KACHI nge yenu chipwe kausoko kenu aviza misongo yakutekeleka kaha munahase kuhomba chikuma. Kaha nawa misongo kana yinahase kulingisa muveji chipwe muka-kumulama alizakaminenga chipwe kukwata washi matoto. Woma nakulizakamina chinahase kwiza mwomwo yakuyanga kuchipatela lwola lwosena, chipwe kuhona jimbongo jakufweta vatuke misongo, chipwe ukalu unahase kwiza hakunwa chikuma vitumbo. Nge mutu uze aviza misongo yakutekeleka mwashinganyeka chikuma kaha nachilingisa misongo yenyi yitohweleko.

Jino vyuma muka vinahase kutukafwa? Vatu vavavulu vanawane nge kupendamina hali Kalunga  kuhichila mukulomba nakutanga mijimbu yakuvendejeka yamuMbimbiliya chinavakafwe chikuma mukuyoya chavo. Kaha kukafwa chikwavo nawa cheji kufuminyinanga kuli vausoko namasepa hakutusolwela zangi.

Robert wamyaka yakusemuka 58 ambile ngwenyi: “Fwelelenunga chikuma Yehova nge munakuviza misongo yakutekeleka, kaha Ikiye mwamikafwa. Lombenunga Yehova, mulwezenu omu muli nakwivwa. Kaha nawa, mulombenu shipilitu yajila, mulombenu amijikijise mangana muhase kukafwa tanga yenu, nakumikafwa mupwenga vakumika mumisongo yenu.”

Robert ambile nawa ngwenyi: “Cheji kwivwisanga kuwaha chikuma nge tanga yove nayikukafwa. Tanga yami yeji kusololanga nge yanguzakama, hakungutuminanga shinga hakumbi hakumbi nakunguhulisa vejive omu ngunayoyela. Masepa jami veji kungukolezezanga chikuma. Veji kunguhizumunanga, nakungukafwa ngutwaleho lika kuyoya.”

Linda ahanjikile mazu amwe aze anahase kumikafwa kachi nge munatambukila sepa lyenu uze ali nakuviza, ambile ngwenyi: “Kakavulu muveji kasaka muhanjikenga kaha haukalu wenyiko, oloze asaka muhanjikenga havyuma vyeka vyamukuyoya. Shikaho, mwatela kuhanjikanga havyuma mweji kushimutwilanga lwola lwosena.”

Kupendamina hali Kalunga nakutanga Mbimbiliya, nakwitavila vausoko wetu namasepa vatukafwe, chinahase kutukafwa tutwaleho lika kumona kuyoya kupwa chamwaza kaha nawa chachilemu, numba nge tuli nakuviza misongo yakutekeleka.