Kusakula Vyuma Vyakwoloka Chipwe Vyakuhenga: Lyapwa Lisesa lyaMutu hiMutu
Jishimbi jize natukavangiza mukuyoya jinahase kutulingisa tupwenga vakuwahilila mukuyoya chipwe nduma. NaYehova Kalunga atachikiza chuma kana. Shikaho asakila tukavangizenga jishimbi jenyi.
Yehova asaka tupwenga vakuwahilila nakusuuluka mukuyoya.
“Ami Yehova yami Kalunga kenu, Ou eji kuminangulanga mangana munganyale, Ou eji kumitwaminyinanga mujila yize mwatela kuya. Kachi nge namwivwililanga jishimbi jami kaha kuunda chenu nachipwanga nge kalwiji, kwoloka chenu nachipwanga nge makimba akalungalwiji.”—Isaya 48:17, 18.
Hakupwa Kalunga ikiye Tengi yetu atachikiza jila yamwaza twatela kuyoyelamo. Asaka tukavangize jindongi jenyi mwomwo najitunganyalisa. Kachi nge natukavangizanga vyuma mwatulweza Kalunga, kaha katweshi kulizakaminanga havyuma natusakulangako, mwomwo shimbu yosena natusakulanga vyuma vyamwaza vize navitukafwa tupwenga vakuunda nakuwahilila.
Yehova katulweza tulinge vyuma vize katweshi kuhasako.
“Jishimbi eji nangumihana likumbi lyalelo kajeshi jajikaluko, kaha nawa kajeshi kwakusuku nayenuko.”—Lushimbi lwamuchivali 30:11.
Yehova ashika kukafwa vatu vaze navasakula kukavangiza jindongi jenyi.
“Mwomwo ami Yehova Kalunga kove nangukukwachililanga nalivoko lyami lyachilyo, Yami nguli nakukulweza ngwami, ‘Kanda nawivwa womako, nangukukafwa.’”—Isaya 41:13.
Tunahase kuyoya kweseka najishimbi jaKalunga mwomwo mwatukafwanga. Mwatukafwa kuhichila muMazu enyi Mbimbiliya yize yeji kutukolezezanga nakutuhana lutalililo.
Vatu vavavulu mukaye kosena vawana ngwavo kuyoya kweseka najindongi jamuMbimbiliya chinavakafwe chikuma mukuyoya chavo. Shikaho munahase kulinangula jindongi jamwaza jajivulu jize jatwama muMbimbiliya. Munahase kuputuka hakulinangula mumbuloshuwa yize yahanjika haMbimbiliya yaLivwise Kuwaha Kuyoya Haya Myaka, yili ha jw.org. Mwatwama vilongesa vino:
-
Uno Mbimbiliya Yinahase Kukukafwa Ngachilihi?
-
Mbimbiliya Yatushika Vyuma Vyamwaza
-
Uno Wafwelela Vyuma Yahanjika Mbimbiliya Tahi?
Omu namutanga Mazu aKalunga Mbimbiliya namumona ngwenu kawasekako, oloze ‘atamo kuwafwelela oholyapwa nahaya myaka yosena.’ (Samu 111:8) Kukavangiza jishimbi jamuMbimbiliya jakwoloka chapwa chachilemu chikuma mukuyoya chetu. Kaha nawa Kalunga katushinjila tujikavangizeko. (Lushimbi lwamuchivali 30:19, 20; Yoshuwa 24:15) Oloze mutu himutu atela kulisakwila ivene.