Yesu ambile ngwenyi: “Lifuchi limwe nalikafumbukila lifuchi likwavo, kaha wangana umwe naukafumbukila wangana ukwavo. Nakukapwa mindenda yayinene, kaha kuvihela kweka nakweka nakukapwa zala namisongo yachihita.” (Luka 21:10, 11) Kutala vyuma kana vili nakusoloka halwola lwolumwe mukaye kosena tahi? Talenu vyakutalilaho.

1. JIJITA JAKAYE

Mu 1914 mwepukile jita yize kanda yisolokengaho lyehi mukaye. Kaha vatu valinangula chikuma vyakushikulu veji kuhanjikanga ngwavo, mwaka wa 1914 wapwile mwaka wakulipwila, mwomwo mumwaka kana mwepukile jita yakaye yatete. Vatu vazachishilenga vitwa vyakufwana nge mata amatendazungu, natupata, namata amanene navitwa vyeka vyangolo hakulwa jita kana. Kwepukile nawa jita yakaye yamuchivali, kaha vazachishile mata eka amatendazungu. Vatu vanazungunga jijita kufuma vene mu 1914, jijita kana jinajihinga vata vavavulu chikuma.

2. MINDENDA

Mukanda waBritannica Academic wahanjikile ngwawo, mwaka himwaka mindenda yayinene yakuheta kafwe ku 100, yeji ‘kwenyekanga chikuma vyuma.’ Kaha nawa vaka-kuhehwojola vamuUnited States Geological Survey vahanjikile ngwavo, “kweseka namijimbu vahehwojwele lyehi kunyima, vashinganyeka ngwavo kala mwaka kunahase kusoloka mindenda yayinene 16.” Numba tuhu vatu vamwe vashinganyeka ngwavo makumbi ano kakweshi mindenda yayivuluko mwomwo vatu vanejiva jijila jakulikingilamo. Oloze mindenda yayinene yize yili nakusoloka mukaye makumbi ano, yili nakwenyeka vyuma vyavivulu nakujiha vatu chikuma.

 3. KUKALUHWA CHAVYAKULYA

Jijita, namaswekeza, nakukaluhwa chajimbongo, nakulyenyeka chamavu chipwe kuhona chinyingi chaunjimi vinalingisa kupwenga jizala. Mumwaka wa 2018 liuka lyaWorld Food Programme lyambile ngwalyo: “Mukaye kosena vatu jimiliyoni 821 veji kusavalanga nazala, kaha havatu kana, jimiliyoni 124 kaveshi naha hakusumako. Kaha mwaka himwaka vanyike vakuheta kafwe jimiliyoni 3.1 vanakufwanga namusongo wazala. Kulumbununa nge mu 2011 vanyike kafwe jipaseti 45 mukaye kosena vafwile.

4. KUVULA CHAMISONGO

Mukanda waWorld Health Organization wamba ngwawo: “Mulikulukaji lyamwaka lyakusokesa 21 munapunga misongo yachihita. Misongo yize yapwileko yakufwana nge, musongo wachikonga nayellow fever yinakinduluka, kaha kuneza cheka misongo yayihya yakufwana nge kakoho nachishika (Severe acute respiratory syndrome [SARS]), namusongo walipwema, namusongo uze weji kulingisanga mahuyungu najiso vihone kuzata kanawa (Middle East respiratory syndrome [MERS]), namusongo waEbola naZika.” Numba tuhu vaka-sayasi vanalinangula vyamisongo, oloze misongo yimwe vanahono kuyuka.

5. MULIMO WAKWAMBULULA MUKAYE KOSENA

Yesu avulukile chinjikizo chikwavo ngwenyi: “Kahou mujimbu wamwaza waWangana navakawambulula hamavu hosena, nakupwa unjiho kuli vaka-mafuchi osena, numbanyi kukuma chikeze.” (Mateu 24:14) Numba tuhu vatu vavavulu vali muukalu, oloze vatu vakuzomboka jimiliyoni 8 vakumafuchi osena vanakuvilika mujimbu wamwaza waWangana waKalunga mumafuchi 240 namumalimi akuzomboka 1,000. Mulimo kana wakukomwesa chikupu, mwomwo kanda vauzatengaho lyehi.

Chikupu vene, vinjikizo avulukile Yesu vili nakusoloka makumbi ano. Mwomwo ika twatela kutachikiza mwalumbunukila vinjikizo kana? Mwomwo Yesu ambile ngwenyi: “Omu namukamona vyumevi vili nakusoloka, katachikizenu ngwenu Wangana waKalunga uli kwakamwihi.”—Luka 21:31.

Chinjikizo chize avulukile Yesu kuhakilako naunjiho weka wamuMbimbiliya vyatukafwa tutachikize ngwetu Kalunga ahakileko Wangana wenyi mwilu mu 1914. a Atongwele Mwanenyi Yesu Kulishitu kupwa Mwangana. (Samu 2:2, 4, 6-9) Kalinwomu Wangana waKalunga uputuke kuyula hano hamavu, naukafumisako jifulumende javatu josena nakulingisa ano mavu kupwa palachise mangana vatu vakatwamengaho haya myaka yosena ngana muze ajinyine Kalunga.

Kalinwomu mazu ahanjikile Yesu atesemo. Aze ambile ngwenyi: “Wangana wove wizenga. Mwaya muchima wove mulingiwe mwilu, nahamavu nawa.” (Mateu 6:10) Uno vyuma muka unalingi Wangana waKalunga kufuma mu 1914? Kaha vyuma muka tuli nakutalilila omu Wangana kana naukaputuka kuyula vatu hano hamavu?