Vatu vavavulu vetavila ngwavo vyuma vimwe veji kusakulanga vatu vinahase kupwa vyakwoloka chipwe vyakuhenga. Chakutalilaho vilinga vyakufwana nge kujiha mutu, nakupika mutu, nakusavala kanyike wamundende vavimona kupwa vilinga vyavipi chikuma. Kaha vilinga vyakufwana nge kupwa namuchima wamwaza, nakeke, nakutetela vavimona kupwa vilinga vyamwaza kuvatu vavavulu. Oloze vatu vavavulu vashinganyeka ngwavo kahatwama kusakula vyuma vyakwoloka chipwe vyakuhenga havihande vyakutalisa kukusakula mutu wakulisavala nenyi, chipwe kuhanjika muchano chipwe mwakulelela vanako. Vashinganyeka ngwavo kala vyuma mwasakula kulinga mutu vyakwoloka. Kakavulu vatu veji kusakulanga vyakulinga kweseka nomwo vali nakwivwa vavene nomwo vali nakwivwa vatu vali navo. Uno jila kana yakwoloka tahi?

Twavula kusakula kulinga vyuma kweseka nomwo twamwenamo vyuma vyakwoloka nevi vyakuhenga. Kaha chuma cheji kutukafwanga tulinge ngocho shina chivezu. (Wavaka-Loma 2:​14, 15) Navanyike veji kutachikizanga nge vyuma vinapihi, kaha navakiko veji kulihananga mulonga kachi nge vanalimbenje. Mukuhita chalwola chivezu chetu cheji kuzatanga kweseka navyuma tunalinangula mutanga, nakuli masepa, nakuli milongeshi, nakuvatu vamuchitungilo, nakuliuka lyakwitava nakuchisemwa chetu. Shikaho nge tunasakula vyakulinga, chivezu chetu cheji kutulwezanga numba nge vyuma tunasakula vinalitombola navyuma twalinangula chipwe chiku.

Jila twamwenamo vyuma vyakwoloka nevi vyakuhenga yinahase kutulingisa twivwile vatu keke, nakuvasakwilila, nakusolola muchima wamwaza nakuvatetela. Yinahase nawa kutulingisa tuhone kulinga vyuma vize navivwisa kupihya vaze twazanga chipwe kutusawisa, nakutulingisa tuliveye nakulihana milonga.

Uno shimbu yosena twatela kusakula kulinga vyuma kweseka nomwo tuli nakwivwa tahi? Omu Garrick apwile mukweze asakwile kuyoya mujila yize ambile yivene ngwenyi: “Ngwalingilenga kala vyuma vize ngwamwenenga ngwami vyakwoloka.” Oloze awanyine nge kulinga vyuma vize amwenenga ngwenyi vyakwoloka chamunehelelenga ukalu. Aputukile kuyoya mujila yize ahanjikile  ngwenyi “jila yamilima mwomwo yavilinga vyakuhuka ngwalingilenga, nakuzachisa maundu akupendesa, nakunwa chikuma wala nakulinga ulyanyi.”

Shimbu jimwe nawa tweji kusakulanga vyakulinga kweseka nomwo navashinganyeka vakwetu havyuma natusakula. Echi chinahase kutukafwa tunganyale kuvyuma vanahichimo mukuyoya nakumangana avo. Kaha nawa veji kutuvumbikanga kuli vausoko, namasepa nakuvatu vaze twatunga navo kachi nge natulinga vyuma vize navamona ngwavo vyakwoloka.

Uno shimbu yosena twatela kusakula kulinga vyuma kweseka nomwo vali nakwivwa vakwetu tahi? Omu Priscila apwile mwanapwevo alingilenga vyuma vize valingilenga vakwavo vakweze nakulinga ujila. Oloze awanyine nge kulinga vyuma vize vamwenenga vakwavo ngwavo vyakwoloka kachamusuulwishilengako. Ambile ngwenyi: “Kulinga vyuma vize valingilenga vatu vosena kachangusuulwishilengako. Oloze changulingishile ngulinge vyuma vyavipi vize vyangunehelelele ukalu.”

Numba tuhu omwo tweji kwivwanga nomwo veji kwivwanga vakwetu, vinahase kutukafwa tusakule kulinga vyuma vyakwoloka nakulihenda kukusakula vyuma vyakuhenga, oloze vyuma kana kavyeshi kuhasa kutukafwa tusakule kulinga vyuma vyakwoloka lwola lwosenako. Tuhase kulifwelela etu vavene nakuhona kumona ngwetu vyuma natusakula navitunehela ukalu chipwe kunehela vakwetu ukalu. (Vishimo 14:12) Numba nge etu navakwetu natumona vyuma vimwe ngwetu vyakwoloka, oloze vyuma kana vinahase kutunehela ukalu, kaha twatela kuvyalumuna. Kuli vyuma vize vamwenenga vatu kunyima ngwavo vyakuhenga, oloze jino oholyapwa vatu vavavulu vanavitavila, kaha nawa vyuma vamwenenga vatu kunyima ngwavo vyakwoloka, oholyapwa jino vali nakuvimona kupwa vyakuhenga.

Uno kuli jila yamwaza yakusakwilamo kanawa vyakulinga vyakwoloka tahi? Uno kuliko jindongi jakwolola twatela kukavangiza jize kajeshi kukatulingisa tukaliveye kulutweko tahi?

Twatokwa chikuma hakupwa nachuma chize chinahase kutwaminyina kanawa vatu vosena. Chihande nachikavangizaho nachishimutwila havyuma navitukafwa tusakule kanawa vyuma vyakwoloka nakulihenda kuvyuma vyakuhenga.