Blessing * vamwongele hakumufwelelesa ngwavo mwaya nakwingila milimo yakuwahisa vatu jikambu kulifuchi lyaEurope. Oloze omu ahetele kuze vaputukile kumuveta lika hamakumbi 10. Kaha nawa vamulweze ngwavo vaka-tanga yenyi kwimbo navavajiha, ngocho vamukanjikijile etavile kulinga ujila mangana akindulwise jimbongo vazachishile hakumuneha kuEurope.

Blessing vamulwezele awane jimbongo jakuheta ku 200 na 300 euros hakulinga ujila ufuku umwe mangana afwete 40,000 euros. * Blessing ambile ngwenyi, “kakavulu ngwasakilenga kusokoka, oloze ngwevwilenga woma ngwami vanahase kuyanjisa vaka-tanga yami. Ngwahonene vyakulinga.” Mujimbu waBlessing walifwana namijimbu yavatu vavavulu vaze vali nakuhita muukalu woumwe.

Munahichi kafwe myaka 4,000, kufuma haze Yosefwe vamulanjishile vandumbwenyi. Kaha apwile jino ndungo muzuvo yamutu umwe wamulemu wamuEjipitu. Hakavanga Yosefwe kavamuyanjishile kuli uze mwenya zuvo ngana muze chapwile kuli Blessingko. Omu pwevo lyamwata wenyi amulwezele ngwenyi valisavale, ikiye akanyine ngocho vamuvangijikilile ngwavo napiki pwevo lyamwata wenyi. Echi chamulingishile vamukase malenge nakumuhaka mukamenga.—Kuputuka 39:1-20; Samu 105:17, 18.

Yosefwe apwile ndungo kushikulu, oloze Blessing apwile ndungo mulikulukaji lyamyaka lyakusokesa 21. Vosena valingile vakulanjisa kuli vakwavo vatu ngana muze navalanjisa vyuma mangana vawanyineho jimbongo.

Jita yapwile hijila yimwe yayashi yize vaka-mafuchi vakwachililengamo vandungo. Vatu vamba ngwavo Mwangana wavaEjipitu Thutmose III akindulwishile vafunge 90,000 hanyima yakulwa jita muKanane. VaEjipitu vazachishilenga ava vandungo mumingochi, namumulimo wakutunga jitembele, nakufula tupila.

 MuWangana wavaLoma, jijita jalingishilenga vatu vakwate vandungo vavavulu, kaha shimbu jimwe echi kukwata vatu undongo chanehelenga jita. Mijimbu yasolola nge mulikulukaji lyamyaka lyakulivanga, vandungo vakwachile vavulile chikuma nakweseka hamwe nachimbwa chavatu vatwaminenga munganda yaLoma. Vandungo vamuEjipitu namuLoma vavayanjishilenga chikuma. Chakutalilaho, vandungo vaze vazachilenga mumingochi yamuLoma vatelelele kuzata kaha myaka 30.

Kutwala muze, vandungo kavavasolwelelenga likojiko. Kufuma mulikulukaji lyamyaka lyakusokesa 16 nakuheta kulikulukaji lyamyaka lyakusokesa 19, litungu lyaAfrica naAmerica lyazanyinenga chikuma mukulanda nakulandulula vandungo, kaha chanehele nganyo yayinene mukaye kosena. Mujimbu waliuka lyaUNESCO wambile ngwawo, ‘malunga, namapwevo, navana vakuheta kafwe jimiliyoni 25 najimiliyoni 30 vavakwachile nakuvalanjisa.’ Veka nawa vamba ngwavo vatu vavavulu chikuma vanafunga hakuzauka kalungalwiji waAtlantic. Olaudah Equiano, ndungo uze ayovokele ambile ngwenyi: “Miteto nakulyonyinga chamapwevo vaze vafwilenga hakalwiji vyanehelenga ushona waunene chikuma.”

Chaluvinda, undungo kawapwile kaha kushikuluko. Liuka lyaInternational Labour Organization lyawana nge, namakumbi ano malunga, namapwevo, navana vakuheta kujimiliyoni 21 vali muundungo, kaha veka nawa veji kuvazachisanga wana chipwe kuvahana jimbongo jajindende. Makumbi ano, vandungo vali nakuvazachisa mumingochi, namujifakitoli jakutungatunga najakufwatula tumenga, namujizuvo jakulingila ujila, nakujizuvo javatu. Numba tuhu kuyanjisa vatu vachikanyisa, oloze chinakutohwelako lika.

