2 | “Kuvendejeka ChamuVisoneka”
MBIMBILIYA YAHANJIKA NGWAYO: “Vyuma vyosena vize vasonekele hakavanga vavisonekelele kutunangula etu, mangana kuhichila mukukakachila chetu namukuvendejeka chamuVisoneka tuhase kupwa nalutalililo.”—WAVAKA-LOMA 15:4.
Mwalumbunukila Mazu Kana
MuMbimbiliya mwatwama mazu aze anahase kutuvendejeka nakutukafwa tupwenga nalukakachila mangana tuhonese ukalu wakuhomba. Kaha nawa yinahase kutukafwa tufwelele ngwetu ukalu tuli nakumona naukakuma.
Omwo Mazu Kana Anahase Kumikafwa
Tuvosena shimbu jimwe tweji kwivwanga kupihya chikuma, oloze vaze vatwama naukalu wakuhomba chipwe kulizakamina veji kwivwanga chikuma kupihya hakumbi hakumbi. Uno Mbimbiliya yinahase kutukafwa ngachilihi?
MuMbimbiliya mwatwama mazu amwaza aze anahase kutukafwa tuhonese vishinganyeka vize navitulingisa tulizakamine. (Wavaka-Fwilipi 4:8) Yinahase nawa kutukafwa tushinganyeke havyuma vize navitukafwa nakutuhizumuna.—Samu 94:18, 19.
Mbimbiliya yinahase kutukafwa tuhonese vishinganyeka vyakulimona etu vavene kupwa tuvamokomoko.—Luka 12:6, 7.
Visoneka vyavivulu vyamuMbimbiliya vyatufwelelesa ngwavyo katweshi ukawetuko, kaha nawa Kalunga uze apwa Tengi yetu atachikiza kanawa omwo tweji kuyandanga.—Samu 34:18; WaYowano 1, 3:19, 20.
Mbimbiliya yatushika ngwayo Kalunga mwakatulingisa tukavulyame vyuma vize vyeji kutuhombesanga. (Isaya 65:17; Kusoloka 21:4) Kwanuka chishina kana chinahase kutukafwa tumike nge kuli vyuma vili nakutuyanjisa muvishinganyeka chipwe nge tunahombo.
