Vatu Vavavulu muKaye Vali naKuviza Musongo WakuWongo
“Kakavulu ngweji kulizakaminanga nahalwola nguli nakunoka mukapete ukawami.”
“Ngweji kulizakaminanga nahalwola luze ngweji kwivwangako kanawa. Kaha nawa nge ‘ngunawahilila’ chikuma, nakushimbula chiku ngweji ‘kupihililanga.’”
“Ngweji kwesekanga kuzata nangolo jami josena mangana nguhone kulizakamina vyalikumbi lyahamene, oloze lwola lumwe cheji kungukaluhwilanga kulinga ngocho.”
Kutala nayenu mwevwaho lyehi ngana omu veji kwivwanga vatu vanahanjika mazu ali helu tahi? Uno yenu muli nakumona ukalu kana tahi, nyi mutu uze mwazanga ikiye ali nakumona ukalu kana?
Tachikizenu ngwenu keshi yenu kaha munakumona ukalu kanako. Vatu vavavulu makumbi ano vali nakuhita muukalu wakuviza musongo wakuwongo, chipwe pamo kuvijisa vatu vaze vazanga.
Chikupu vene, tuli nakuyoyela ‘mulwola lwalukalu’ luze lunakulingisa vatu valizakamine chikuma. (WaChimoteu 2, 3:1) Kuhehwojola chimwe chize chapwileko, chasolola nge havatu 8 vaze muliwana navo, hali mutu umwe uze ali nakuviza musongo wakuwongo. Mumwaka wa 2020, musongo wachihita waCOVID-19 walingisanga vatu vavavulu vakuheta kujipaseti 26 na 28 vavize musongo wakulizakamina nakuhomba.
Numba tuhu chapwa chachilemu kutachikiza vatu vali nakuviza musongo wakuwongo, oloze chachilemu chikumanyi shina, kutachikiza omwo chapwa chiyoyelo chetu etu vavene nachechi chavatu twazanga.
Kulikangula kuwongo chapwa ngachilihi?
Nge mutu nalikangula kuwongo eji kupwanga wakuwahilila, nakushinganyeka kanawa. Munahase kulipika naukalu uze veji kumonanga vatu vosena mukuyoya, nakuzata kanawa milimo yenu nakupwa vakusuuluka mukuyoya chenu.
Musongo wakuwongo . . .
-
KAWEZA mwomwo yakuhehela chamutuko.
-
WAPWA musongo uze weji kulingisanga mutu alizakamine chikuma, nakuhona kushinganyeka kanawa, nakupihilila washi nakulinga vyuma chamulingila.
-
Unahase kulingisa mutu ahone kutunga masepa nakuhona kuzata kanawa milimo yahakumbi hakumbi.
-
Unahase kukwata kala mutu chamokomoko namyaka ali nayo, nachisemwa, nachikova, namuyachi, nakwitava, numba atanga chikuma chipwe chiku chipwe atwama najimbongo jajivulu.
Itavilenu vamikafwe hamusongo wakuwongo mwaviza
Kachi nge enu chipwe mutu mwazanga naputuka kuhona kusavala tulo, nakuhona kupwa nachipepa chavyakulya, chipwe kupwa nachipepa chakulya chikuma, nakulizakamina chikuma chipwe kuhomba, kaha mwatela kuya kuli vandotolo vakamilweze ovyo vinakuneha ukalu kana nakumilweza nawa omwo munahase kukumisa ukalu kana. Uno kulihi mwatela kuya vamikafwe?
Mutu wamangana chikuma uze atwamaho lyehi hano hamavu Yesu Kulishitu ambile ngwenyi: “Vatu vavakangule kaveshi kusakiwa chimbukeko, kuvanga vaka-kuviza kaha.” (Mateu 9:12) Vatu vaze vaviza musongo wakuwongo vaze nawa vali nakuka mujila yakutamo, vanahase kuvakafwa nakupwa vakuwahilila mukuyoya chavo. Vatu kana, kavatela kulangisa kuya kuchipatela kachi nge vinjikizo vyamusongo wakuwongo vinatoho chipwe vinashimbulako. a
Numba tuhu Mbimbiliya kayapwa mukanda uze wahanjika mwakukila misongoko, oloze jindongi jatwamamo jinahase kutukafwa tupwenga vakulikangula kuwongo. Tuli nakumilomba mutange vihande vinakavangizaho vize vinahanjika omwo Mbimbiliya yinahase kutukafwa tulipike namisongo yakuwongo.
a Mangazini yaKaposhi Kakutalila kayanangula vatu mwakukila misongoko. Mutu himutu atela kukekesa kanawa shimbu kanda asakule jijila jakumukilamo.
Pamo Nauzanga Nawa
KUKUMBULULA VIHULA VYAKUPANDAMA KUMBIMBILIYA
Uno Mbimbiliya Yinahase Kungukafwa Nge Ngunahombo Tahi?
Kuli jijila jitatu jize Kalunga eji kukafwilangamo vatu vaze vanahombo.
ESSENTIAL BIBLE TEACHINGS
Mwomwo Ika Kalunga Etavishila Kuyanda?
Vatu vavavulu vasaka kutachikiza ovyo chijindo nakuyanda vinavulila muno mukaye. Mbimbiliya yavuluka vyuma vyalingisa chijindo nakuyanda vivule muno mukaye, kaha vyuma yahanjika vinahase kutuvendejeka.
TONENUNGA!
Kulisala chaUkalu waKuviza muWongo kuVakweze—Vyuma Muka Yahanjika Mbimbiliya?
MuMbimbiliya mwatwama vyuma vize vinahase kukafwa vakweze vaze vali nakuviza muwongo.
VYAYETU
Lomba Vakutambukile
Shimutwilenu chihula chimwe chamuMbimbiliya chipwe kulinangula vyavivulu hali Vinjiho jaYehova.
