Namukumbulula ngwenu ngachilihi nge navamihulisa ngwavo, “Uno munakusaka kuyoya myaka yosena tahi?” Vatu vavavulu vanahase kwitavila ngwavo eyo, oloze ngwavo kacheshi kuhashiwako mwomwo vatu vosena veji kufwanga.

Nyi ngachilihi nge vanamihulisa ngwavo, “Kutala namusaka kufwa tahi?” Vatu vavavulu vanahase kukumbulula ngwavo nduma. Mwomwo ika? Mwomwo vatutenga namuchima wakufwila kuyoya, chamokomoko naukalu natumona. Mbimbiliya yahanjika nge Kalunga atengele vatu namuchima wakusaka kuyoya myaka yosena. Yahanjika ngwayo, “Nahake kuyoya chahaya myaka yosena mumichima yavo.”—Muka-kwambulula 3:11.

Oholyapwa vatu kaveshi nakuyoya myaka yosenako, shikaho tunahase kulihulisa ngwetu, Uno vyuma muka vyaneha ukalu kana? Kutala Kalunga alingako vyuma vimwe mangana akumise ukalu kana tahi? Mbimbiliya yakumbulula kanawa vihula kana, novyo vyalingishile Yesu ayande nakufwa.

Tupetulu vatatu vakulivanga vamumukanda waKuputuka, vatulweza nge Kalunga akiswile valunga napwevo vakulivanga Alama naEve mangana vayoyenga myaka yosena, navyuma vatela kulinga mangana vayoye myaka yosena. Tupetulu kana nawa vatulweza ovyo vahonenene kwononoka kuli Kalunga nakujimbalisa kuyoya vavashikile. Vatu vamwe vamona mujimbu kana nge wakutaka kaha, oloze ngana mwaMikanda yamujimbu wamwaza namukanda waKuputuka wahanjika vyuma vyakwoloka. *

Vyuma muka vyafuma hakulikanga chaAlama? Mbimbiliya yamba ngwayo: “Nge muze shili yengilile mukaye kuhichila muli mutu umwe [Alama] nakufwa nawa kuhichila mushili, ngocho kufwa chatanda kuli vatu vosena mwomwo vosena valingile shili.” (Wavaka-Loma 5:12) Hakulikanga chenyi, Alama alingile shili. Ngachize, kahashile cheka kuyoya myaka yosenako, kaha afwile. Hakupwa tuvana vaAlama, tuvosena twaswana shili, namisongo, naushinakaji, nakufwa. Navaka-sayasi vetavila ngwavo vatu veji kuswana misongo yimwe kuli visemi  javo. Uno Kalunga nalingiko vyuma vimwe mangana akumise ukalu kana tahi?

Kalunga awahisa vyuma mangana asokole vatu kuvihuli vize vyeza mwomwo yashili avulumwine Alama. Echi chalingisa vatu vakahase kuyoya myaka yosena. Uno Kalunga alinga ngachilihi chuma kana?

Mbimbiliya yamba ngwayo: “Fweto yashili kufwa.” (Wavaka-Loma 6:23) Echi chalumbununa nge kufwa cheza mwomwo yashili. Alama avulumwine shili, ngocho afwile. Evi vikiko vyalingisa vatu vosena vafwenga. Kakweshi mutu mwahasa kuchina kufwako, mwomwo twasemuka nashili. Oloze Kalunga atumine Mwanenyi Yesu, kwiza nakutusokola ‘kushili.’ Uno Yesu atusokola ngachilihi?

Hakuwana nge Alama uze apwile mutu wakukupuka kononokele Kalungako ngocho anehele shili nakufwa, ngachize kwasakiwile mutu wakupuka mangana atusokole kushili kana. Mbimbiliya yahanjika ngwayo: “Nge muze vavalingishile vavavulu kupwa vaka-shili hakulikanga chayauze mutu umwe, mukiko nawa munavavalingisa vavavulu kupwa vakwoloka hakwononoka chayauze mutu umwe.” (Wavaka-Loma 5:19) Uze “mutu umwe” ikiye Yesu. Afumine mwilu nakwiza hamavu mwamutu wakukupuka * nakutufwila. Echi chatulingisa tupwenga nausoko naKalunga nakupwa nalutalililo lwakuyoya myaka yosena.

Mwomwo ika Yesu afwililile? Kutala Kalunga Wangolo Josena keshi kahashile kuhanjika kaha ngwenyi vana vaAlama vayoye myaka yosenako tahi? Eyo, kachi ahashile vene. Oloze chuma kana kachi kachayile mwaya jishimbi jenyi jakuvuluka nge fweto yashili kufwa. Enga, lushimbi kana lwazama mbe, kaha kalwalumuka chamwalumukilako mwomwo lwazama hachiyulo chakwoloka.—Samu 37:28.

Nge Kalunga alumwine elu lushimbi halwola kana, kachi vatu vafwefulula jishimbi jenyi jikwavo. Uno kachi chinapu chakutamo kuli Kalunga  kusakulaho vatu vamwe nakusezaho vakwavo mangana vakayoye myaka yosena tahi? Kutala vatu kachi vamumona ngwavo apwa wakwoloka tahi? Hakuwana nge Kalunga eji kulinganga mwaya chiyulo chenyi, chatukafwa tufwelele ngwetu mwalinganga lika vyuma vyakwoloka.

Kufwa chaYesu chakulihana ivene, chasokolwela vatu jila yakukayoyela muPalachise hano hamavu myaka yosena. Yesu ahanjikile mazu vasoneka hali Yowano 3:16 ngwenyi: “Kalunga azangile chikuma kaye ngocho ahanyine Mwanenyi umwe kaha wakulipwila, mangana ngwenyi weshowo mwamufwelela vakahone kumunongesa, oloze akapwe nakuyoya chahaya myaka yosena.” Yesu hakulisuula kufwa asolwele nge azanga vatu kaha nawa akundwiza chiyulo chaKalunga.

Mwomwo ika Yesu ayanjilile nakufwa mujila yayipi ngana muze vasoneka muMikanda yaMujimbu Wamwaza? Kwononoka nakushishika chenyi muukalu chalingishile afwefulule Liyavolo uze ahanjika ngwenyi vatu kaveshi kuhasa kuzachila Kalungako nge vali muukalu. (Yopa 2:4, 5) Mazu ahanjikile Satana asolokele kupwa amuchano halwola afungulwile Alama. Oloze Yesu anonokele Kalunga chamokomoko naukalu. (Wavaka-Kolinde 1, 15:45) Ngachize, asolwele hatoma nge, naAlama nge asakile, kachi ononokele kuli Kalunga. Yesu atusela chakutalilaho chamwaza chakwononoka Kalunga chamokomoko navyeseko. (WaPetulu 1, 2:21) Ngocho Kalunga amuhana kuyoya chakuzeneka kufwa mwilu.

Chikupu vene, Yesu afwile nakutusokolwela jila yakuyoya chamyaka yosena. Uno nayenu muli nakusaka mukayoye myaka yosena tahi? Yesu atulweza vyuma twatela kulinga hakwamba ngwenyi: “Echi chikiko kuyoya chahaya myaka yosena, kukutachikiza ove Kalunga umwe kaha wamuchano, nayou nawa watumine, Yesu Kulishitu.” —Yowano 17:3.

Vaka-kusoneka mangazini yino vali nakumilomba mulinangule chikuma vyaKalunga wamuchano Yehova, naMwanenyi Yesu Kulishitu. Vinjiho jaYehova vamungalila yenu navawahilila kumikafwa. Munahase kuwana mijimbu yikwavo hakeyala ya www.pr418.com/lue.