Bebe azangile chikuma ise. Mazu akuvendejeka tunavuluka vawahanjikile kuli sepa umwe uze vafwelelele chikuma mutanga yaBebe. Mazu kana kawamuvendejekeleko, oloze amwivwishile kukola kumuchima. Bebe ahanjikilenga mapapa kakavulu ngwenyi, “Kufwa chatata kachawahileko.” Omu mwahichile myaka yayivulu, Bebe asonekele mujimbu wakufwa chaise mumukanda. Echi chasolola hatoma nge apwile lika nakulishona numba tuhu mwahichile myaka yayivulu.

Bebe amwene ngwenyi cheji kumbatanga tando yayisuku numba ushona ukeheko chikumanyi nge tunafwisa mutu twazanga chikuma. MuMbimbiliya, kufwa vachivuluka ngwavo “muka-kole wakukuminyina.” (Wavaka-Kolinde 1, 15:26) Kufwa cheji kuvatwilako kuyoya chamutu, kaha katwatwama nangolo jakuchihonesako. Kakavulu cheji kwizanga mukukasumuna, nakujiha vatu twazanga. Vatu vosena veji kwivwanga kukola chikuma kumuchima nge vanafwisa. Ngocho katwatela kulikomokelako nge natulishona chikuma hakufwisa mutu twazanga.

Pamo munahase kulihulisa ngwenu: ‘Uno nangukecha kulishona tahi? Vyuma muka vinahase kungukafwa ngukeheseko ushona? Ngunahase kuvendejeka ngachilihi vakwetu vaze vanafwisa? Kutala vatu twazanga vaze vafwa navakayoya cheka tahi?’