Muchihande chinafumuho twashimutwilanga chinjikizo chize ahanjikile Yesu chize chasolola nge Wangana waKalunga unaputuka kuyula mwilu. Kaha Yesu Kulishitu ikiye Mwangana waWangana kana.

Mbimbiliya yahanjikile ngwayo, omu Yesu mwakapwa Mwangana mwakahanga Satana navandemone jenyi mwilu. Ngocho vatwama kaha nangolo jakulinga vyuma vyavipi hano hamavu, kaha echi chikiko chinakulingisa vyuma vipihileko lika hano hamavu kufuma vene mu 1914.—Kusoloka 12:7, 9.

Numba tuhu vyuma vili nakupihilako lika, oloze Yesu uze apwa Mwangana waWangana waKalunga ali nakukafwa vatu vosena hamavu. Kunangula vatu Mbimbiliya mukaye kosena, chili nakukafwa vatu valinangule jindongi jamuMbimbiliya nakujizachisa mukuyoya chavo. (Isaya 2:2-4) Vatu vavavulu vanalinangula mwakupwila navilinga vyamwaza, nakutwama kanawa najitanga javo nakumona vyuma vyakulikafwa navyo mukuyoya mujila yamwaza. Vatu kana vali nakulinangula mwakutwamina kanawa oholyapwa, mangana vatengamo kupwa vatu vamuWangana waKalunga.

Numba tuhu Yesu naputuka lyehi kuyula mwilu, oloze jifulumende javatu jichili lika nakuyula hano hamavu. Chipwe ngocho, Kalunga alwezele Yesu ngwenyi: “Yako ufungulule muli vaka-kole jove.” (Samu 110:2) Kalinwomu Yesu akumise kufungulula chenyi omu mwakeza nakunongesa vaka-kole jenyi vosena nakusokola vatu vaze veji kukundwizanga Wangana waKalunga.

Halwola kana, Wangana waKalunga naukalinga vyuma vino

• Kunongesa kwitava chamakuli. Mauka akwitava aze ananangulanga vyuma vyamakuli hamyaka yayivulu navakawafumisako. Mbimbiliya yafwanyisa kwitava chamakuli kupwevo muka-ujila. Vatu vavavulu navakalikomokela omu navakanongesa echi kwitava chamakuli.—Kusoloka 17:15, 16.

• Kufumisako viyulo vyavatu. Wangana waKalunga naukachika viyulo vyavatu vyosena.—Kusoloka 19:15, 17, 18.

• Kunongesa vatu vavilinga vyakuhuka. Nyi ngachilihi vatu vaze veji kulinganga vyuma vyavipi nakukana kwononoka kuchiyulo chaWangana waKalunga? Mbimbiliya ngwayo: “Vaka-kuhenga navakavateta hamavu.”—Vishimo 2:22.

• Kunongesa Satana navandemone. Satana navandemone kaveshi ‘kukahungumwisa cheka vaka-mafuchiko.’—Kusoloka 20:3, 10.

Uno vyuma kana navikanganyalisa ngachilihi vaze veji kukundwizanga Wangana waKalunga?

Hakuwana nge Yesu mwakayulila mwilu, mwakatesamo vyuma vyavivulu chikuma kuhambakana vyuma vize vanatesamo vamyangana vahamavu. Mwakayulanga hamwe navaze 144,000 vaze vasakula havatu hano hamavu. (Kusoloka 5:9, 10; 14:1, 3) Atela kukamona ngwenyi vyuma ajina Kalunga vinatesamo hano hamavu. Uno vyuma muka Wangana waKalunga naukalingila vatu hano hamavu?

• Naukafumisako misongo, naushinakaji nakufwa. Mbimbiliya ngwayo: “Mulifuchi lize kamweshi kukapwa mutu mwakamba ngwenyi: ‘Nguli nakukola.’” kaha nawa “kufwa kacheshi kukapwako chekako.”—Isaya 33:24; Kusoloka 21:4.

• Naukaneha kuunda chamwenemwene namukingo. “Kuunda chavana vove nachikavula,” kaha “navakatwamanga mutu himutu mwishi yamuvinyo wenyi, mwishi yamukuyu wenyi, kaha naumwe wauchi mwakavevwisa woma.”—Isaya 54:13; Mika 4:4.

• Naukakafwa vatu vakapwe namilimo yamwaza. Mbimbiliya ngwayo: “Vaze ngwasakula navakalivwisanga kuwaha milimo yamavoko avo. Kaveshi kukafulyangila chawanako.”—Isaya 65:22, 23.

• Naukafumisako ukalu. Mbimbiliya ngwayo: “Pambo nalifuchi lyaumu navikalisamba, kaha likundu nalikawahilila nakutemwina jitemo jasalafwone.”—Isaya 35:1.

• Naukanangula vatu vyuma vatela kulinga mangana vakayoye haya myaka yosena. “Echi chikiko kuyoya chahaya myaka yosena, kukutachikiza ove Kalunga umwe kaha wamuchano, nayou nawa watumine, Yesu Kulishitu.”—Yowano 17:3.

Kalunga ali nakusaka mukalivwise kuwaha vyuma kanevi. (Isaya 48:18) Chihande chinakavangizaho nachilumbununa vyuma mwatela kulinga mangana mukapwe hamukana wavatu vaze navakalivwisa kuwaha vyuma kanevi.