Vihande vinafumuho vinasolola nge kalinwomu Kalunga afumiseko kano kaye kakuhuka naukalu wosena ulimo. Chikupu vene tunatachikiza ngwetu vyuma kana navikasoloka. Mwomwo ika? Mwomwo Mazu aKalunga Mbimbiliya, atushika ngwawo:

“Kaye kali nakuhita.”—WAYOWANO 1, 2:17.

Twatachikiza ngwetu nakukapwa vatu vaze navakayovoka, mwomwo eyi vesi yatushika nawa ngwayo:

“Ou eji kulinganga mwaya muchima waKalunga mwatwamanga haya myaka yosena.”

Shikaho kuyovoka chapendamina hakulinga mwaya muchima waKalunga. Hakusaka tutachikize mwaya muchima waKalunga, twatela kuvangila kumutachikiza.

Yesu ambile ngwenyi: “Echi chikiko kuyoya chahaya myaka yosena, kukutachikiza ove Kalunga umwe kaha wamuchano.” (Yowano 17:3) Twatela ‘kutachikiza’ Kalunga numba tukayovoke nakuyoya haya myaka. Kutachikiza Kalunga kachalumbununa kaha kutachikiza ngwetu kwatwama chipwe kutachikiza muchano umwe hali ikiyeko. Oloze chasakiwa kulikata nenyi usepa. Chakutalilaho nge tuli nakusaka kuzamisa usepa wetu namutu, twatela kuwananga lwola lwakushimutwilanga nenyi. Omu mukiko watela kupwa nausepa wetu naKalunga. Talenu vyuma vyavilemu twalinangula muMbimbiliya vize vyatukafwa tutunge usepa naKalunga nakuuzamisa.

Tweji kulyanga vyakulya lwola lwosena mangana tuyoye. Chipwe ngocho, Yesu ambile ngwenyi: “Mutu keshi kuyoyela hambolo kahako, oloze nahamazu akufuma mukanwa kaYehova osena.”—Mateu 4:4.

Makumbi ano tweji kuwananga mazu aYehova muMbimbiliya. Omu namulinangula ou mukanda wajila namulinangula muchano waulemu kutalisa kuvyuma vize Kalunga alingililile vatu, nevi ali nakuvalingila oholyapwa navize mwakavalingila kulutwe.

Vyuma muka mwatela kulinga nge muli nakusaka kukavangiza jishimbi jaKalunga oloze chili nakumikaluhwila kwecha vilinga vize amona kupwa vyavipi? Nge muli nakumona ukalu kana kaha kutachikiza kanawa Kalunga nachimikafwa.

Chakutalilaho, achishinganyekenu hali pwevo umwe walijina lyaSakura uze apwilenga muka-ujila. Omu aputukile kulinangula Mbimbiliya atachikijile jino lushimbi lwaKalunga lwakwamba ngwavo “chinenu ujila.” (Wavaka-Kolinde 1, 6:18) Sakura alombele Kalunga amukafwe, ngocho echele kulinga ujila. Chipwe ngocho atelele kutwalaho lika kufungulula vyeseko. Ambile ngwenyi: “Nge ngunaputuka kushinganyeke vyaujila ngwalombelenga kuli Yehova mwomwo ngwatachikijilenga ngwami kangweshi kuhasa kufungulula cheseko kana mungolo jamiko. Kulomba kuli Yehova chinangupandamisa chikuma kuli ikiye.” Vatu vavavulu vali nakutachikiza Kalunga ngana mwaSakura. Kalunga ali nakuvakafwa valumuneko kuyoya chavo nakulinga vyuma vize navimwivwisa kuwaha.—Wavaka-Fwilipi 4:13.

Nge namumutachikiza kanawa Kalunga kaha nayikiye ‘mwamitachikiza kupwa masepa jenyi’ vakulipwila. (Wavaka-Ngalesha 4:9; Samu 25:14) Echi nachimilingisa mukayovoke nakupwa mukaye kakahya kaKalunga. Uno aka kaye kakahya nakakapwa ngachilihi? Chihande nachikavangizaho nachikumbulula chihula kana.