KUHONA kushishika muulo cheji kuvijisanga chikuma. Chipwe ngocho, vatu vamwe veji kukonekelanga vaka-mahyavo nakutwalaho lika kulizanga mumalo avo. * Vatu vaze navejiva ngwavo vaka-mahyavo vahono kushishika, veji kulyonyinganga chikuma mumuchima, numba nge ulo nautwalaho lika chipwe chiku. Uno vyuma muka vinahase kukafwa vatu vaze vali nakulyonyinga mumuchima?

Visoneka vyeji kukafwanga vatu vakushishika vavavulu vaze vanaseze kuli vaka-mahyavo, chamokomoko nakukola kumuchima vali nakwivwa. Vanalinangula ngwavo Kalunga eji kumonanga omu vali nakulila nakuvevwila keke.—Malaki 2:13-16.

“Omu ngwalizakaminyine chikuma, ove wanguvendejekele nakunguunjisa muchima.”—Samu 94:19.

Bill ambile ngwenyi: “Omu ngwatangile vesi kana, ngwashinganyekele nguli nakumona Yehova ali nakunguvendejeka, ngana mwachisemi wakeke.”

“Kuli mutu wakushishika weji kupwanga uwakushishika.”—Samu 18:25.

Carmen, uze akwechi lunga lyenyi nahono kushishika hatukweji ambile ngwenyi: “Numba tuhu lunga lyami kapwa wakushishikako, oloze ngwafwelela ngwami Yehova apwa wakushishika. Keshi kukanguseza ukawamiko.”

“Kanda namulizakamina hachuma numba chimweko, oloze muvyuma vyosena, hakulomba, nahakulembelela . . . mulwezenunga Kalunga vyuma munakusaka, kaha kuunda chaKalunga chize chahambakana kunangakana chosena nachikinga michima yenu.”—Wavaka-Fwilipi 4:6, 7.

Sasha ambile ngwenyi: “Ngwatangilenga echi chisoneka mapapa kakavulu. Kahomu ngwalombelenga kuli Kalunga lwola lwosena anguhanyine kuunda mukuyoya chami.”

Ava vatu vosena tunavuluka muchihande chino, shimbu jimwe vevwilenga nge chinawahe kufwa. Oloze, vafwelelele Yehova Kalunga nakuwana kuvendejeka muMazu enyi. Shikaho, Bill ambile ngwenyi: “Lufwelelo lwami lwangukafwile ngutachikize mwalumbunukila kuyoya, omu vyuma vyosena vyakaluhwile mukuyoya chami. Numba tuhu halwola lumwe ‘ngwatambukile muchinema chamilima yayinene,’ oloze Kalunga apwile nayami.”—Samu 23:4.