Mwomwo Ika Tuli Nakusakila Wangana waKalunga?
Kufuma halwola luze Yehova Kalunga atengele vatu vatete, ikiye kaha apwile Muka-kuvayula. Ayulilenga vatu mujila yazangi. Ahakileko milemba yamwaza muEtene mangana vatu vatwamengamo, kaha nawa avahanyine vyakulya vyavivulu. Kufumaho, avahanyine milimo yamwaza yakuzata. (Kuputuka 1:28, 29; 2:8, 15) Nge vatu vatwalililileho lika kwitavila Kalunga avayule, kachi vyuma vyakutenga vyosena vyatwaminenga hamwe mukulinunga namukuunda.
Vatu vatete vakanyine kuvayula kuli Kalunga
Mbimbiliya yavuluka ngwayo, kangelo wakulikanga uze vavuluka jino ngwavo Satana Liyavolo afumbukilile wata waKalunga. Chasoloka nge apwile nakwamba ngwenyi, vatu vanahase kuyoya kanawa chakuzeneka kuvayula kuli Kalunga. Chaluvinda, visemi jetu vakulivanga Alama naEve valingile vyuma avongele Satana, ngocho vakundwijile Satana hakulikanga kuchiyulo chaKalunga.—Kuputuka 3:1-6; Kusoloka 12:9.
Hakuwana nge Alama naEve vakanyine kuvayula kuli Kalunga, ngocho vajimbalishile limbo lyavo lyaPalachise nalutalililo lwakuyoya chahaya myaka yosena. (Kuputuka 3:17-19) Vyuma valingile vyanehele ukalu nakuli vana vavo. Mbimbiliya ngwayo Alama alingile shili, kaha “shili yengilile mukaye kuhichila muli mutu umwe nakufwa nawa kuhichila mushili.” (Wavaka-Loma 5:12) Shili yanehele ukalu ukwavo. Mbimbiliya ngwayo: “Mutu nashinyinyika mukwavo mutu mangana amuyanjise.” (Muka-kwambulula 8:9) Mujila yikwavo tunahase kwamba ngwetu, nge vatu navaliyula vavene kaha ukalu nautohwelako.
VATU NAVAPUTUKA KULIYULA VAVENE
Nyimelote alikangile kuwata waYehova
Mutu watete vavuluka muMbimbiliya kupwa muka-kuyula shina Nyimelote, uze alikangile kuwata waYehova. Putu vene kushikulu, vatu vaze vanapunga nangolo hali vakwavo vanazachisanga ngolo javo mujila yakuhenga. Myaka kafwe 3,000 kunyima, Mwangana Solomone ambile ngwenyi: “Ngwamwene masoji avaze vayanjishilenga, kaha kakwapwile mutu wakuvavendejekako. Vaka-kuvayanjisa vapwile nangolo chikuma, ngocho kakwapwile mutu wakuvavendejekako.”—Muka-kwambulula 4:1.
Namakumbi ano, tuli nakumona ukalu woumwe. Mu 2009, mukanda umwe waUnited Nations wambile ngwawo: “Viyulo vyavipi vili nakutwalililaho lika, nakulingisa vatu muvitungilo vapwenga navilinga vyavipi chikuma.”
LWOLA NAVAKAVAFUMISAKO
Vatu vanakusaka vaka-kuvayula vamwaza hamwe kaha najifulumende jamwenemwene. Omu mukiko atushika Tengi yetu.
Jifulumende javatu josena, jinahono kukumisa ukalu waunene uze vali nakumona vatu
Kalunga nahakeko Wangana chipwe ngwetu fulumende yize nayikashisa viyulo vyavatu, “kaha ukiko naukapwangako haya myaka yosena.” (Ndanyele 2:44) Ou ukiko Wangana vanakulombanga vatu vavavulu mukaye. (Mateu 6:9, 10) Kalunga keshi ikiye mwakayula muWangana kanako, oloze atongola mutu uze atwamaho lyehi hamavu mangana apwenga Muka-kuyula. Uno Kalunga atongola iya?
Pamo Nauzanga Nawa
KUKUMBULULA VIHULA VYAKUPANDAMA KUMBIMBILIYA
Uno haMavu Nahakapwa Ngachilihi Kuunda?
Fwilenu kutachikiza omu Kalunga mwakatesamo jishiko jenyi jakuneha kuunda mukaye kosena kuzachisa Wangana wenyi.
