WANA wakulipwila watela kutukunyula tusolole kusakwilila chetu. Yesu ashindakanyine chishina kanechi omu okile malunga 10 vaze vapwile namusongo uze kavahashile kuka halwola luzeko. Lunga umwe hali vaze malunga 10 “ahilukile nakutohwesa Kalunga nalizu lyakukanguka.” Kaha Yesu ambile ngwenyi: “Uno ava vatomesanga kavapwanga 10 koko nyi? Nyi ava 9 vali kulihi?” (Luka 17:12-17) Chishina muka natulinangulaho? Chapwa chachashi kuvulyama vyuma vyavilemu vize navatulingila vakwetu.

Wana wandando yakusokola wapwa wakulipwila chikuma. Wapwa waulemu chikuma kuhambakana mawana osena. Kaha namusolola ngachilihi kusakwilila chenu havyuma vize Kalunga amilingila?

• Tachikizenu owo ahana wana kana. Ndando yakusokola yaneha kuyoya chahaya myaka yosena, oloze vatu vatela kulinga vyuma vimwe numba vakanganyale kundando kana. Yesu alombele kuli Kalunga ngwenyi: “Echi chikiko kuyoya chahaya myaka yosena, kukutachikiza ove Kalunga umwe kaha wamuchano, nayou nawa watumine, Yesu Kulishitu.” (Yowano 17:3) Kachi nge navamilweza ngwavo mutu umwe amipululwile kuponde omu mwapwile muvanyike, kutala kamweshi  kufwila kulinangula vyavivulu hali mutu kana novyo alingilile ngochoko nyi? Yehova Kalunga, uze ahanyine ndando yakusokola ali nakusaka mumutachikize nakutunga usoko wamwaza naikiye. Mbimbiliya yamba ngwayo: “Pandamenu kuli Kalunga, kaha mwapandama kuli enu.”—WaYakova 4:8.

• Fwelelenu mundando yakusokola. “Ou mwafwelela Mwana ali nakuyoya chahaya myaka yosena.” (Yowano 3:36) Uno kufwelela mundando yakusokola chalumbununa ika? Chalumbununa kulingako vyuma vimwe. (WaYakova 2:17) Vyuma muka? Wana unahase kupwa wenu kachi nge namuuzanga nakuwitavila. Shikaho nayenu mwatela kuzanga nakwitavila ndando yakusokola. Mujila muka? Mwatela kulinangula omu Kalunga asaka muzachishilemo kuyoya chenu, nakukavangiza vyuma munalinangula. * Lombenu kuli Kalunga amikonekele nakupwa nachivezu chitoma. Mwatela kufwelela ngwenu wana wandando yakusokola uze atuhana Kalunga naukaneha kuyoya chamwaza, chakukingiwa kaha chakufukila, kuli vosena vaze navafwelela mundando kana.—WavaHepeleu 11:1.

• Pwenunga Kukwanuka Kufwa chaYesu. Yesu ahakileko chilika chamwaka himwaka chize twatela kulinga mangana twanukenga ndando yakusokola. Kutalisa kuchilika kana Yesu ambile ngwenyi: “Lingenunga lika ngocho mungwanukilengaho ami.” (Luka 22:19) Vinjiho jaYehova navakapwa nachilika chakwanuka kufwa chaYesu LyaChivali, April 11, 2017, hakulembalemba chalikumbi. Polongalamu kana nayikambata kafwe ola yimwe, kaha navakahanjika chihande chaMbimbiliya chize nachikalumbununa kulema chakufwa chaYesu nomu nachitunganyalisa oholyapwa nakulutwe. Mwaka wali vatu kafwe jimiliyoni 20 mukaye kosena vapwile kuchilika kana. Tuli nakumisanyika mukapwe hamwe nayetu kuchilika kana mangana tukasolole kusakwilila chetu hawana waulemu atuhana Kalunga.