Vandungo vavavulu vafwila kuvasokola mwomwo yaluyanjisa chikuma. Mulikulukaji lyamyaka lyakulivanga B.C.E., lunga wakutakama navandungo vamwe 100,000 vesekele kulikanga kuli vaLoma oloze vahonene. Mulikulukaji lyamyaka lyakusokesa 18, vandungo vakulitungu lyaCaribbean muHispaniola vafumbukilile vamyata javo. Luyanjisa luze vahichilemo vandungo vaze vazachishilenga muwande wamisachi lwakatwile jita yakulitala hamiyachi yize yambachile myaka 13 nakulingisa lifuchi lyaHaiti lipwenga lyakulimanyina mu 1804.

Kusokoka chavaIsalele kufuma muundungo wamuEjipitu, chapwile chakulipwila hakusokoka chosena mukuyoya chavatu. Atela vatu vakuheta kujimiliyoni jitatu vavasokwele muundungo mulifuchi lyaEjipitu. Chikupu vene, chapwile chakutamo kuvasokola. Mbimbiliya yalumbununa kuyoya chavo omu vapwile muEjipitu ngwayo “vavayanjishilenga chikuma  chakuzeneka kuvatetela.” (Kulovoka 1:11-14) Chalingishile namwangana Fwalo alweze vatu jenyi vajihe vakemba javaIsalele kuchina navavula chikuma.—Kulovoka 1:8-22.

Kusokoka chavaIsalele muundungo wamuEjipitu chapwile chakulipwila mwomwo Kalunga ikiye avasokwele. Kalunga alwezele Mose ngwenyi: “Ngunatachikiza kanawa vihuli vali nakuhitamo, nangushikumuka ngukavapululule.” (Kulovoka 3:7, 8) Namakumbi ano vaYuleya mumafuchi avo veji kulinganga Chilika chakwanuka kusokoka chavo.—Kulovoka 12:14.

Mbimbiliya yamba ngwayo: “Yehova Kalunga ketu keshi kuhengesa chiyulo.” Yatukolezeza nawa ngwayo, Kalunga kalumukako. (Mijimbu 2, 19:7; Malaki 3:6) Kalunga atumine Yesu ‘avilike kuli vafunge mujimbu wakuvasokola . . . , nakusokola vaze vanahombo.’ (Luka 4:18) Uno echi chalumbununwine kukuma chaundungo wosena tahi? Nduma. Yesu vamutumine asokole vatu kuundungo washili nakufwa. Kutwala muze Yesu ambile ngwenyi: “Muchano naumilingisa kupwa vakulihehwa.” (Yowano 8:32) Namakumbi ano, muchano uze anangwile Yesu unakusokola vatu mujijila jajivulu.—Talenu lipwata lyakwamba ngwavo “ Kusokoka kuUndungo Wosena.”

Kaha nawa Kalunga asokwele Yosefwe naBlessing muundungo mujila yakulihandununa. Munahase kuwana mujimbu waYosefwe muMbimbiliya mumukanda waKuputuka kapetulu 39 nakuheta 41. Kusokoka chaBlessing nachikiko chapwile chakulipwila.

Omu vamuhangile mulifuchi limwe lyamuEurope, Blessing ayile nakutwama kuSpain. Omu ahetele kuze aliwanyine naVinjiho jaYehova, kaha aputukile kulinangula Mbimbiliya. Hakusaka kuwahisa chiyoyelo chenyi, awanyine milimo nakulweza uze mukulwane wenyi twavulukanga hakavanga akeheseko seteko yakufweta uze mukuli kakweji hikakweji. Likumbi limwe, Blessing vamutuminyine shinga kufuma kuli uze mukulwane wenyi. Atumine shinga mangana Blessing alitwamine kufweta uze mukuli nakumulweza amukonekeleko. Vyuma muka vyamulingishile alinge ngocho? Mwomwo naikiye aputukile kulinangula Mbimbiliya naVinjiho jaYehova. Blessing ambile ngwenyi: “Muchano unakusokola vatu mujila yakulipwila.”

Yehova Kalunga evwile kukola kumuchima haluyanjisa luze vahichilemo vaIsalele muundungo muEjipitu, kahomu mukiko ali nakwivwa hakumona vatu vali nakuvayanjisa mwomwo yachiyulo chachipi makumbi ano. Chikupu vene, nakukapwa kwalumuka chachinene mukaye numba vatu vakasokoke muundungo wosena. Kaha Kalunga ashika kukaneha kwalumuka kanechi. Mbimbiliya yamba ngwayo: “Kuli melu amahya namavu amahya aze tuli nakutalilila nge omu mwaya lushiko lwenyi, kaha namukapwanga kwoloka.”—WaPetulu 2, 3:13