“Tonenunga, mwomwo kamwatachikijile likumbi chipwe olako.”—MATEU 25:13.

“Vangulukenunga, tonenunga, mwomwo kamwatachikijile oho nalukejila lwola vatongolako.”—MAKO 13:33.

Shikaho naumwe wauchi hano hamavu atachikiza lwola navikakuma vilinga vyavipi vyakatwamino kamyaka yinoko. Oloze Kalunga ‘atongola lwola,’ kulumbununa “likumbi naola” nakakakuma kano kaye. (Mateu 24:36) Uno echi chili nakulumbununa nge kakweshi chuma nachitukafwa tutachikize ngwetu kukuma chinapandamako tahi? Nduma. Yesu alwezele tumbaji twenyi vyuma vize navakatachikijilaho ngwavo kukuma chili hakamwihi.

Vyuma kana vikiko vyakutachikijilaho “chikukulwishi chakatwamino kamyaka yino.” Yesu ambile ngwenyi: “Lifuchi limwe nalikafumbukila lifuchi likwavo, kaha wangana umwe naukafumbukila wangana ukwavo, kaha kuvihela vyeka navyeka nakukapwa zala, namindenda.” (Mateu 24:3, 7) Ambile nawa ngwenyi nakukapwa “misongo yachihita.” (Luka 21:11) Kutala muli nakumona evi vyuma apolofwetele Yesu tahi?

Makumbi ano vatu vali nakuyanda mwomwo yajijita, nazala yakalombolombo, namindenda namisongo yachihita. Chakutalilaho, mu 2004, kwapwile mundenda waunene hakalungalwiji waIndia uze wanehele peho yanyamanganda yize yajihile vatu kafwe 225,000. Hamyaka yitatu kaha musongo waCOVID-19 unajihi vatu kafwe jimiliyoni 6.9 mukaye kosena. Yesu ambile ngwenyi vyuma vyakufwana nganevi navikasolola nge kukuma chakatwamino kamyaka yino chili hakamwihi.

Mbimbiliya yavuluka lwola lwakukokela kukukuma chakano kaye ngwayo “makumbi akukuminyina.” (WaPetulu 2, 3:3, 4) Hali WaChimoteu 2, 3:1-5, vasonekaho ngwavo hamakumbi akukuminyina vatu navakapwa navilinga vyavipi chikuma. (Talenu lipwata lyakwamba ngwavo, “ Shimbu Kanda Kukuma chaKano Kaye.”) Kutala makumbi ano muli nakumona vatu valizanga vene, vaka-chipululu, vaka-ukenya, vaze kavazanga vakwavoko tahi? Evi navikiko nawa vili nakusolola nge tuli kwakamwihi nakukuma chakano kaye.

Uno makumbi akukuminyina apwa tando yayisuku tahi? Kweseka naMbimbiliya, apwa kaha “kashimbu kakandende.” Kufumaho Kalunga mwakanongesa vaze “veji kwenyekanga mavu.”—Kusoloka 11:15-18, kwinyikila chamwishi; 12:12.

Kalunga natongola lyehi likumbi nalwola lwakufumisako vilinga vyavipi vyakatwamino kamyaka yino. (Mateu 24:36) Oloze kuli mujimbu ukwavo wamwaza. Kalunga “kazanga mutu numba umwe akanongeko.” (WaPetulu 2, 3:9) Nahane vatu lwola mangana valinangule jishimbi jenyi nakujikavangiza. Mwomwo ika? Mwomwo asaka tukayovoke omu mwakanongesa kano kaye nakukayoyela mukaye kenyi kakahya omu mavu nawakapwa palachise.

Kalunga alongesa mulimo wakunangula vatu mukaye kosena mangana vatachikize vyuma navivakafwa vakapwe mukaye kakahya muchiyulo chaWangana wenyi. Yesu ambile ngwenyi mujimbu wamwaza waWangana waKalunga navakawambulula “hamavu hosena.” (Mateu 24:14) Vinjiho jaYehova mukaye kosena, vali nakuzata jiola jajivulu mumulimo wakwambulila vatu mujimbu wamuMbimbiliya nakuvanangula. Yesu ambile ngwenyi ou mulimo wakwambulula navakauzata hamavu hosena shimbu kanda kukuma chizenga.

Chiyulo chavatu kalinwomu chikume. Oloze chuma chamwaza shina echi: Munahase kukayovoka omu navakanongesa kano kaye nakukapwa muPalachise yahamavu yize atushika Kalunga. Chihande nachikavangizaho nachihanjika vyuma mwatela kulinga mangana mukapwe mukaye kakahya.