Kusakula Vyuma Vyakwoloka Chipwe Vyakuhenga: Jindongi Jize Jeji Kukafwanga Vatu
Mbimbiliya yinakafwe vatu muvyuma viwana vyamukuyoya kaha echi chinasolola nge twatela kuyifwelela.
1. Ulo
Vatu vatwama navishinganyeka vyakulisezaseza kutalisa kuulo nakuvyuma vinahase kuvalingisa vapwenga vakuwahilila muulo.
MBIMBILIYA YAHANJIKA NGWAYO: “Enu nawa mutu himutu azangenga pwevo lyenyi nganomu alizanga ivene. Kaha nawa pwevo atela kupwa nakalemesa chikuma kuli lunga lyenyi.”—Wavaka-Efwesu 5:33.
MWALUMBUNUKILA MAZU KANA: Kalunga ikiye ahakileko ulo, ngocho atachikiza vyuma vinahase kukafwa valunga napwevo valimbata vapwenga vakuwahilila. (Mako 10:6-9) Vaze valimbata veji kupwanga vakuwahilila kachi nge mutu himutu mwashishika havyuma vize vinahase kuzamisa ulo wavo keshi havyuma vize mwanganyalako. Lunga uze azanga puwenyi eji kumusolwelanga zangi kuhichila muvyuma vize mwamulingila nakumuzakama. Kaha pwevo uze avumbika lunga lyenyi eji kulinganga ngocho muvilinga namuhanjikiso.
JINDONGI JAMUMBIMBILIYA JEJI KUKAFWANGA VATU: Quang naThi, vamuVietnam, vashinganyekelenga ngwavo kaveshi kukapwa vakuwahilila muulo wavoko. Quang apwilenga namuchima waupi. Ambile ngwenyi: “Lwola lwosena ngwahanjikile mazu aze evwishilenga kupihya puwami Thi, kaha kangwazakaminenga omwo evwilenga kumuchimako.” Thi asakile valilukulule. Ambile ngwenyi: “Ngwevwilenga ngwami kangweshi kuhasa kutwalaho kufwelela nakuvumbika lunga lyamiko.”
Mukuhita chalwola Quang napuwenyi Thi valinangwile vyuma yanangula Mbimbiliya nomwo vanahase kukavangiza mazu atwama hali Wavaka-Efwesu 5:33 muulo wavo. Quang ambile ngwenyi: “Eyi vesi yangukafwile ngumone ngwami ngwatela kuputuka kutetela Thi nakumuzakama kumujimba namuvishinganyeka. Kulinga vyuma kana chamulingishile anguzange nakunguvumbika.” Kaha nawa puwenyi Thi ambile ngwenyi: “Kukavangiza mazu atwama hali Wavaka-Efwesu 5:33 nakuvumbika lunga lyami chamulingishile anguzange, nakunguzakama nakungulingisa nguunde muchima.”
Nge muli nakusaka mijimbu yayivulu yahanjika haulo, kaha tangenu Tonenu! Na. 2 2018, yili ha jw.org yakwamba ngwavo “Vyuma 12 Vize Navikafwa Jitanga Jifukile.”
2. Mwakutwamina naVakwetu
Vatu vavula kuyanjisa vakwavo vakufuma kumiyachi, namafuchi, nasolokeso, nakumauka akwitava eka, chipwe kumona mutu ulumbi mwomwo yakupwa wapwevo chipwe walunga.
MBIMBILIYA YAHANJIKA NGWAYO: “Vumbikenunga vatu vosena.”—WaPetulu 1, 2:17.
MWALUMBUNUKILA MAZU KANA: Mbimbiliya kayakundwiza vatu vaze veji kuhunganga vatu vakuvisemwa vyeka, nakumafuchi eka chipwe vaze veji kulisavalanga navatu vausonyi woumweko. Oloze yatukolezeza tuvumbikenga vatu vosena chamokomoko nalifuchi nachikova chavo, chipwe vapwa vihutu chipwe vapichi. (Vilinga 10:34) Numba tuhu vyuma vafwelela vatu vamwe navilinga vyavo vyalimbalaka navyetu, oloze twatela kutwalaho lika kavavumbika.—Mateu 7:12.
JINDONGI JAMUMBIMBILIYA JEJI KUKAFWANGA VATU: Daniel vamunangwilenga amonenga vatu vafuma kuAsia kupwa vaka-kole. Ngocho ahungilenga vatu vosena vaze vafuminenga kuAsia, kaha avatukanyinenga hakachi kavatu. Daniel ambile ngwenyi: “Ngwamwene ngwami chuma ngwalingilenga kachapihileko mwomwo ngwakingilenga lifuchi lyetu. Kangwashinganyekele ngwami ngwalingilenga chuma chachipiko.”
Kutwala muze Daniel alinangwile muchano wamuMbimbiliya. Ambile ngwenyi: “Ngwatelelele chikupu kwalumuna vishinganyeka vyami. Ngwatelelele kumona vatu ngana muze avamona Kalunga. Atumona kupwa tuvovamwe chamokomoko nokwo twatwama.” Daniel ahanjikile omwo eji kwivwanga makumbi ano kachi nge naliwane navatu. Eji kwambanga ngwenyi: “Kangwashinganyeka okwo vanafumuko. Makumbi ano ngwazanga vatu vosena, kaha nawa ngwatwama namasepa vakumafuchi akulisezaseza.”
Nge muli nakusaka mijimbu yayivulu, kaha tangenu Tonenu! Na. 3 2020, yili ha jw.org yakwamba ngwavo “Kutala Ulumbi Vanahase Kuufumisako Tahi?”
