NGE mwafwisaho lyehi mutu uze mwazanga, kaha nayenu chamivijile kumuchima, nakuhomba, nakulivwa ngwenu muli ukawenu kaha nawa muvamokomoko. Kaha nawa pamo mwevwaho lyehi kupihya kumuchima, chipwe kulihana mulonga, nakwivwa woma. Chipwe kuputuka kuhuhwasana ovyo muli nakuyoyela.

Tachikizenu ngwenu kulishona kachalumbununa nge mutu apwa wakuhehelako. Cheji kusololanga omu azangile mutu kana. Uno munahase kuwana vyuma navimikafwa muhone kulishona chikuma tahi?

Kachi nge muli nakwivwa ngwenu kulishona chenu kacheshi kukumako, kaha vishina vino vinakavangizaho vinahase kumikafwa:

LISHONENUNGA HALWOLA LWAKUTAMO

Vatu vosena veji kulishonanga mujijila jakulihandununa, nalwola veji kumbatanga hakulishona lweji kulihandununanga. Vanessa uze twavulukanga hakavanga ambile ngwenyi: “Ngwalililenga chikuma mwomwo ngwasakile kukehesako ushona wami.” Sofía uze afwishile songo yenyi wapwevo ambile ngwenyi: “Kwanuka kufwa chasongo yami, cheji kungukolanga chikuma kwijiva nge vali nakungukosa hambandu. Numba tuhu yeji kukolanga, oloze cheji kulingisanga mbandu kana yiyoye.”

LWEZENUNGA VAKWENU OMU MUNAKWIVWA NAVYUMA MUNAKUSHINGANYEKA

Chikupu vene, lwola lumwe munahase kusaka kupwa ukawenu. Oloze ushona wapwa hichiteli chachilemu  chize kamweshi kuhasa kumbata ukawenuko. Jared wamyaka yakusemuka 17 uze afwishile ise ambile ngwenyi: “Ngwalwezelengako vakwetu omu ngwapwile nakwivwa. Numba tuhu vyuma ngwavalwezelenga kavyavalumbunukililengako, oloze ngwevwilenga kumuchima hwo hanyima yakuvalweza.” Janice uze twavulukanga muchihande chamaputukilo ahanjikile vyuma vyamukafwile, ambile ngwenyi: “Kuhanjika navakwetu changuvendejekele chikuma, mwomwo vakwetu vangwivwishishile, kaha kangwevwilenga nge nguli ukawamiko.”

ITAVILENU VAMIKAFWE

Ndotolo umwe ambile ngwenyi: “Vaka-kulishona vaze navetavila masepa javo navausoko wavo kuvakafwa halwola vali nakulishona, mukuhita chalwola ukalu wavo weji kuputukanga kukeha.” Shikaho, itavilenunga vakwenu vamikafwe, mwomwo vanakufwila kumikafwa, numba tuhu shimbu jimwe vanahase kuhona kutachikiza mwakumikafwila.—Vishimo 17:17.

PANDAMENUNGA KULI KALUNGA

Tina ambile ngwenyi: “Omu lunga lyami afwile namusongo wakasa changuvijile mwomwo kangwapwile namutu wakushimutwila nenyiko. Ngocho ngwalwezelenga Kalunga vyuma vyosena. Ngwamulombelenga angukafwe ngumike muukalu wami. Kalunga angukafwile mujijila jajivulu chikuma.” Omu Tarsha, wamyaka yakusemuka 22 afwishile naye ambile ngwenyi: “Kutanganga Mbimbiliya hakumbi hakumbi changuvendejekele chikuma. Changukafwilenga kushinganyeka havyuma ngwatangilenga.”

SHINGANYEKENUNGA HALUTALILILO LWAKUSANGUKA

Tina ambile nawa ngwenyi: “Hakavanga lutalililo lwakusanguka kalwanguvendejekeleko mwomwo ngwasakile kupwa nalunga lyami, kaha vana vami nawa vasakile kupwa nasevo. Oloze omu mwahichile myaka 4 ngwaputukile jino kulinjilila kulutalililo kana. Ngwapendamina halutalililo kana. Ngweji kushinganyekanga kukamona cheka lunga lyami. Echi cheji kungulingisa ngutwame mukuunda nakuwahilila.”

Kanda kushinganyeka ngwenu ushona wenu naukuma washiko. Chipwe ngocho, vyuma ahichilemo vanessa vinahase kumikafwa. Ambile ngwenyi: “Munahase kushinganyeka ngwenu ushona wenu kaweshi kukakumako, oloze mukuhita chalwola nauputuka kukuma chindende chindende.”

Anukenu ngwenu numba tuhu namutwalaho lika kushinganyeka hamutu munafwisa, oloze kuyoya chapwa chamwaza kaha nawa chachilemu. Kalunga mwamikafwa mulivwise kuwaha kupwa namasepa vamwaza nakupwa nakuyoya chamwenemwene. Kalinwomu Kalunga asangule vafu. Anakusaka mangana mukalivwise kuwaha kusambilila vatu vaze mwazanga. Kaha ushona muli nakwivwa oholili navakaufumisako haya myaka yosena.