OMU Alexandra apwile musacha nakuvandamina vazomboke museto wakwingila mulifuchi lyeka, evwile vatu navahanjika ngwavo “sacha hinayikatuka oloze uze lunga ahanjika lilimi lyaChinese mwasala.” Ngocho asulukile mangana atale vyuma vyapwile nakusoloka, kaha awanyine uze mukweze ahanjika lilimi lyaChinese ali nakuhona kulumbununa kanawa ukalu wenyi kuli muka-kuzata hamuseto mulilimi lyaSpanish. Hakuwana nge Alexandra akungulukile naVinjiho jaYehova mulilimi lyaChinese, ngocho alisuwile amukafwe kulumbununa kanawa mulilimi lyaSpanish.

Ou lunga ahanjikile ngwenyi apwile wamulifuchi vene lize, oloze vamwivile mapapilo enyi amalemu najimbongo. Hakavanga uze muka-kuzata hamuseto ketavilile mujimbu kanako, kaha aputukile nakushinganyekela Alexandra ngwenyi apwile muka-kulandulula vatu. Kutwala muze, muka-kuzata hamuseto etavilile mujimbu kana, oloze afwetesele uze muChinese hakuhona kupwa namapapilo akuzachisa. Hakuwana nge ou lunga ahanjika lilimi lyaChinese kapwile najimbongoko, Alexandra alisuwile kumukongwesa $20. Uze lunga alikomokelele nakusakwilila chikuma, ngocho ahanjikile ngwenyi mwakamuhana jajivulu kuhambakana jize vamukongwesele. Alexandra amulwezele ngwenyi kapwile nakusaka kalyapokoko, oloze awahililile kaha hakumukafwa mwomwo achimwene kupwa chakwoloka. Ngocho ahanyine uze lunga ahanjika lilimi lyaChinese jimangazini nakumukolezeza akalinangule Mbimbiliya naVinjiho jaYehova.

Tweji kuwahililanga chikuma hakwivwa mijimbu yomu vangeji veji kuvasolwelanga likoji, kaha navaka-mauka eka navaze kavetavako veji kusololanga muchima kanou. Kutala nge mwapwile yenu kachi mwalisuwile kukafwa uze mukweze mujila kaneyi tahi? Chihula kanechi chachilemu chikuma mwomwo Yesu ambile ngwenyi: “Kuhana cheji kunehanga kuwahilila chikuma kuhambakana kutambula.” (Vilinga 20:35) Vaka-sayasi navakiko vetavila chuma kana mwomwo vaka-kuhehwojola vamba ngwavo kuhana cheji kutunganyalisanga. Tukekesenu jino tuwane omu kuhana cheji kutunganyalisanga.

Unjiho wauvulu wasolola nge kuhana nakuwahilila vyeji kutambukilanga hamwe. Kaposetolo Paulu asonekele ngwenyi “Kalunga azanga muka-kuhana nakuwahilila.” Paulu apwile nakuhanjika kuli vaka-Kulishitu vaze vahanyinenga wana namichima yavo yosena kuli vandumbwavo vaze vapwile muukalu. (Wavaka-Kolinde 2, 8:4; 9:7) Paulu kapwile nakulumbununa ngwenyi vahanyinenga mwomwo yakuwahililako, oloze ngwenyi vapwile vakuwahilila mwomwo vahanyinenga.

Vaka-kuhehwojola vamwe vamba ngwavo, kuhana cheji kulingisanga mutu apwenga wakuwahilila nakupwa namasepa, nakumufwelela chikuma, nakumulingisa asuuluke. Vaka-kuhehwojola veka nawa vamba ngwavo “kuhana mutu jimbongo cheji kwivwisanga kuwaha uze mwajitambula kuhambakana nge mujizachisa yove ivene.”