3. Jimbongo
Vatu vavavulu vafwila kupwa naluheto mangana vapwenga vakuwahilila nakukayoya kanawa kulutwe.
MBIMBILIYA YAHANJIKA NGWAYO: “Mangana apwa mukingo, nge omu jimbongo japwa mukingo. Oloze eyi yikiko nganyo yachinyingi: Mangana eji kulamanga kuyoya chayauze ali nawo.”—Muka-kwambulula 7:12.
Mwalumbunukila Mazu Kana: Twasakiwa jimbongo, oloze kajeshi kutulingisa tupwenga vakuwahilila chipwe tukayoye kanawa kulutweko. (Vishimo 18:11; 23:4, 5) Oloze kuwahilila chamwenemwene nakupwa nakuyoya chamwaza kulutwe chapendamina hakukavangiza mangana akufuma kuli Kalunga aze atwama muMbimbiliya.—WaChimoteu 1, 6:17-19.
JINDONGI JAMUMBIMBILIYA JEJI KUKAFWANGA VATU: Cardo lunga wakuIndonesia, afwililile chikuma kupwa naluheto. Ambile ngwenyi: “Ngwapwile navyuma vyosena vize vafwila kupwa navyo vatu. Ngwayilenga kuvihela vyakulisezaseza, nakulanda vyuma vyamwaza vyaulangaji, jiminyau najizuvo.” Oloze luheto kana kalwashimbwileko. Ambile nawa ngwenyi: “Jimbongo jami jize ngwazachililile hamyaka yayivulu vajivile mukapyapya kakandende. Ngwazachishile kuyoya chami mangana kutonde luheto, oloze lwosena lwayile mwanganavene, kaha ngwalivwile jino kupwa nguwamokomoko kaha nawa nguwakukuminamo.”
Cardo aputukile kukavangiza jindongi jamuMbimbiliya jize jahanjika hajimbongo. Kafwila cheka kuzachisa ngolo jenyi mangana apwenga naluheto lwaluvuluko, oloze afwila kwashiwisako chiyoyelo chenyi. Ambile ngwenyi: “Oholyapwa jino nguli naluheto lwamwenemwene mwomwo nguli nausoko wakukola naKalunga. Nge ngunasavala kangwalizakaminako, kaha nawa ngwapwa nguwakuwahilila.”
Nge muli nakusaka mijimbu yayivulu yamuMbimbiliya yize yahanjika hajimbongo, kaha tangenu chihande chili ha jw.org chakwamba ngwavo “Uno Shikola naJimbongo Vinahase Kuneha Chiyoyelo Chamwaza Tahi?” muKaposhi Kakutalila Na. 3 2021.
4. Kulisavala
Vatu vatwama navishinganyeka vyakulisezaseza kutalisa kuchihande chakulisavala.
MBIMBILIYA YAHANJIKA NGWAYO: “[Lihendenu] kuujila. Mutu himutu atachikize mwakulamina mujimba wenyi ivene mukujila namukavumbi, keshi nachipululu napeha yayipi yakusaka kulisavalako, ngana mwavaka-mafuchi vaze vahona kutachikiza Kalunga.”—Wavaka-Tesolonyika 1, 4:3-5.
MWALUMBUNUKILA MAZU KANA: Mbimbiliya yahakako jishimbi jakukavangiza kutalila kuchihande chakulisavala. Lizu “ujila” lyazata nakuukoji, nakuuhule, nakukulisavala chavatu vaze kavalimbatako, nakukulisavala chavatu vausonyi woumwe, nakukulisavala nakanyama. (Wavaka-Kolinde 1, 6:9, 10) Kulisavala chapwa wana wakufuma kuli Kalunga uze asakile ngwenyi valivwisengawo kaha kuwaha kuli valunga napwevo vakulimbata.—Vishimo 5:18, 19.
JINDONGI JAMUMBIMBILIYA JEJI KUKAFWANGA VATU: Kylie pwevo umwe wamuAustralia ambile ngwenyi: “Hakuwana nge ngwapwile ngumujike, ngwashinganyekelenga ngwami nge nangulisavala nalunga kaha navanguzanga nakupwa wakukingiwa. Oloze omu keshi mukiko chapwileko, ngwahombele nakulivwa kupwa nguwamokomoko.”
Kutwala muze Kylie alinangwile vyuma yahanjika Mbimbiliya hachihande chakulisavala nakuvikavangiza. Ambile ngwenyi “Ngunamono jino ngwami jindongi jaKalunga japwilako kutukafwa tuhone kwivwanga kukola kumuchima mwomwo yakusakula vyuma vyakuhenga. Oholyapwa nguli nakulivwa kupwa wakukingiwa mwomwo yakulinga vyuma vize Yehova asaka tulinge. Kukavangiza jindongi jatwama muMbimbiliya chinangukafwe nguhone kwivwanga kukola kumuchima mwomwo yakusakula vyuma vyakuhenga.”
Nge muli nakusaka mijimbu yayivulu, kaha tangenu chihande chakwamba ngwavo “Mbimbiliya Yahanjika Ika Hali Valunga naPwevo Kutwama Hamwe Okunyi Kavalimbatako?” chili ha jw.org.
Tengi yetu eji kutukafwanga tutachikize vyuma vyakwoloka nevi vyakuhenga. Numba tuhu kukavangiza jindongi jenyi jahanjika havilinga vitoma chapwa chachikalu, oloze chapwa changanyo. Twafwelela chikupu ngwetu kukavangiza jindongi jenyi nachitukafwa tupwenga vakuwahilila mukuyoya chetu chosena.
