KACHI nge mwayovokaho lyehi muukalu wakulijila, kaha namutachikiza omu veji kwivwanga vatu vapwile muukalu kana. Veji kulikomokelanga, nakwivwa nge vanavaliula, nakuhona kushinganyeka kanawa, nakulizakamina. Vatu vamwe vaze vahichile muukalu kanou veji kumona nge kaveshi kukapwa ngana muze vapwileko.

Kachi nge nayenu mwapwaho lyehi muukalu woumwe, kaha mwevwile nge kamweshi kuhasa kumika muukalu kanako. Kaha nawa munahase kuputuka kushinganyeka ngwenu, nevi munakuyoyela vene vyauchi. Mbimbiliya yalumbununa nge kuyoya chenu chapwa chamwaza kaha nawa chachilemu, kaha munahase kutalilila vyuma vyamwaza kulutwe.

Chisoneka chaMuka-kwambulula 7:8 chamba ngwacho: “Makumishilo achuma anawahe kuhambakana maputukilo acho.” Shikaho nge mwapwanga muukalu wakulijila kalinwomu, kaha munahase kushinganyeka ngwenu kuyoya chinamipihila. Oloze mukuhita chalwola, kuyoya chenu nachipwa cheka kanawa.

Mbimbiliya yavuluka vyalwola luze vatu ‘kaveshi kukevwa mazu akulila chipwe miteto yaluyandoko.’ (Isaya 65:19) Vyuma kana navikatesamo omu Wangana waKalunga naukalingisa mavu kupwa palachise. (Samu 37:11, 29) Kaha ukalu wakulijila kaweshi kukasolokako. Vatu kaveshi kukashinganyeka cheka haukalu vali nakumona makumbi anoko, mwomwo Kalunga Wangolo Josena atushika ngwenyi: “Vyuma vyakunyima kaveshi kukavyanuka chekako, Chipwe kuvivezuka mumichima yavoko.”—Isaya 65:17.

Achishinganyekenu, Tengi ashika ngwenyi namukayoya “kanawa kulutwe nakupwa nalutalililo.” (Yelemiya 29:11) Uno kutachikiza muchano kanou, nachitukafwa ngachilihi tumone kuyoya kupwa chamwaza kaha nawa chachilemu? Sally uze twashimutwilanga muchihande chakulivanga ambile ngwenyi: “Kachi nge mutu mwanukanga vyuma naukatulingila Wangana waKalunga kulutwe nachimukafwa avulyame vyuma vyamusolokelele kunyima nakupwa wakumika kuvyuma vili nakwiza kulutwe.”

Tunakumilomba mulinangule vyuma vyavivulu vize Wangana waKalunga naukalingila vatu. Nge namulinga ngocho, kaha nachimilingisa mulivwise kuwaha kuyoya oholyapwa nakukalivwisa kuwaha kuyoya chakuzeneka ukalu wakulijila, chamokomoko navyuma munahichimo mukuyoya chenu. Makumbi ano, Mbimbiliya yeji kutuhananga Jindongi jakutukafwa tuhone kulizakamina hanyima yakupwa muukulu wakulijila. Tuchishimutwilenu havyakutalilaho.