Vatu veji kuzachisanga jijila jakulisezaseza hakukafwa vaze vali nakulishona. Oloze echi kacheshi nakulumbununa nge josena japwa jamwenemweneko. Chakutalilaho, vatu vamwe vanahase kumikanyisa kulila chipwe kulishona mujila yeka. Veka vanahase kumilweza mulile chikuma nakulitapwojola. Oloze Mbimbiliya yahanjika vyuma vyamwaza hachihande kana vize vetavila navaka-kuhehwojola makumbi ano.

Muvisemwa vimwe, vatu vamona malunga vaze veji kulilanga kupwa vakuhehela. Kutala twatela kwivwa sonyi kulila numba vene hakachi kavatu tahi? Vaka-kuka misongo yakuwongo vawana nge kulila yapwa hijila yimwe yakulishonenamo. Kaha nawa lwola lumwe kulila chinahase kumikafwa mwivwengako kumuchima hwo. Oloze nge namulishonena kaha mumuchima, munahase kulinehela ukalu. Mbimbiliya kayakundwiza vishinganyeka vyakwamba ngwavo kulila chapwa chakuhenga chipwe chasolola mutu kupwa wakuhehelako. Achitalenu hali Yesu. Numba tuhu apwile nangolo jakusangula vafu, oloze alilile sepa lyenyi Lazalu hakachi kavatu.—Yowano 11:33-35.

Kakavulu kupihilila nachikiko chapwa jila yimwe yakulishonenamo, chikumanyi nge mutu tuli nakulishona nafu mukukasumuna. Kwatwama vyuma vyavivulu vyeji kulingisanga mutu uze ali nakulishona apihilile. Vyuma vimwe shina hanjikiso yavatu yayipi chipwe nge mutu umwe twavumbika chikuma mwahanjika vyuma vyakuhenga hali uze nafu. Mike wakuSouth Africa ambile ngwenyi, “Ngwapwile namyaka yakusemuka 14 omu afwile tata. Kahomu twapwile hachipeji, mukulwane wamuchachi yaAnglican atulwezele ngwenyi Kalunga ali nakusaka vatu vavilinga vyamwaza, shikaho ali nakuvambachila washiwashi. * Echi changukolele chikuma kumuchima mwomwo twasakile kutwama hamwe natata. Numba tuhu munahichi myaka 63 kufuma halwola kana, oloze cheji kungukolanga lika.”

Vatu vamwe veji kulihananga nawa mulonga chikumanyi nge mutu nafu mukukasumuna. Veji kuliveyanga ngwavo ‘Nge twalingangako munganji mukananga, pamo kachi kafwileko.’ Nyi pamo valikokojwesanga kalinwaha namutu uze nafu. Echi chinahase kuwezela kuushona wavo.

Kachi nge muli nakulihana mulonga chipwe kupihilila hamutu uze nafu, kachapwa chamwaza kulamina vyuma kana kumuchimako. Lwezenuko sepa lyenu uze mwamivwilila nakumikafwa mumone ngwenu navakwenu vavavulu vaze vafwisaho lyehi veji kwivwanga mwomumwe. Mbimbiliya yatulweza ngwayo: “Sepa wamwenemwene eji kuzanganga sepa lyenyi shimbu yosena, kaha napu nge hindumbwenyi uze mwamukafwa mulwola lwavihuli.”—Vishimo 17:17.

Sepa wamwenemwene wakulikata nenyi nge muli muushona shina Tengi yetu Yehova Kalunga. Ngocho lombenunga kuli ikiye namuchima wosena mwomwo “amizakama.” (WaPetulu 1, 5:7) Kaha nawa atufwelelesa ngwenyi vosena vaze navalomba kuli ikiye mwavahana “kuunda chaKalunga chize chahambakana kunangakana chosena” chize nachikinga michima yavo navishinganyeka vyavo. (Wavaka-Fwilipi 4:6, 7) Zachisenunga nawa Mazu enyi Mbimbiliya amivendejeke. Nachipwa chamwaza kusoneka visoneka  vize navimivendejeka. (Talenu  lipwata.) Nachiwaha nawa nge namulamina mumutwe visoneka vimwe. Kushinganyeka havisoneka kana nachimikafwa chikumanyi naufuku nge muli uka wenu kaha nawa tulo vauchi.—Isaya 57:15.

Kalinwaha ngana, Jack wamyaka yakusemuka 40 afwisanga puwenyi uze navijinga musongo wakasa. Ahanjikile ngwenyi lwola lumwe eji kwivwanga uli chikuma. Oloze kulomba chinamukafwe chikuma. Ambile ngwenyi, “Nge ngunalombo kuli Yehova, kangweshi kwivwa cheka uliko. Kakavulu nge ngunahinduka naufuku, cheji kungukaluhwilanga kusavala cheka. Oloze nge ngunatange Visoneka vyakunguvendejeka, nakushinganyekaho nakulomba kuli Kalunga, ngweji kwivwanga kumuchima undutu. Kutwala muze ngweji kuyanga mutulo.”

Mwanapwevo Vanessa uze afwisanga naye kalinwaha mwomwo yamisongo, naikiye namono omu kulomba chinamukafwe. Ambile ngwenyi, “Nge nguli nakupindasana navishinganyeka, ngweji kuvulukanga lijina lyaKalunga nakulila. Yehova eji kwivwililanga kukulomba chami nakungukafwa lwola lwosena.”

Vaka-kukafwa vatu vaze vanafwisa veji kulwezanga vatu vaze vanahombo chikuma mwomwo yaushona valingeko vyuma vimwe vyakukafwa vakwavo chipwe kwazana mumilimo yimwe yakukafwa vatu muchitungilo. Echi chinahase kulingisa mutu awahilile nakukehesako ushona. (Vilinga 20:35) Vaka-Kulishitu vaze vafwisaho lyehi vanawane nge kulingako vyuma vimwe vyakukafwa vakwavo chinavavendejeka chikuma.—Wavaka-Kolinde 2, 1:3, 4.