Kutala nayenu mwevwaho lyehi ngwenu kweseka nachiyoyelo chenu kamweshi kuhasa kuhana vyuma vyakutamoko nyi? Chishina chachilemu twatela kwijiva shina echi: Mutu himutu nahase kupwa wakusuuluka nge mwapwa “muka-kuhana nakuwahilila.” Nge namuhana namuchima wakuwahilila, kaha kamwatela kulizakamina hakukeha chavyuma namuhanako. Chinjiho chaYehova umwe asonekele mukanda  kuli vaka-kusoneka mangazini yino nakuhakamo wana. Kaha ambile ngwenyi: “Hamyaka yayivulu ngwahanyinenga mawana amandende chikuma kuZuvo yaWangana.” Ambile nawa ngwenyi: “Yehova Kalunga nanguhane vyavivulu kuhambakana vize ngunahane. . . . Ngunasakwililako hakungukafwa nguhane wana kanou, echi chinakunguvendejekanga.”

Wana kawapwa jimbongo kahako. Kwatwama vyuma vyavivulu tunahase kuhana.

Mbimbiliya yamba ngwayo: “Mutu walikoji eji kulinganyalisanga ivene, oloze mutu waukenya eji kulinehelanga ukalu.” (Vishimo 11:17) Vatu valikoji vaze vatwama namuchima wakuhana, veji kulisuulanga vavene nakuzachisa lwola lwavo, najingolo javo, nakuzakama vakwavo navyuma vyeka. Kulinga ngocho cheji kuvanganyalisanga mujijila jajivulu kuhakilako nakulikangula chamijimba yavo.

Vaka-kuhehwojola vawana nge vatu vaze veji kukafwanga vakwavo veji kukehesangako ukalu wakuhomba, namisongo yeka. Chikupu vene, cheji kuvakafwanga valikangule kumujimba. Muchima wakuhana weji kukafwanga vaze vaviza misongo yakufwana nge multiple sclerosis chipwe HIV. Muchima kana weji kukafwanga navaze vanakufwila kwecha tato yakunwanga chikuma wala vahone kukindulukila kutato kana nakukehesako ukalu wakuhomba.

Vaka-kuhehwojola vahanjika ngocho, mwomwo kuhana cheji kulingisanga mutu apwenga “namuchima wakeke, nalikoji nakukafwa mutu akeheseko vishinganyeka vyavipi.” Kuhana nawa chinahase kukehesako misongo yamuchima nakulizakamina. Vatu vaze vafwisa vaka-mahyavo veji kukehesangako ukalu wakulizakamina nge navafwila kukafwa vakwavo.

Chikupu vene, kuhana chatwama nanganyo yayinene.

Yesu akolezezele vaka-kumukavangiza ngwenyi: “Pwenunga muvaka-kuhana, kaha vatu navakamihana nayenu nawa. Navakahingunwina mujisweko jenu chesekelo chamwenemwene, chakujinda, chakunyukumuna, chakuzalilila. Mwomwo chesekelo chize muli nakwesekelanga nacho vakwenu, chikiko navakamyesekela nacho nayenu nawa.” (Luka 6:38). Nge namupwa namuchima wakuhana, kaha vatu munakuhana navapwa vakuwahilila nakuvalingisa navakiko vapwenga namuchima kana. Kuhana cheji kulingisanga vatu valinunge hamwe nakutunga usepa wakukola.

Vaka-kuhehwojola vaze valinangula vyatwamiso yavatu vawana nge “vatu vaze vakwechi muchima wakuhana veji kukafwanga navakwavo valinge mwomumwe.” Kaha nawa “kutanga kaha mijimbu yavatu vaze vasolwele muchima wakuhana mujila yakulipwila, cheji kulingisanga vatu vapwenga namuchima kana.” Mujimbu umwe wasolola nge, “mutu akwechi muchima wakuhana nahase kukunyula vatu vavavulu vaze katachikizako mangana navakiko vapwenga namuchima kanou.” Mujila yikwavo nawa kupwa namuchima wakuhana chinahase kukafwa vatu vavavulu muchitungilo navakiko valinge vene ngocho. Kutala kamweshi kwivwa kuwaha kutwama mungalila yanganako tahi? Chikupu vene, vatu veji kunganyalanga chikuma nge navapwa namuchima wakufwila kuhana.

