Mujila yachifwanyisa, tuvosena tunalitalasana “nanyamanganda” uze Yesu afwanyishile ‘kuluyando lwalunene.’ (Mateu 24:21) Numba tuhu katweshi kuhasa kuchina luyando lwaluneneko, oloze tunahase kulingako vyuma vimwe mangana navitukinga. Vyuma muka venyovyo?

Muchihande chenyi chahapili, Yesu Kulishitu ahanjikile ngwenyi: “Tondenunga lika chatete Wangana [waKalunga] nakwoloka chenyi.” (Mateu 6:33) Tunahase kulinga ngachilihi ngocho?

Tondenunga lika chatete Wangana waKalunga. Echi chalumbununa nge twatela kumona Wangana waKalunga kupwa waulemu kuhambakana kala chuma. (Mateu 6:25, 32, 33) Mwomwo ika twatela kuumona kupwa waulemu? Mwomwo vatu kaveshi kuhasa kukumisa ukalu vali nakumona vakwavo vatuko, oloze Wangana waKalunga ukiko kaha naukafumisako ukalu wosena vali nakumona.

Tondenunga lika kwoloka chenyi. Twatela kuzata nangolo mangana tuyoye kweseka najishimbi jaKalunga jakwoloka najindongi jenyi. Mwomwo ika? Mwomwo nge natulisakwila etu vavene vyakulinga kaha nachitunehela ukalu. (Vishimo 16:25) Oloze nge natupendamina hajindongi jaYehova, kaha natwivwisa Kalunga kuwaha nakunganyala etu vavene.—Isaya 48:17, 18.

Tondenunga lika chatete Wangana waKalunga nakwoloka chenyi. Yesu ambile ngwenyi vatu vamwe vanahase kutanguka nakushinganyeka ngwavo vanahase kupwa vakukingiwa nge navapwa najimbongo jajivulu. Kaha nawa veka veji kulizakaminanga chikuma nakuhona kupwa nalwola lwakutondatonda chatete Wangana waKalunga mukuyoya chavo.—Mateu 6:19-21, 25-32.

 Yesu afwelelesa vaze veji kukundwizanga Wangana waKalunga ngwenyi, navapwanga navyuma vasaka oholyapwa nakukalivwisa kuwaha vyuma vyeka vyamwaza kulutwe.—Mateu 6:33.

Numba tuhu tumbaji twaYesu vapwile nakutonda chatete Wangana waKalunga nakwoloka chenyi, oloze kuyanda nakuviza chatwalilileho lika mukuyoya chavo. Chipwe ngocho vapwile vakukingiwa. Mujila muka?

Hakuwana nge vakavangijilenga jishimbi jaKalunga jakwoloka, echi chavakingile mukuyoya chavo. Kufwelela ngwavo Wangana waKalunga naukeza chavakafwile vomike muukalu waunene uze vahichilemo. Kaha Kalunga avahanyine “ngolo jakuhambakana jize javatu” mangana jivakafwe vomike mukala ukalu vamwene.—Wavaka-Kolinde 2, 4:7-9.

Vaka-Kulishitu mulikulukaji lyamyaka lyakulivanga vononokele kulushimbi lwaYesu lwakutonda chatete Wangana. Ngocho, vambulwile mujimbu wamwaza waWangana kuvihela kuze vatwaminenga. (Wavaka-Kolose 1:23) Uno makumbi ano kuliko vatu vali nakwambulula mujimbu wamwaza waWangana tahi?

Eyo. Vinjiho jaYehova vatachikiza ngwavo kunasale kaha lwola lwalundende nakufumisako tulingilo twamyaka yino. Ngocho vanakuzata nangolo nakufwila kukavangiza lushimbi lwaYesu lwakwamba ngwavo: “Mujimbu wamwaza waWangana navakawambulula hamavu hosena, nakupwa unjiho kuli vaka-mafuchi osena, numbanyi kukuma chikeze.”—Mateu 24:14.

Uno nayenu munahase kwitavila mujimbu wamwaza tahi? Tuli nakumikolezeza mulondezeze vatu vamulikulukaji lyamyaka lyakulivanga vamunganda yaMbeleya, muMasetonya, vaze vakekeselenga Visoneka omu vevwile mujimbu wamwaza wakuvuluka Wangana uze vavambulilile kuli kaposetolo Paulu. Vatu kana vetavilile mujimbu “namuchima wakwanguhwa.” Kaha vakekesele Visoneka hakumbi hakumbi mangana vamone numba nge vyuma kana vyamuchano, nakulinga kweseka navyuma valinangwile.—Vilinga 17:11, 12.

Munahase kulinga ngocho nayenu, hakutondatonda chatete Wangana waKalunga nakwoloka chenyi. Nge namulinga ngocho, kaha namupwa vakukingiwa oholyapwa nakukatwama mukuunda mukaye kakahya.