Mawana amwe twawamona kupwa amalemu mwomwo pamo vatuhanyinewo kumutu uze twavumbika chikuma. Numba tuhu mawana amwe anahase kupwa ajimbongo jajindende, oloze tweji kuwamonanga kupwa amalemu mwomwo anafumu kuli mutu wamutanga yetu chipwe sepa lyetu uze twafwelela chikuma. Omu mukiko chapwile nakuli Russell uze ahanyine wana Jordan twavulukanga muchihande chinafumuho. Uno echi chinalifwane ngachilihi nawana wandando yakusokola?

Chatete, Mbimbiliya yamba ngwayo ‘Kalunga atumine Mwanenyi umwe kaha wakulipwila mukaye mangana tukahase kupwa nakuyoya kuhichila muli ikiye.’ (WaYowano 1, 4:9) Chuma kana chalingisa wana kana kupwa waulemu chikuma. Kakweshi mutu numba umwe atwama nangolo jakuhambakana Kalungako. KaHepeleu umwe asonekele kutalisa kuli Kalunga ngwenyi: “Ove ukwechi lijina lyove yove Yehova, yove kaha uka wove wapwa uWakulitulaho Chikuma hamavu hosena.” (Samu 83:18) Kachapwa chachashi kutambula wana kufuma kuli mutu wamulemu chikumako.

Chamuchivali, Kalunga apwa “Setu.” (Isaya 63:16) Mujila muka? Ikiye atuhanyine kuyoya. Kaha nawa eji kutuzakamanga ngana muze chisemi eji kuzakamanga vana venyi. Kalunga avulukile vatu jenyi vamwe kushikulu vakufwana nge Efwalime ngwenyi: “Efwalime apwa mwanami wamulemu uze ngwazanga chikuma . . . Nguli nakulyonyinga hali ikiye. Kaha nangukamwivwila keke.” (Yelemiya 31:20) Omu mukiko eji kwivwanga Kalunga kutalisa kuli vangamba jenyi makumbi ano. Kalunga apwa Tengi Wangolo Josena, Setu wakushishika kaha nawa Sepa lyetu. Uno echi kacheshi kuhasa kulingisa wana mwatuhana tuumone kupwa waulemu chikumako nyi?

Mawana vatuhanyine kuvatu vaze vatuzanga chikuma twawamona kupwa amalemu mwomwo kavatuhanyinyinewo chilikako. Muka-kuhana wamwenemwene keshi kusaka vamufwete havyuma nalingiko.

Kalunga atuhanyine Mwanenyi mwomwo atuzanga chikuma. Mbimbiliya yamba ngwayo: “Omu mukiko Kalunga asolwelele zangi yenyi kuli etu hakutuma Mwanenyi umwe kaha wakulipwila.” Mwomwo ika Kalunga alingilile ngocho? “Mangana tukahase kupwa nakuyoya kuhichila muli ikiye.” (WaYowano 1, 4:9) Uno Kalunga vamushinjililile kulinga chuma kana tahi? Nduma. “Ndando yakusokola yaKulishitu Yesu” yasolola “Likoji [lyaKalunga] lyalinene.”—Wavaka-Loma 3:24.

Mwomwo ika wana ahana Kalunga wasolola “likoji lyenyi lyalinene”? Mbimbiliya yalumbununa ngwayo: “Kalunga asolola lyehi zangi yenyi kuli etu, mwomwo shimbu twapwilenga tuvaka-shili, Kulishitu atufwilile.” (Wavaka-Loma 5:8) Chikupu vene, zangi yalingishile Kalunga asokole vatu kushili. Oloze zangi kana kayatutelako kaha nawa katweshi kuhasa kumufweta vimwe hakutusolwelayoko. Wana kanou waulemu atuhanyine, wasolola zangi yayinene mukuyoya chavatu.

