KAWATO nakwate Jordan mulivoko kanakusoloka kupwa kamavokovoko, oloze kanapu hichuma chimwe chachilemu chikuma kuli ikiye. Jordan ambile ngwenyi: “Vanguhanyineko kuli Russell uze apwilenga sepa lyetu mutanga omu ngwapwile ngukanyike.” Omu alingile Russell hanafu lyehi, Jordan atachikijile jino chikupu ngwenyi Russell azachile mulimo waulemu chikuma kuli kaka yenyi walunga nakuli visemi jenyi halwola vapwile muukalu. Kaha ambile cheka ngwenyi: “Ngunalinangula vyavivulu kuli Russell. Numba tuhu ou wana anguhanyine wapwile waundende, oloze waulemu chikuma kuli yami.”

Nganomu nalumbununa Jordan, vatu vamwe vanahase kumona wana umwe kupwa waulemu, kaha veka nawa wamavokovoko. Oloze kuli uze natambula wana kana nahase kuumona kupwa waulemu chikuma, chipwe kuumona kupwa chuma chandando yayinene. Mbimbiliya yalumbununa wana uze katweshi kuhasa kwesekesa kuwana wekako namazu awenyembo akwamba ngwavo: “Mwomwo Kalunga azangile chikuma kaye ngocho ahanyine Mwanenyi umwe kaha wakulipwila, mangana ngwenyi weshowo mwamufwelela vakahone kumunongesa, oloze akapwe nakuyoya chahaya myaka yosena.”—Yowano 3:16.

Chikupu vene, wapwa hiwana uze nauneha kuyoya chahaya-myaka yosena kuli uze mwautambula. Uno kuli wana weka waulemu uze wahambakana wana kanou tahi? Numba tuhu vatu vavavulu kaveshi kumona kulema chawana kanouko, oloze vaka-Kulishitu vaumona kupwa wana ‘wandando yayinene’ chikuma. (Samu 49:8; WaPetulu 1, 1:18, 19) Mwomwo ika Kalunga ahanyinyine kuyoya chaMwanenyi kupwa wana kuli vaka-kaye?

Kaposetolo Paulu alumbununa vyuma vyalingishile Kalunga alinge ngocho. Ambile ngwenyi: “Kuhichila muli mutu umwe nakufwa nawa kuhichila mushili, ngocho kufwa chatanda kuli vatu vosena.” (Wavaka-Loma 5:12) Mutu watete Alama alikangile kuli Kalunga mukuchisakula, ngocho echi chamulingishile afwenga. Vatu vosena hano hamavu veji kufwanga mwomwo yashili yize alingile Alama.

 “Fweto yashili kufwa, oloze wana uze Kalunga eji kuhananga ukiko vene kuyoya chahaya myaka yosena kuhichila muli Kulishitu Yesu Mwata wetu.” (Wavaka-Loma 6:23) Kalunga atumine Mwanenyi Yesu Kulishitu kwiza hano hamavu ahane kuyoya chenyi chakukupuka mangana asokole vatu kukufwa. Kuhichila muwana kanou vavuluka ngwavo “ndando yakusokola,” vosena vaze navafwelela Yesu navakapwa nakuyoya chahaya myaka yosena.—Wavaka-Loma 3:24.

Vaka-kulemesa Kalunga navakavakisula kuhichila muli Yesu Kulishitu. Kaha Paulu ambile ngwenyi: “Vamusakwililenga Kalunga hawana wenyi wakanyombo uze wahambakana chikuma kuwaha.” (Wavaka-Kolinde 2, 9:15) Chikupu vene, wana wandando yakusokola wapwa waulemu chikuma uze katweshi kuhasa kulumbununa mwosenako. Numba tuhu Kalunga ahana wana wauvulu kuvatu, oloze wana wandando yakusokola wapwa wakulipwila. Mwomwo ika? Mujila muka wana kana walihandununa namawana eka aze Kalunga ahana vatu? * Kaha tunahase kusolola ngachilihi kusakwilila chetu hawana kanou? Tunamilombo mutange vyuma yakumbulula Mbimbiliya havihula kanevi muvihande vivali vinakavangizaho.