Nge Kuyoya Chinamifutwisa naKushinganyeka Ngwenu Kufwa Chinawahe
KUTALA MWEVWAHO lyehi kupihya nakushinganyeka kulijiha tahi? Nge mukiko, kaha munahase kutachikiza omu evwile Adriana. Apwilenga naukalu wakulizakaminanga chikuma nakwivwa kupihya nakulimona kupwa wamokomoko. Kutwala muze Adriana vamuwanyine namusongo wakuhomba.
Tushimutwilenu nawa hali lunga mukwavo wamuJapan walijina lyaKaoru, uze alaminenga visemi jenyi vaze vapwile nakuviza, ambile ngwenyi: “Lwola lumwe nawa ngwazeyelenga mwomwo ngwazachilenga chikuma kumilimo.” Kaha ambile nawa ngwenyi: “Kangwapwile nachipepa chakulyako, nakuhona kusavala tulo. Kaha ngwapwile nakushinganyeka ngwami, kachi nge nangufwa kaha ukalu wami naukuma.”
Ojebode wamuNigeria, ambile ngwenyi: “Ngwevwilenga kupihya chikuma nakuputuka kulila. Shikaho ngwasakile kuwana jijila jakusaka kulijihilamo.” Ocho kuwaha kana hakuwana nge Ojebode, naKaoru naAdriana kavalijihileko. Oloze mwaka himwaka, vatu vavavulu vali nakulijihanga vavene.
KULIHI TUNAHASE KUWANA KUKAFWA?
Malunga vakiko veji kulijihanga chikuma, vamwe veji kulijihanga mwomwo yakwivwa sonyi kulweza vakwavo vavakafwe. Yesu ambile ngwenyi, vaveji vasakiwa chimbuke. (Luka 5:31) Shikaho nge nayenu mukiko mweji kushinganyekanga, kaha kamwatela kwivwa sonyi kulweza vakwenu vamikafweko. Vatu vavavulu vaze vaviza musongo wakuhomba, vanawane nge vitumbo vinahase kuvakafwa vakeheseko kuhomba chavo. Ojebode, naKaoru naAdriana, navakiko vavakafwile kuli vandotolo kaha oholyapwa kavahomba chikumako.
Vandotolo vanahase kuzachisa vitumbo chipwe kushimutwila namutu mangana akeheseko kulishona chenyi. Vaze veji kuvizanga musongo wakuhomba, vasaka vausoko namasepa javo kuvatalilila chikoki, nakuvavendejeka nakuvazakama. Oloze Yehova Kalunga apwa sepa wamwenemwene uze munahase kulikata nenyi, eji kukafwanga vatu kuzachisa Mazu enyi Mbimbiliya.
UNO KULIKO JILA YAKUKAKUMISHILAMO UKALU TAHI?
Vatu vaze vaviza musongo wakuhomba, vasakiwa kuvoka halwola lwalusuku kaha vatela kuwana mwakukeheselako kuhomba hakwalumunako chiyoyelo chavo. Oloze nge nayenu mwaviza musongo wakuhomba kaha talililenunga kulwola luze namukayoya kanawa kulutwe, ngana mwaOjebode uze Ambile ngwenyi: “Ngunakutalilila omu nawakatesamo mazu atwama hali Isaya 33:24, aze vatushika ngwavo mulifuchi kamweshi kukapwa mutu mwakamba ngwenyi: ‘Nguli nakukola.’” Ngana mwaOjebode, fwilenu kuwana kuvendejeka muvyuma vyamwaza ashika kukatulingila Kalunga. Ashika kukatuhana ‘mavu amahya,’ haze kaheshi kukapwa kukolako. (Kusoloka 21:1, 4) Kalunga ashika kukafumisako misongo yosena. Shikaho, ijivenu ngwenu namisongo mwaviza navakaufumisako haya myaka yosena. Kaha misongo yenu ‘kamweshi kukayanuka chekako, chipwe kuyivezuka mumichima yenuko.’—Isaya 65:17.