Mawana amwe apwa amalemu chikuma mwomwo eji kusololanga vyuma alisuwile kulinga mutu atuhanyinewo. Kachi nge mutu nalisuula kutuhana wana uze amona kupwa waulemu, kaha tweji kuumonanga kupwa waulemu chikuma mwomwo yamuchima wenyi wakulisuula.

Kalunga “ahanyine Mwanenyi umwe kaha wakulipwila.” (Yowano 3:16) Kachapwile chachashi kutuhana Mwanenyi uze azanga chikuma atufwileko. Hamakulukaji amyaka yayivulu yize Kalunga apwile nakutenga vyuma vyosena, Yesu azachilenga hamwe naIse, kaha ‘Kalunga amwivwililenga kuwaha chikuma.’ (Vishimo 8:30) Yesu apwa “Mwanenyi uze azanga”chikuma kaha nawa “chifwanyisa chaKalunga uze vazeneka kumona.” (Wavaka-Kolose 1:13-15) Vatu kanava vakushipilitu valizangile chikuma.

Oloze Kalunga “katetelele Mwanenyiko.” (Wavaka-Loma 8:32) Yehova atuhanyine mwanenyi uze azanga chikuma. Kulinga chuma kana chamwivwishile kukola kumuchima.

Mawana amwe twawamona kupwa amalemu mwomwo eji kusakiwanga chikuma. Chakutalilaho, namusakwilila chikuma nge mutu mwalisuula kumifwetela vitumbo vize naviyovola mwono wenu vize kamwahashile kulanda enu vaveneko. Wana kana wapwa wandando yayinene chikuma nyi mweka?

“Nganomu vali nakufwa vosena muli Alama, ngocho nawa muli Kulishitu mukiko vene navakayoyela vosena.” (Wavaka-Kolinde 1, 15:22) Hakuwana nge twapwa tuvana vaAlama, tuvosena tweji ‘kufwanga,’ kaha katwahasa kuchina misongo nakufwa chipwe kuliwana naKalunga mangana tupwenga vatoma kumeso enyiko. Hakuwana nge twapwa tuvatu vakukuminamo, katweshi kuhasa kulilingisa etu vavene chipwe vakwetu ‘vakayoyeko.’ Mbimbiliya yamba ngwayo: “Naumwe wauchi nahase kusokola ndumbwenyi, chipwe kuhana Kalunga ndando yakumusokolako . . . kaveshi kahasa kuyifwetako.” (Samu 49:7, 8) Chikupu vene, twasakiwa kutukafwa mwomwo katweshi kuhasa kuwana ndando yakulisokola etu vaveneko. Chakuzeneka kutukafwa natupwa tuvamavokovoko.

Mwomwo yazangi yenyi yayinene, Yehova alisuwile kutufwetela ndando yakusokola myono yetu yize yapwile nakusakiwa chikuma mangana kuhichila muli Yesu “mukiko vene navakayoyela vosena.” Uno ndando yakusokola yatesamo ngachilihi chuma kana? “Manyinga aMwanenyi Yesu nawatutomesa kushili yosena.” Chikupu vene, kufwelela mumanyinga aYesu chalingisa vatukonekele jishili jetu nakukatambula kuyoya chahaya  myaka yosena. (WaYowano 1, 1:7; 5:13) Uno ndando yakusokola nayikakafwa ngachilihi vatu twazanga vaze vafwa? “Hakuwana nge kufwa chejile kuhichila muli mutu umwe, ngocho nakusanguka chavafu nawa cheza kuhichila muli mutu umwe [Yesu].”—Wavaka-Kolinde 1, 15:21. *

Kanda vachituhanengaho lyehi wana kumutu wamulemu chikuma uze alisuwile mwomwo yakutuzanga chikuma ngana muze alingile Yesuko. Naumwe wauchi atuhanaho lyehi wana waunene chikuma kuhambakana Yehova Kalunga. Kaha nawa kakwatwama wana weka wasakiwilenga chikuma ngana mwawana uze watusokola kushili nakukufwako. Chikupu vene, kakweshi wana weka tunahase kwesekesa kuwana wandando yakusokolako.