy, uze aviza musongo wakuwongo vavuluka ngwavo obsessive-compulsive disorder.