 Mujimbu umwe wakuFlorida, U.S.A wasolola nganyo yatwama hakuhana. Lizavu lyaVinjiho jaYehova lyalisuwile kuzata mulimo wakukafwa vaze vapwile muukalu omu kwapwile peho yanyamanganda yayinene. Omu vapwile nakuvandamina vyakuzachisa mangana vawahise zuvo, vamwene chipato chakuzuvo yamutu weka uze alihachile nazuvo yize chinalyenyeka, kaha vaputukile kuchiwahisa. Mukuhita chamakumbi, uze mwenya chipato asonekele mukanda nakutuma kuchikota chaVinjiho jaYehova nakwamba ngwenyi: “Ngunasakwilila chikuma, Vinjiho jaYehova vapwa vatu vamwaza chikuma.” Muchima wakusakwilila wamulingishile atume wana wakuzachisa kumulimo wakulipwila waVinjiho jaYehova.

Vaka-kuhehwojola vawana “vyuma vyakulipwila vize vyeji kulingisanga vatu vafwile kukafwa vakwavo.” Vawana nawa ngwavo, vana vavandende “veji kusololanga muchima wakuhana shimbu kanda vaputuke nakuhanjika.” Mwomwo ika? Mbimbiliya yakumbulula chihula kana hakwamba ngwayo vatu vavatenga “muchifwanyisa chenyi,” kulumbununa nge kusolola vilinga vize atwama navyo Kalunga.—Kuputuka 1:27.

Yehova Kalunga atwama navilinga vyakulipwila. Kaha nawa atwama namuchima wakuhana. Atuhana kuyoya navyuma vyosena vize vyasakiwa mangana tuwahililenga. (Vilinga 14:17; 17:26-28) Kulinangula Mbimbiliya chinahase kutukafwa tupwenga navilinga vize atwama navyo Setu wamwilu nakutachikiza vyuma ajina kukatulingila. Mbimbiliya yahanjika nawa ngwayo, Kalunga atuwahishila vyuma vize natukalivwisa kuwaha kulutwe. * (WaYowano 1, 4:9, 10) Hakuwana nge Yehova Kalunga atwama namuchima wakuhana kaha nawa amitenga muchifwanyisa chenyi, echi chatela kumilingisa nayenu mupwenga namuchima kana mwomwo chinahase kuminganyalisa nakumilingisa amivwile uselewa.—WavaHepeleu 13:16.

Uno muli nakwanuka Alexandra uze twavulukanga kumaputukilo achihande chino tahi? Chihande chenyi chapwile ngachilihi? Numba tuhu uze mukwavo apwile nenyi musacha ambile ngwenyi nenyeka kaha jimbongo, oloze uze lunga vakafwile kuli Alexandra atuminyinyine shinga masepa jenyi vaze vapwile hachitulilo chajiminyau, kahomu ahetele vamufweteleleko uze mukuli hahaze vene. Uze lunga evwilile vyuma amulwezele Alexandra, ngocho aputukile kulinangula Mbimbiliya. Omu mwahichile tukweji vatatu Alexandra awahililile chikuma hakuwana uze lunga hakukunguluka changalila chaVinjiho jaYehova chize chapwile mulilimi lyaChinese muPeru. Hakusaka kusolola kusakwilila chenyi havyuma amulingililile Alexandra, uze lunga amusanyikile hamwe kaha navakwavo vaze ayile navo kukukunguluka changalila vayenga nakulya vyakulya kuchitanda chenyi chakulila.

Kuhana nakukafwa vakwetu cheji kunehanga kuwahilila chachinene. Kaha nawa twatela kukafwa vatu vatachikize Muka-kuhana mawana amwenemwene Yehova Kalunga. (WaYakova 1:17) Kutala nayenu mweji kwivwanga kuwaha kupwa namuchima wakuhana tahi?