Tunahase kulizakamina chikuma nge sepa lyetu ali nakuviza musongo wakuwongo. Chipwe ngocho, tunahase kusolola ngwetu twazanga sepa lyetu hakumukafwa omike muukalu kana. Mujila muka?

‘Anguhwenunga kwivwilila.’—WAYAKOVA 1:19.

Jila yimwe munahase kukafwilamo sepa lyenu shina kwivwilila nge ali nakuhanjika. Kanda kushinganyeka ngwenu mwatela kukumbulula vyuma vyosena vize mwahanjikako. Sololenunga ngwenu mweji kumwivwililanga, kaha nawa ngwenu mwamuzanga. Fwilenunga kutachikiza omwo ali nakwivwa nakulihenda kukumuhananga milonga. Tachikizenu nawa ngwenu lwola lumwe nahase kulusuka kuhanjika mazu aze nahase kukaliveya kulutwe.—Yopa 6:2, 3.

“Vendejekenunga vatu.”—WAVAKA-TESOLONYIKA 1, 5:14.

Sepa lyenu nahase kuhomba chipwe kulivwa nge wamokomoko. Oloze nge namumujikijisa nakumukolezeza kaha namusolola ngwenu mwamuzanga, numba tuhu kamwatachikijile mazu akuzachisako.

“Sepa wamwenemwene eji kuzanganga sepa lyenyi shimbu yosena.”—VISHIMO 17:17.

Kafwenunga masepa jenu hakuvalingilako vyuma vimwe. Kanda kushinganyeka ngwenu munatachikiza vyuma vali nakusakako, oloze vahulisenunga vamilweze vyuma munahase kuvalingila.  Kachi nge sepa lyenu nahono kuhanjika vyuma ali nakusaka, kaha mulwezenu numba nge munahase kuya hamwe nakwolola mahinji. Munahase nawa kumulweza numba nge munahase kuya nakumulanjilako vyuma vimwe, chipwe kumuwahishilako hembo chipwe kumuzachilako milimo yeka.—Wavaka-Ngalesha 6:2.

“Talililenunga [vakwenu] chikoki.”—WAVAKA-TESOLONYIKA 1, 5:14.

Lwola lumwe sepa lyenu nahase kuhona kuhanjika nakukasunuka. Oloze lwezenu sepa lyenu ngwenu namumwivwilila kala lwola mwakahanjika. Tachikizenu ngwenu sepa lyenu nahase kulinga chipwe kuhanjika vyuma vize navimivwisa kupihya mwomwo yaukalu uze ali nakuhitamo. Pamo nahase kukana kulinga vyuma mwalivwasananga chipwe kusulakana nayenu. Shikaho, mwatela kumutalilila chikoki nakumwivwishisa kanawa halwola muli nakumukafwa.—Vishimo 18:24.

“Ngweji kuzatanga nangolo mangana sepa lyami angufwelele. Numba tuhu kangweshi kuhasa kukumisa ukalu wenyiko, oloze ngweji kumwivwililanga kanawa nge ali nakuhanjika. Lwola lumwe asaka kaha kumwivwilila, ngocho eji kwivwanga kumuchima hwo.”—Farrah, a uze akwechi sepa lyenyi uze aviza musongo wakuhona kulya, nawakuhomba nakulizakamina.

“Sepa lyami umwe eji kungutetelanga nakungukolezeza. Angusanyikile kuzuvo yenyi nakulya vyakulya vyamwaza. Echi changukafwile nguhanjike vyosena vyapwile kumuchima. Ngocho angukolezezele chikuma.”—Ha-eun, uze aviza musongo wakuhomba.

“Chapwa chachilemu kupwa namuchima wakutalilila chikoki. Kachi nge pwevo lyami nangwivwisa kupihya kumuchima, ngweji kwanukanga ngwami nalingi chuma kana mwomwo yakuviza, oloze keshi mukiko apwako. Echi cheji kungukafwanga ngumutetele nakuhona kumusulakanyina.”—Jacob, uze ambata pwevo aviza musongo wakuhomba.

“Pwevo lyami nangukafwenga nakunguvendejeka chikuma. Kachi nge ngunalizakamina kangushinjila ngulinge vyuma vize kangweshi nakusakako. Ngocho lwola lumwe eji kulisuulanga kuhona kulinga vyuma asaka. Apwa wamulemu chikuma kuli ami mwomwo yamuchima wenyi wakulisuula nawakuhana.”—Enrico, uze aviza musongo wakulizakamina.